Erwin Olaf ante l’abismu d’un mundo qu’esmorez

La muestra ‘Erwin Olaf. Un mundo que desvanece’, fecha espresamente pal centru Niemeyer, va facenos sentir y reflesionar, hasta’l 15 d’ochobre.

Recomendados

Arantza Margolles
Arantza Margolles
Es historiadora.

Muncha xente conocía a Erwin Olaf (Hilversum, Holanda, 1959) enantes de que les sos semeyes llegaren, esti branu que yá abocana, llegara a la Sala de Fotografía del Centru Niemeyer. Solo qu’entá nun sabíen de qué. Sicasí, na tiesta de tolos que tuvieren usu y razón nos caberos años 90 caltiénense entá nel imaxinariu del ciudadanu mediu occidental aquelles prevocadores campañes publicitaries de la marca de vaqueros ‘Diesel’ qu’un día George W. Bush, por entós tovía candidatu a la presidencia de los Estaos Xuníos, intentara censurar. Un grupu de monxes; un ferreru de torsu escultóricu; la semeya d’una pareya d’edá  na qu’ella aprovecha la hora de la siesta del home pa un tocamientu sexual; toos ellos vestíos, de xacíu, con vaqueros.

Un arte que se ve fácil, pero se dixer mal

A Erwin Olaf conocímoslo provocando y sabiendo xeneranos incomodidá -tolos momentos de reflexión han de tenela- coles imáxenes. Como dixera Milan Kundera, l’escritor checu muertu un par de selmanes enantes del entamu de la muestra n’Avilés, de les bones noveles, que tienen de ‘lleese fácil y ceo, pero dixiérese mal’. Asina ye, tamién, l’arte d’Erwin Olaf, qu’estudió pa periodista, y que na so faceta de fotógrafu sigue falándonos de la actualidá d’’un mundo qu’esmorez’. Y d’ehí el título (‘Erwin Olaf. Un mundo que desvanece’, en castellán) d’esta esposición que va tar exclusivamente nel Niemeyer, espaciu pal que foi diseñada, hasta’l  prósimu 15 d’ochobre.

Semeya: Centru Niemeyer

La muestra, ellaborada baxo’l comisariáu del doctor Paco Barragán, cuenta col sofitu del Reinu de los Países Baxos n’España y recueye 80 obres visuales, dende semeyes a videoinstalaciones, nes que Olaf amuesa con mayestría les sos emociones al rodiu d’un mundu en crisis. Fáelo, por exemplu, por mediu del autorretratu, como nes semeyes que mos dan la bienllegada a la exposición y nes que’l holandés ilustra’l so mieu a avieyar o’l plasmu ante sucesos como l’atentáu escontra la redaición de Charlie Hebdo, en 2015, pol recursu del disfraz y l’anacronismu, una constante na so obra.

Guapura ya irrealidá

Sentimientos como la soledá, la señardá, l’ansiedá, la vulnerabilidá o la marxinación del individuu ante un mundo en cambiu son tresmitíos por Olaf,  magar de la so negatividá, con guapura abondo, inclusives (o precisamente por ello) si esta, pa amosase, tien de ser construyía artificialmente por mediu d’esi “nuevu cuartu escuru” que ye’l Photoshop o’l recursu a estétiques yá inventáes, que nos sos díes deformaron el pasáu pa tratar d’apurrir la idega d’una sociedá feliz, guapa, perfeuta; poro, falsa dafechu. Asina, la serie Rain (2004) recurre a los collores vivos y los modelos de familia nuclear que, nos Estáos Xuníos de los años 50, trataron de tresmitir al mundu cómo tenía que vivir.

Semeya: Erwin Olaf

Nun resultó. Eses imáxenes felices de la década de ‘Grease’ consiguen ser tan inquietantes na obra d’Olaf como tamién la inspiración nos vieyos artistes holandeses que-y sucedieron; esa xuntanza de carnes sudoroses, blanques escontra prietes, dientro’l caos, del ‘Rapto d’Hipodamia’ de Rembrandt, una obra que nel so día trató de mostrar l’horror que tamién na nuesa dómina vivimos tres d’el 11-S o, averándonos más a anguaño, l’auxe de los facismos al qu’Olaf teme dende’l so mesmu orixe, y qu’amuesa maxistralmente na serie Berlin.

Lo que puede pasar mañana

Dientro d’ella, Masonic Lodge recuerda la xesta de Jesse Owens nos Xuegos Olímpicos de 1936, vencedor delante d’Adolf Hitler y de les sos idegues d’odiu racial. Pero lo fae, escontra lo usual, pa alvertinos. Un guah.e, vestíu a la moda de la Alemaña de los años 30, apunta col déu al campeón, como xugando a dispáralo; o, quiciabes, sentenciándolu pal futuru. “Tóo podría venise abaxu mañana”, dixo l’artista a les entrugues del comisariu Paco Barragán, nuna entrevista que puede mercase, espublizada, na mesma muestra del Niemeyer, y na que Olaf nun solamente fala d’arte. Esti, a la fin, nunca nun puede sustraese de la realidá qu’afecta al artista. Ye por eso qu’’Erwin Olaf. Un mundo que desvanece’ nun ye una muestra fotográfica ensin más. Fala de nosotros mesmos, de los golpes del mundo que yá vivimos y de los que tamos a piques de vivir.

La esperiencia, irrepetible, va seguir poder esfrutase nel Centro Niemeyer hasta’l 15 d’ochobre, a 4 euros la entrada, y cunta tamién con visites interpretatives, al preciu de 10€, feches pola empresa avilesina Cuéntame un Cuadro.  

Actualidad