El VII Festival ‘Nel Amaro’ de Teatru Profesional en llingua asturiana va comenzar el vienres coles tres obres finalistes qu’opten al premiu del mesmu nome, seleccionaes pol xuráu nuna primera fase celebrada nel mes de mayu, y otres dos d’exhibición.
El premiu Nel Amaro ta convocáu pola viceconseyería de Cultura, Política Llingüística y Deporte, nel contestu de los premios lliterarios y artísticos en llingua asturiana o gallego-asturianu, y pueden concurrir a él empreses del sector profesional dedicaes a la producción y representación d’espectáculos teatrales.
El xuráu, integrado por especialistes en teatru y llingua asturiana y presidíu pol director xeneral de Política Llingüística, Antón García, seleccionó na so primera reunión los tres trabayos pa la so representación nel VII Festival Nel Amaro, nel Teatro Filarmónica d’Uviéu.
Trátase de “Xuan Soldáu”, de Carlos Alba, “El gorrumbu”, de Saltantes Teatro, y “Caperucita en Muniellos”, d’Escenapache, que se van representar nel Teatru Filarmónica d’Uviéu los díes 6, 13 y 20 d’ochobre, respectivamente.
Amás, esti añu’l públicu va tener ocasión de volver a esfrutar de les obres ganadores del añu 2021 y 2022, “La reina de la guapura de Leenane”, de Nun Tris Producciones, y “Les madreñes vacíes”, de Carlos Alba, que van abrir y zarrar el festival, respectivamente, los díes 29 de setiembre y 27 d’ochobre.
El Premiu de Teatru Profesional Nel Amaro, dotáu con 6.000 euros, convócase col fin de consolidar, arriquecer y dar prestixu a la llingua asturiana y al gallego-asturianu nel ámbitu del arte dramáticu.
Esti gallardón y esti festival lleven el nome del autor turonés Nel Amaro (1946-2011), consideráu una referencia fundamental na vanguardia teatral n’asturianu.
