El pasáu miércoles 25 d’ochobre, el xuráu del I Premiu Pachín de Melás de testos teatrales resolvió conceder el gallardón a la obra Flashback, del autor Dolfo Camilo Díaz (Caborana, 1963), a cuenta del «arte col que remana’l xéneru de la comedia y l’habilidá pa integrar númberos musicales nuna obra de tonu ácidu y irreverente que trata temes de la historia asturiana recién».
Esti gallardón, convocáu pola Viceconseyería de Cultura, cuenta con una dotación de 6.000 euros, la edición del testu inéditu y la coproducción de la obra. Arriendes d’ello, esta obra va ser incluyida tamién nos ciclos culturales qu’entama’l Principáu, puesto que, precisamente, l’envís del premiu pasa per estimular la escritura y representación de pieces escéniques n’asturianu.
El premiu garra’l nome, de fechu, d’ún de los grandes personaxes del drama asturianu, Pachín de Melás (alcuñu de Emilio Robles Muñiz), y cuntó con un xuráu compuestu pol director xeneral d’Acción Cultural y Normalización Llingüística, Antón García, qu’actuó como presidente; escritor Henrique Facuriella; l’actriz Verónica Gutiérrez González, directora de la compañía É Vero Teatro, y de l’actriz y profesora de la ESAD (Escuela Superior d’Arte Dramáticu) Begoña Quirós y Laura Marcos, filóloga del Serviciu de Planificación Llingüística, qu’actuó como secretaria ensin votu.
Dolfo Camilo Díaz ye una de les voces fundamentales de la Segunda Xeneración del Surdimientu, mesmo como novelista p’adultos que como escritor pa rapaciones, como atestigüen los munchos premios que recibió a lo llargo de la so trayectoria. Ente estos llibros destaca seique Añada pa un güeyu muertu. Amás, Dolfo Camilo Díaz fai una parte bien bultable de la escena teatral n’asturianu: amúesenlo asina les munches obres de teatru que tien espublizaes y el so papel como fundador de delles compañíes teatrales y como dramaturgu pa otres.
La so obra Flashback foi gallardonada, según esti xuráu, porque presenta «una trama mui ellaborada qu’avanza de manera áxil y dinámica al traviés de personaxes mui auténticos que dexen patente el dominiu del rexistru coloquial del asturianu».
