El xuráu destacó que’l proyectu «actualiza una obra clásica al xunir la realidá de la quema de Nôtre Dame en París y la ficción de los personaxes de Quasimodo y Esmeralda de Victor Hugo».
D’igual manera, el fallu resalta «la llamativa escenografía, con un espaciu multidimensional, y el trabayu actoral, qu’ufre momentos de gran emoción y tenrura».
El xuráu taba integráu pola crítica teatral Eva Vallines, l’actriz María Cotiello y los escritores Chechu García y Miliu Ureta.
El director xeneral d’Acción Cultural y Normalización Llingüística, Antón García, exerció de presidente y Laura Marcos, filóloga adscrita al Serviciu de Planificación Llingüística, de secretaria.
El gorrumbu llegó a la final del Premiu Nel Amaro xunta les producciones Xuan Soldáu (Carlos Alba) y Caperucita en Muniellos (Escenapache).
Estos espectáculos representáronse a lo llargo d’esti mes nel Teatru Filarmónica d’Uviéu, demientres el Festival de Teatru Nel Amaro.
Nesta edición, amás, incluyóse la representación de La reina de la guapura de Leenane, de Nun Tris, y Les madreñes vacíes, de Carlos Alba, obres ganadores de los certámenes de 2021 y 2022, respectivamente.
El gallardón, promovíu pola Viceconseyería de Cultura, Política Llingüística y Deporte, tien por oxetu consolidar, arriquecer y prestixar l’asturianu y el gallegu d’Asturies nel ámbitu del arte dramático, y ta dotáu con 6.000 euros.
Amás, l’espectáculu ganador va incluyise nel ciclu Autores nel Camín y va promovese la so representación per tola comunidá.
