Tiempo para abolir traigo en las manos,
un desecho de ayeres. El mar se bebe al mar,
y así la muerte nutre de fondo a los espejos.
Aurora Luque (Carpe Amorem)
Un desechu d’ayeres ye triste. En castellanu la palabra “desecho” fae referencia a “lo que queda depués d’escoyer lo meyor y más útil de dalgo”. N’asturianu lo más asemeyao ye “desfechu”, que nuna de les acepciones ye “inservible”. Ye un poco forzada la equivalencia, que’l prefixu ye’l mesmu, “des”, pero’l verbu cambia: echar y facer. Hai un reblagu bien grande ente ún y otru. N’asturianu podemos usar “magaya”, lo que queda (cosa –que nun val pa nada-, puntualiza l’ALLA).
El dicir d’Aurora Luque ser ye preciosu. Impresionante. Diz n’otru poema “y casi no me asombran/ los esfuerzos titánicos del arte/ por aclarar la eterna turbiedad de los días”. Igual a ella nun-y asombra, casi, pero a mí sí que m’asombró’l so arte. Aclaróme tamién la definición d’arte. Y de tiempu (vital). Namás con eso yá faes un día y nun queda pa magaya.
Un desfechu d’ayeres igual s’acaba inventando. ¿A que hai veces en que tarrecéis que na vida nun haya un Ctrl+z? Ser ye un clásicu nos deseos humanos: el volver a empezar, el día de la marmota que te da tiempu, desfechu, p’algamar la perfección.
De momento nun existe. Queda en deséu, en fantasía. Otru cantar ye si los deseos, les fantasíes, existen. Yo creo que sí, otra cosa ye que nun siamos quien, munches veces, a pone-yos materia. Del deséu naz l’acción. Tamién la inacción, que ye otra forma d’acción. El capitalismu, como tovía nun inventó’l Ctrl+z vital, procura que tengamos deseos materializables a la mano. Ye más: convierte la necesidá en deséu: porque subsistir, tener un techu, nutrise y llegar al otru día en condiciones, son necesidaes que’l capitalismu pervierte en deséu. Trabayando muncho, dacuando, subsistes. La casa de los tos suaños, la familia de los tos suaños, la carrera de los tos suaños, la funda de móvil de los tos suaños, el viaxe de la to vida, la pareya ideal….
Yera bono nun confundir deséu y necesidá. Ye fácil tracamundialos, porque “deséu” ye “tener muncha gana de daqué”, asina que si tienes fame, tienes “deséu” de comida. Pero sabemos bien que nun ye lo mesmo, eh. Puedes tener muncha gana, por dalguna razón, de conocer Bielorrusia. ¿Depende la to existencia d’ello? Non. Yo creo que voi pasar per esti mundu ensin conocer Bielorrusia, anque tampoco nun me da muncho más. Habrá xente que sí. Lo peor nun ye eso, lo peor ye que mui guapamente, volveré a sitios a los que nun tengo nengún deséu de volver: a Cualloto, por poner un casu (nun tengo nada en contra, eh, coses míes).
Asina que nun ye lo mesmo tener fame pa subsistir que querer o nun querer dir a Cualloto o a Bielorrusia. Por muncha gana que tengas de lo uno y lo otro. Ye diferente. Vese bien, ¿non? Por si acasu, necesidá pue dir de la mano de subsistencia, que ye a lo que tienden los seres existentes pa conservar esa existencia y que, casualmente, lleva’l prefixu “sub”, perbaxo de la existencia. Esto yá da pistes importantes. Existencia yá ta penriba: una vez algamada la subsistencia, bien ta ocupase de la existencia. Y ehí yá podemos falar de deséu. Aquello de que les diferencies cuantitatives son cualitatives. Pos eso.
El deséu suel venceyase al bien. Pero como yá dixi, nesti mundu fabricador de deseos tipo caxigalina, dacuando mui caros y hasta inmorales, ye bono nun xuntar conceptos tan a lo xole. Desear controlar el mundu nun ye cuestión de subsistencia. Desear que desapareza un pueblu, el palestín, por poner un casu, pa ocupalo too, ye barbarie. Querer y poder nun equivalen a deber. Quieres facelo, puedes facelo, pero nun debes facelo.
Toi poniéndome moralista, yá lo sé. Pero bueno, porque puedo y quiero (nun tengo claro que deba, la verdá, pero lleer esto respuende a un deséu, inocuu, y non lleelo, tamién, asina que ye un “problema” cenciellu d’iguar). Ye que dacuando, en discusiones, discutiéronme, ye lo que tienen les discusiones, que nesta época nun hai “ideoloxía”. Y yo anecio con que sí que la hai, pero que nun nos damos muncha cuenta. Una ideoloxía ye un conxuntu estructuráu d’idees, y esti sistema tienles. Creo yo. Ye verdá qu’hai ideoloxíes con un llibru namás y luego paráfrasis del llibru (la típica relixón monoteísta, sin dir más allá). Equí, bueno, sí qu’hai llibros mui esplícitos, pero funciona meyor en plan magma: idees repetíes que van caltriando y se faen fuertes: el yo. Yo y el mio deséu. Da igual cuál…
Non da igual, non. La necesidá mueve al ser, pa siguir siendo, y el deséu enllena la existencia. Ta bien gradualo. Nun ye lo mesmo desear tener tres coches o dir en jet priváu a pañar setes, que desear conocer el sentíu de la existencia. Nel primer casu vas marafundiar muncho bien común, lo que nun ye de recibu por munches perres que tengas pa compralo –porque comprometes la existencia del restu de los seres y eso, a priori, parez que ta mal- y nel segundu, pos allá tu. Llee, piensa, fala, discute… Poder, querer, ¿deber? (Ye difícil responder a lo que ye’l deber, nun ye tan abegoso saber lo que ye’l non deber: lo que destrúi, lo que manca, lo que trespasa les llendes del ser del otru, de la otra). Responder a les tres preguntes yera bono pa estripar el deséu y asina esclariar si pasa de la fantasía a lo material (sía lo que sía la materia).
Desear que’l mañana nun sía un desfechu, una magaya, d’ayeres, nun ye mal plan. Pue salir bien barato. O non. Hai que tener tiempu pa ello. Y como esti sistema convierte la más básica necesidá en deséu, el tiempu tamién ye un bien escasu y, polo tanto, caru. Pero bueno, yo creo que s’entiende: falando capitalísticamente, yera bono poder cumplir los deseos baratinos, los que nin siquiera se vienden nin se compren, que namás se faen de tiempu non desfechu, de tiempu que nun quede pa magaya.
