Alfredo Garay Menéndez nació en Cuideiru en 1961. Trabayador de la mar, ye autor de los poemarios ‘Run’ y ‘Bichoques”.
¿Cuándo empezasti a escribir poesía y por qué lo fixisti? ¿Precisabes espresar daqué o solo xugabes col llinguaxe?
Si m’entrugaras por lleer, escribir o dibuxar, diríate que dende mui neñu. Escribir poesía, nun lo sé. Pienso yo que del formientu de les lectures y de la música foi apaeciendo na adolescencia. Teo unos versos de cuando tenía unos quince años como lo primero recoyíu pero que por supuestu niégome a reproducir. Asina con una mudanza atopeme con cartes y borradores de fai munchos años onde tenía amagos de poemes. Pero yo nun sabía que aquello podíen ser poemes. Agora fai más de diez años que lo teo too recoyíu, amontonáu pero polo menos guardáu. Y el motivu pues supongo que a caún salnos la inquietú, si ye que la tenemos, per dalgún llau. Llectures, sentimientos, desafogos… pues acaben llevándome ehí.
¿Cuando te pones a escribir ¿sigues un modelu? Dichu con otres pallabres: ¿te inspires en daquién o almires a daquién?
Cuando me pongo a escribir l’únicu modelu que sigo ye la mio voz interior. Estu nun quier dicir que seya yo especialmente orixinal, la mio voz ta mui bien contaminada por otres voces, clásiques, menos clásiques y actuales. Va ser mui poco llamativu nomar a montón de poetas dende San Juan de la Cruz hasta Ángel González. Préstame muncho descubrir voces nueves, y ensin ser nueves, pa moyame, voi nomar a poetes de la mio tierra: Aurelio González Ovies y Nacho González per un llau y a Vanessa Gutiérrez y Llurdes Álvarez per otru, pa qu’haya paridá. Y queda muncha, muncha, otra xente nel tinteru.
Los poetes saben qu’el so públicu ye bien amenorgáu, pero escribir n’una llingua minoritaria, como l’asturianu, ¿non te paez que supera’l cuelmu de la escentricidá?
Sí. Categóricamente sí. Claro que soi escéntricu, siéntome de siempre na periferia. Nun sé si ye por que s’escribe muncho y lléese poco pero sí, tal cual lu dices, poesía y n’asturianu, vender un llibru ye toa una proeza. Pero por otru llau nun ye cuestión de lluchar contra los elementos, gústame escribir poesía, necesítolo, y qué voi facer si na mio cabeza ta n’asturianu. Joan Margarit dicíalo muncho meyor: “No hay ningún gran poeta que no haya escrito en una lengua que no sea su lengua materna.” Ya ves, teo aspiraciones mui altes.
Mientres dellos años fuisti pescador en Cuideiru. Nos tos dos llibros de poesía Run y Bichoques (dambos en Baxamar editores) l’elementu marín ta bien presente: ¿crees qu’esa ye la to mayor orixinalidá como poeta?
Home, espero nun seya esa la mayor orixinalidá, paezme una carauterística de lo más normal en mi. Nací en Cuideiru, nuna familia de pescadores, tuve na pesca dempués nuna lancha de salvamento y llevo más de treinta años nun barcu d’aduanes. La mio vinculación col mediu marín ye evidente. Aprovéchome d’ese conocimientu, si bien ye verdá que me paez que ye un llinguaxe menos utilizáu en poesía y a la vez de una riqueza tan grande como la mar mesma. Pero no que intento ser orixinal ye nel fechu de llevar la vida hasta ese llinguaxe, facer lliteratura con él y crear poesía. Nun sé si lo consigo pero yo preténdolo asina.
Tamién cultives la fotografía, sobremanera en blanco y negro. Sicasí, nos tos poemes hai color[1]: ¿diríes que la to fotografía tresmite la espresividá de lo que ves, pero los tos poemes, que son bien visuales, recueyen el dinamismu de la naturaleza?
La fotografía gústame muncho, el blanco y negro n’especial pal retratu y dalgúnes escenes, pero nun renunció al color. Si ye verdá que amás de sirvime munches veces una foto como fonte d’inspiración, ese momentu históricu que conxeles na semeya tamién me presta facelo nel poema, facer un dibuxu en versu d’una situación o d’un momentu determináu. Per otru llau si llees los prólogos de los dos llibros, en RUN de Vanessa Gutiérrez y Vicente García Oliva en BICHOQUES, los dos coincidieron en lligar les dos coses en mí, posía y fotografía, como dos maneres distintes de fixar una imaxen. Y puedo dicite que me sorprendió ese detalle del que yo nun yera tan cosciente y a la vez que los dos tuvieren esa mesma apreciación. Y sí, nun dexen de ser dos maneres d’espresame.
Una de les coses que me gusta de la to poesía ye qu’el to Yo nun apaez o s’escuende. Esto ye, qu’escribes una poesía poco egocéntrica. Agora bien, un psicoanalista quixera saber si, en realidá, lo que fexes ye amarutar el to Yo como mar o con dalguna otra apariencia: ¿qué-y responderíes al psicoanalista?
Por un llau préstame que nun veas egocentrismu na mio poesía. Siempre se diz que nesti mundu hai muncho ego. Pero per otru sorpriéndome, suelo dicir que faigo poemes con cachinos de vida, o sea, yo siéntola “esperiencial”, y digo estu ensin pretender incluyime en nengún grupu nin estilu. Escribo sobre lo que vivo y lo que siento. Préstame muncho facer alegoríes, sentimientos que pueden escondese nel orbayu, na niebla, los raigaños, na mar…, pero claro, cuando llego a la mar apaez la galerna y la calma, los barcos y partes d’estos, la navegación… Véase o non, ehí tamién ta el mio yo poéticu, esu-y diría al psicoanalista.
Nos tos poemes, la sociedá apenes esiste, lo que resulta interesáu porque vives nuna ciudá como Xixón. Sí atopa l’amor de pareya y, polo xeneral, de familia. ¿A qué debe esi buecu? ¿Quiciabes a la necesidá de silenciu?
Non, equí nun toi d’acuerdu. Quiciás tea más claru un poema cuando falo d’amor o sexu, pero asina faciendo un repasu mental de los dos llibros, sobremanera nas dos primeras partes d’ellos, puedo dicite qu’hai poemes que falen de la rabia y de la inxusticia social, de la memoria histórica, de la migración, del pasu’l tiempu, de la niñez, de la perda, del alzheimer… Y el silenciu ye una pallabra a la que recurro muncho, ye mui necesariu pa sentir bien, el silenciu como ausencia de ruiu. Tamién Silenciu como llugar, el mio Gavieiru, que ye pa mi sitiu de recoyimientu y d’inspiración.
¿Vas animate a cultivar otros xéneros, como’l cuentu y la novela?
Lo d’escribir rellatu siempre lo fixe, intentar facer dalguna historia, dalgún cuentu, pero sobretoo rellatos curtios. Novela yá te digo que non. Bueno, neste terrén coseché dalgún ésitu, jeje, gané un par de concursos en redes con microrrellatos, unu de Iniciativa pol Asturianu #lamiollinguaye, y esti añu gané’l del ayuntamientu Sariego, el “IV concurso de microrrelatos Luisa Rebollar”. Préstame de cuando en vez participar en dalgún concursu pero paezme que me defiendo meyor en poesía anque nun gane nengunu.
¿Tas preparando un próximu llibru? En casu afirmativu: ¿les sos páxines tamién van rezumir agua del Cantábricu?
A too que sí. Unes veces más, otres menos, pero’l llinguaxe de la mar va tar siempre, llévolu dientro. El prósimu añu si nada se tuerce, sácame un llibru nuevu la editorial Trabe. Ye pa mi un honor pergrande. Toi mui contentu. La editorial Bajamar ye una familia poética única y paezme un privilexu tar n’ella, y Trabe ye ensin dulda la más importante n’edición n’asturianu, asina qu’otru privilexu igual d’importante. A la vez toi finando la corrección d’otru de carácter eróticu.
A lo último, ¿qué ye lo que más almires como poeta? ¿y como persona?
Como poeta lo que más almiro ye’l trabayu na creación y la humildá, n’especial la de dalgunos grandes poetes de los que quiero y teo muncho qu’aprender. Como persona confórmeme con atopame con bona xente, que ser bono implica muncho y amás ye contaxosu.
[1] Aclaración: los bichoques que titulen el segundu llibru d’Alfredo Garay son arcoíris formaos por gotes marines y anuncien galerna.
