Esti rellatu asocedió va unos pocos años, cuando namás que cuatro o cinco asignatures me separtaben de convertime en graduáu universitariu. En mio casa, les comíes familiares celébrense siempre de domingu. Y aquel domingu, quiciás el día de la ma, axuntémonos en casa mio güela. Nun se podía fallar a la tradición. Coles llambionaes yá terminaes y les taces de café tamién vacies, llevanté de la mesa pa dir al bañu. Toi viéndome pronunciar aquelles pallabres. Tengo que dir a mexar. Nun necesitaba escondeme, podía ser sinceru y nun buscar eufemismos pa espresame. La rempuesta, d’un llau de la mesa que nun esperaba, salió de los llabios más veteranos. Nun tonu a metá del camín ente la chancia y la llástima, con esa ironía que tan bien la definía, criticó que yo emplegare esa pallabra. Criticóme por dicir mexar. Un rapaz universitariu, estudiáu, intelixente (según ella), nun podía usar esi tipu de términos. Mexar y otres tantes pallabres d’esti idioma nel qu’escribo nun-y paecíen afayadices pa mi.
Mio tía, tía güela pa nun mentir, amosó ensin ser consciente lo que ye la diglosia, lo qu’escuende esi complexu d’inferioridá que tantes asturianes y asturianos lleven –o llevamos – dientro dende que somos neños. Nun ye l’únicu exemplu que puedo atopar na familia o nes amistaes. Calculo que nun par de meses diba poder tener un llibru bien gordu enllenu d’anéudotes como esta. Dalguna, tamién, conmigo como protagonista. Porque toos y toes, ensin importar el nuestru compromisu llingüísticu, actuemos en dalguna ocasión d’esa mesma manera. ¿Quién nun dexó de falar asturianu al entrar en determinaos comercios? ¿Quién nun pasó al castellanu al entregar un papel nun rexistru? ¿Quién nun cambió d’idioma al falar con un profesor o profesora? La llista podría allargase cuasi hasta l’infinitu. Esiste una solución. La política llingüística ye la ferramienta que tienen les alministraciones públiques y los gobiernos pa terminar con estes situaciones, pa romper cola vergoña de les y los falantes. Recuperar l’autoestima llingüística de la xente ye, amás d’una posibilidá, una obligación moral.
El 21 de febreru celébrase’l Día de la Llingua Materna, un acontecimientu que nos xune a la nuestra tierra, a los nuestros raigaños. L’asturianu y el gallego-asturianu (amás del castellanu, l’árabe, el rumanu, el francés o l’inglés) son les llingües maternes de munches asturianes y asturianos. Y los derechos de toes estes persones tienen de reconocese. Si queremos vivir nun país meyor, esi país tien de cuntar con una radio y una televisión que dean visibilidá a los idiomes propios. Esi país meyor y col que podemos y queremos suañar precisa d’un sistema educativu onde les llingües que les neñes y neños sienten en casa –y usen tamién en munches ocasiones – tengan una presencia afayadiza. El país que cualesquier persona desea nun pue almitir discriminación nin marxinación pol usu d’un idioma diferente al mayoritariu. El país col que suaño, col que suañamos, ye un país onde’l Presidente fala asturianu (o gallego-asturianu) ensin complexos y en toles situaciones, y non namás pa falar de les propies llingües. L’Asturies cola que suañamos nun va permitir, cuando un día nos averemos a ella, que muyeres de noventa años se consideren inferiores por dicir mexar, raposu o caleya.
El Gobiernu d’Asturies –tamién los de los conceyos – tien deberes. El futuru de les nuestres llingües depende de les polítiques que se lleven alantre. Tratar a lo que yá ye la Conseyería de Cultura, Política Llingüística y Deporte ensin la seriedá que merez, con propuestes propies de la improvisación d’un circu, nun ye la meyor decisión nin un exemplu a siguir. Hai un marxe de meyora mui grande hasta llegar a esi país suañáu, a esa oficialidá a la que nun se pue arrenunciar. Necesitamos más fechos y menos discursos vacios, más aiciones y menos personalismu, más derechos y menos pallabres. A trabaya
