Aína ta acabante de facer les sos propuestes en rellación a la rede d’Escuelines que’l Gobiernu del Principáu d’Asturies va desendolcar. La formación asturianista valora posivamente’l pasu dau, pero fai delles observaciones como que “la calidá educativa va muncho más allá que l’apertura de escuelines” y que “ha siguise ufriendo places y descentralizando les escueles pa llegar a tola xeografía asturiana”.
En cuantes a la calidá educativa,Aína defende que la estaya de 0-3 años “ye una etapa d’aprendizaxes d’habilidaes básiques pa la vida como la comunicación, l’alimentación, el desplazamientu, el control d’esfínteres… Amás ye una fase onde los y les escolines son totalmente dependientes de la persona adulta y vulnerables”. Tien “calter propiu”, polo que defenden “la disminución de les ratios pa falar de calidá educativa”. Nesti sen, planteguen averase “lo más posible a les recomendaciones europees: 4 escolinos/es por educador/a na etapa 0-1; 6 na etapa 1-2 y 8 na de 2-3”.
Tamién defenden “dotar de recursos personales a les escuelines cola figura de la persona de sofitu en cada aula” y faceles inclusives con “personal especializáu qu’atienda les necesidades individuales del alumnáu con diversidá funcional”. Xunto a too esto, el partíu soberanista defende “ampliar los permisos de maternidá y paternidá p’abarcar el primer añu de vida” y qu’éstos garanticen “el cuidáu de la infancia cuando hai una enfermedá”. Amás piden que “les escueles infantiles sigan el calendariu escolar afitáu pal restu d’etapes educatives, porque la reciella necesita descansar y el personal de les escuelines tamién”, a la par que reclamen “ufierta de campamentos y actividaes municipales pa los periodos non llectivos qu’ayuden a les families nesos momentos”.
Esparder y descentralizar
“Les Escuelines tienen que tar espardíes pela xeografía pa facilitar la conciliación de les families y pa fixar población en tol territoriu, amenorgando los desplazamientos na midía de los posible. L’oxetivu debería ser que poblaciones con más de 500 habitantes tuvieren escuela pública de 0-3 años”, planteguen dende Aína. Asina ye como critiquen que’l suroccidente ta “abandonáu” al nun haber escueles en conceyos como “Ibias, Allande, Pezós, Eliao, Samartín d’Ozcos y Taramundi” y qu’hai otros como Cangas o Tinéu nos que namás hai una plaza disponible por cada 3 neños/es.
Nel informe ellaboráu pola organización asturianista, critícase tamién que “na zona central, onde s’alcuentren los conceyos más poblaos, hai un déficit mui altu de places, sobre manera en Siero y Villaviciosa, que cuenten con una plaza per ca 5 nenos/nenes”. “Uviéu, Xixón, Avilés, Llanera y L.lena son los otros conceyos onde la ratio de places ye mui inferior a la infancia que viven n’ellos”.
Por último, Aína cuestiona que “l’acumulación d’escueles ta nes mayores poblaciones y nes capitales de conceyu” y proponen la descentralización, teniendo en cuenta poblaciones grandes que tán ensin serviciu: “Felechosa (Ayer), As Figueras (Castropol), Llastres (Colunga), Nueva (Llanes), Tiuya (Llangréu), Villoria (Llaviana), Returbiu (Mieres), Curniana (Salas), San Cloyo (Uviéu), La Fresneda, El Berrón y Carbayín (Siero), Salinas-Raíces (Castrillón), Blimea (SMRA), Uxo (Mieres), Cabanaquinta (Ayer), Veiga (Navia), L’Arena (Sotu’l Barcu), Los Barreros (Llaviana) y Cancienes (Corvera)”. La razón ye que “les Escuelines apurren un serviciu básicu p’atrayer nueves xeneraciones y que’l rural precisa d’esfrutar de los mesmos servicios que los ciudaes”, concluyen los asturianistes.
