L’alumnáu del segundu ciclu d’Educación Infantil va poder per primer vegada recibir clases n’asturianu

Les sesiones van ser, preferiblemente, de 30 o 45 minutos y los centros tendrán d'afitar, polo menos, una clase a la selmana nel primer cursu pal alumnáu de trés años.

Recomendados

Redacción Nortes
Redacción Norteshttps://www.nortes.me
Te contamos lo ocurrido centradas en la periferia.

L’alumnáu d’ente trés y seis años del segundu ciclu d’Educación Infantil van poder per primer vegada recibir clases n’asturianu y eonaviego a partir del cursu escolar 2025-2026, enseñanza que va tener calter voluntariu, pero que va tener d’ufiertase obligatoriamente en tolos centros.

La decisión anunciada esti vienres pola conseyera d’Educación, Lydia Espina, al términu de la xunta selmanal del Conseyu de Gobiernu, va tar condicionada a qu’haya presupuestos autonómicos aprobaos en 2025, yá qu’esta midida va tener un costu mayor a los cinco millones d’euros y va traer la creación d’unos cien puestos de docentes a tiempu completu.

Pa introducir la so enseñanza, l’Executivu autonómicu aprobó un cambéu del plan normativu que regula la ordenación y establez el currículu d’Infantil que, según Espina, establez qu’el aprendizaxe va tener calter voluntariu y que nun va trayer el cambéu de los conteníos, pero que sí va ser d’ufierta obligatoria en tolos centros.

Respuende al deséu del Gobiernu asturianu de “protexer y espublizar les llingües propies”, incidió la titular d’Educación, que recordó que col mesmu fin va introducise tamién esa ufierta na escuela d’idiomes.

“El Gobiernu d’Asturies ye partidariu de la oficialidá”, afirmó la conseyera, qu’alvirtió de que, cuidao que consiguilo ye imposible cola cadarma actual del parlamentu asturianu si nun hai un cambéu de posición del Partíu Popular, apostóse por dar esti pasu na enseñanza infantil sol amparu de la Llei d’Usu y Promoción del Asturianu.

D’esta forma garantízase que tol alumnáu reciba la mesma formación y adquiera iguales competencies, según la titular d’Educación, que señaló que los estudiantes que lu deseyen van trabayar parte de los conteníos de ‘Comunicación y representación de la realidá’ n’asturianu y eonaviego y el restu va facelo en castellán.

La nueva ufierta va implantase de forma simultánea nos trés cursos del segundu ciclu d’Infantil y va tener un mínimu de trés y un másimu de cuatro hores selmanales en tola etapa.

Les sesiones van ser, preferiblemente, de 30 o 45 minutos y los centros tendrán d’afitar, polo menos, una clase a la selmana nel primer cursu pal alumnáu de trés años.

En cuanto al personal, la iniciativa va suponer la creación d’unes cien nueves places de docentes a xornada completa, computando dos medies xornaes como una completa y va traer que’l plan d’amenorgamientu de medies xornaes na qu’esta trabayando Educación nun s’aplique na área d’asturianu hasta 2025.

Actualidad