Resistir al ocasu del rock Asturtxale

Skama La Rede cumple 20 años nel meyor momentu de la so historia, que contrasta col estancamientu y falta de relevu na escena del punk-rock reivindicativu n’asturianu

Recomendados

David Artime
David Artime
Periodista y escritor. En 2009, ganó el premio de narrativa en lengua asturiana de la editorial Trabe con la novela "La Bufanda", en la que aborda el mundo de los ultras de fútbol.

Foi nún de los conciertos del Festival Intercélticu de Lorient del añu 2003. Ellí taben Burilo (Miguel Fernandi -vocalista), Kike y Llou (José Ángel Rodríguez – batería), que llevaben un tiempu rumiando la posibilidá de montar un grupu de música. La cosa taba un pocu parada daquella. Paecía que naide siguía la estela de Dixebra. Subieron entós al escenariu unos piamonteses que tocaben un mecigayu de ska y música tradicional cantáu na llingua de la so tierra. Animóse l’ambiente y la xente entamó a pegar saltos. Ellos miráronse: habrá que facer una cosa asina, pensaron. En setiembre d’esi añu entamaron a ensayar y en febreru del 2004 dieron el so primer conciertu nun concursu de grupos llocales, nel Aljibe del Parque Les Conserveres de Candás.

Yera’l nacimientu del grupu Skama La Rede, qu’esti añu ta celebrando’l so vixésimu aniversariu. Una efeméride con sensaciones contrapuestes. Nunca movieron tanta xente, nin tuvieron tantu puxu. Nunca algunos de los sos cantares (Internacionalista, Campu de Batalla…) fueron tan himnos como agora. Nunca fueron tan referentes pal públicu del rock reivindicativu n’Asturies. “Pero tamién ye verdá que llevamos munchos años teniendo prácticamente’l mesmu públicu”, comenta Fernandi, quien ve un problema na falta de relevu xeneracional, lo mesmo de bandes como d’aficionaos.

Nunca movieron tanta xente pero’l ye casi’l mesmu

Un buen exemplu ye’l Maízu Rock d’esti añu. El día 5 de xunetu, nel festival d’Entriagu, actuarán con Dixebra, La Tarrancha y Ochobre, tres de los compañeros más avezaos d’escenariu. Otres veces también suenen nomes como Los Berrones, Skontra o Misiva, estos últimos acabantes de colgar los instrumentos. Y si’l tiempu acompaña ellí tará nel públicu la fiel turba skamera, tornando los directos del grupu nuna folixa multitudinaria, referencial yá del rock reivindicativu n’asturianu. Pero eso sí, difícil topar cares de menos de 25 años.  

“Igual a  la xente mozo ya-y interesen otres coses”, apunta Fernandi, ente les que señala propuestes como la de Rodrigo Cuevas, del que se declara fan. “Pero bueno, lleven 50 años anunciando la muerte del rock, y ehí sigue”, ironiza.

El próximu trabayu, un discu-llibru

Y ente que muerre y nun muerre, Skama prepara la publicación d’un discu-llibru que commemore los sos 20 años. Incluirá cuatro cantares nuevos (grabándose nestos momentos nos estudios Tutú de Corvera, baxo la dirección de Sergio Rodríguez) y otros cuatro reeditaos con voces collacies pa la ocasión: Ramón (Los Berrones), David (Mala Reputación), Pirri (Escuela de Odio), Raquel (Ochobre) y Humber Sierra (Misiva).  Na parte lliteraria contará con collaboraciones d’algunes de les firmes de panorama periodísicu y lliterariu n’asturianu, que preparen una riestra de relatos y artículos.

Nel nuevu trabayu colaboren les voces de Los Berrones, Mala Reputación, Misiva, Escuela de Odio y Ochobre

Amás del documentu,  hai previstes yá unes cuantes feches que se sumen al mentáu Maízu Rock: 21 de xunu n’El Regueral (Carreño), 22 de xunu na Foguera de San Xuan de la Playa La Espasa (Caravia), 6 de xunetu na Fiesta de la Oficialidá de Bimenes, o un festival n’agostu en Cóbreces (Cantabria).

Discu en directo, tovía non

¿Y el discu en directo? “Uy, pa eso hai qu’ensayar muncho. Pal 20 aniversariu tovía nun va ser, pero si nos siguimos llevando bien acabará cayendo”, vuelve ironizar Burilo. De momentu, nun hai razón pa pensar la contrario. Skama ye una formación sólida y con fuertes vínculos. Llou, Burilo y Edu (guitarra) lleven nel grupu dende la so creación, y dende’l tercer discu (Ye too mentira, 2010) caltienen la formación actual con Fonsu (baxu), Xandru (gaita), Fabián (trombón) y Fer (trompeta). Amás, peles files skameres pasaron Mox (baxu), Suárez (guitarra), Sergio (teclaos) y Josín (trompeta).

Skama La Rede

¿El secretu? Arreglase pa ensayar una vez a la selmana, nun pretender vivir de la música y marcar la distancia cola vida personal de cada miembru.

Y polo pronto al grupu pueden quita-y lo bailao. Cinco discos (l’últimu – Avante -, publicáu allá pel 2014) y una montonera de conciertos, lo mesmo n’Asturies que fuera. Alemaña, Italia, Bretaña son algunos de los llugares a los que viaxaron, sin olvidar zones como Galicia o Euskadi, onde cuenten tamién con un bon piñu de siguidores. Y de momentu too paez indicar que piensen cumplir munchos más. 

Cantante de Skama y referencia del oviedismu

El grupu goza de buena salú, física y musical, y munches ganes de siguir llenando recintos de conciertos, dignificando la música asturiana y espardiendo’l so  mensaxe solidariu y combativu. Siempre, eso sí, que-yos lo permitan los sos compromisos llaborales.

El primeru, el de Fernandi, que combina’l llabor de vocalista col so trabayu como periodista deportivu de RPA y referencia radiofónica del oviedismu. Anque diz que nunca tuvo nengún problema, nin d’un llau nin del otru. “A la radio llegué cola matrícula fichada yá”, recuerda, en referencia a la fuerte identificación política que tien como cantante del grupu. Y como músicu, buena parte de la xente que va a facese fotos con él al baxar de los escenarios confiésa-y ente rises que son del Sporting. “Bueno”, matiza. “Nel últimu conciertu en Bárzana (Quirós), había unos allí qu’empezaron a cantar Puta Oviedo, cuando me vieron llegaron. Pero dempués taben ente’l públicu pegando saltos”.

Actualidad