AMA entama esti fin de selmana el “Zarréu Fest”, una cita comuñal con y pola cultura asturiana

L-R, Dixebra, Algaire y 6 Riales van tocar nel festival que se celebra per primer vegada en Degaña.

Recomendados

Arantza Margolles
Arantza Margolles
Es historiadora.

La cultura, el padremoñu y la tradición asturiana van llegar del 28 al 30 de xunu a Zarréu (Degaña) de la manu de l’Asamblea Moza d’Asturies (AMA), organización entamadora del Zarréu Fest, una sextaferia cultural col sofitu del gobiernu del Principáu d’Asturies que va cuntar con conciertos, danza, cine y actividaes pa la reciella.

Con zona d’acampada gratuita, na primer tanda de conciertos, esti viernes 28 de xunu, les visitantes van poder esfrutar de los sones de L-R, D’Urria y Castora Herz; y de los de Dixebra, Algaire y 6 Riales el sábadu 29 de xunu. A lo llargo d’estes dos tardes van desendolcase tamién delles actividáes tradicionales y a estrenase la última película del documentalista Álex Galán.

Dixebra. Semeya: Iván G. Huerta

A mes y mediu del eventu, la organización entama yá a confirmar les actividáes pal Zarréu Fest nes sos redes sociales, con cartelos diseñáos por Alba Veláquez. El festival promete ser, más qu’eso, “un evento comuñal que apuesta pola cultura como pegollu del pueblu. Una lluz que sirva p’allumar el futuru pa esta tierra precisada de proyeutos, emburrie social, curiáu per parte de les alministraciones ya impulsu nel ánimu de la población que faiga espoxigar la zona y a los sos habitantes”, dicen dende l’Asamblea Moza d’Asturies.

Actualidad