Asturies énte l´autonomía de Llión

L’autonomía de Llión ye una oportunidá p’Asturies, pa Galicia y, sobre too, pa Llión.

Recomendados

Nicolás Bardio
Nicolás Bardio
Es politólogo, escritor y creador de juegos de rol.

Paez que Llión ta caminando, adulces, hacia la so propia autonomía. Ye dalgo de lo que sentinos contentos como ciudadanos y como asturianos. Como ciudadanos, porque l’autonomía de Llión nun ye más que’l cumplir col mandáu constitucional “La Constitución […] reconoce y garantiza el derecho a la autonomía de las nacionalidades y regiones que la integran y la solidaridad entre todas ellas” y l’exerciciu d’un derechu constitucional por parte d’otros pueblos, ye dalgo a saludar  y que mos allegra. Como asturianos, tamién tien munchu interés pa nós l’autonomía llionesa. De mano, porque compartimos una cultura y unes llingües propies al norte y al sur del cordal pa les qu’una autonomía llionesa ye una escelente noticia. Amás, como pasa con Galicia, Asturies comparte una serie d’intereses con esti territoriu frente al centralismu madrilanu del que, como capital económica castellana, llóxicamente una bona parte de Castiella ye siguidista.

Esta cultura común y estos intereses comunes faen que munches persones s’entruguen si Asturies y Llión han de caminar xuntes nesta nueva etapa. Razones históriques nun falten: Asturianos y Llioneses son históricamente dos cares d’una mesma moneda, d’un mesmu pueblu. El Reinu de Llión y el d’Asturies teníen too en común y too igual sacantes la capital y, si vamos más atrás nel tiempu, vamos atopar otru pueblu, l’ástur, dividíu en dos metaes, la Cismontana y la Tresmontana. Con too, la entruga ye: ¿interésanos agora dir xuntos?

Asturies comparte una serie d’intereses con esti territoriu frente al centralismu madrilanu

De mano, la entruga nun ye nada estraña. Exemplos de pueblos idénticos que comparten cultura y llingua pero non estructures de gobiernu hai unos cuantos nel mundu: ¿Qué diferencia a un flamencu d’un neerlandés? ¿Y a un americanu d’un inglés? ¿Y a un irlandés del Ulster d’ún de la República d’Irlanda? ¿Y a un austriacu d’un alemán? ¿Y a un balear d’un catalán? ¿Y a un gallegu d’un portugués? Toos n’orixe foron un mesmu pueblu, con una mesma cultura y una mesma llingua; pero la evolución histórica llevólos per caminos estremaos, caminos que faen interesante pensar na posibilidá de xuntase o de nun lo facer, non en función d’un pasáu, sinón d’un futuru.

Manifestación por la autonomía leonesa en la Transición.

Pienso qu’Asturies y Llión foron históricamente un mesmu pueblu, son anguaño una mesma nacionalidá d’eses que cita la constitución, pero nun-yos interesa nesti momentu dir xuntos. Y nun-yos interesa por delles razones. Vamos analizar unes poques.

Cultura y llingua:

Un primer reflexu, de cara a analizar la posible xuntanza de los dos territorios, ye’l pensar que, si compartimos cultura y llingua, seguramente al xuntanos podamos defendeles meyor. Lo cierto ye que si hai dalgo que diferencia a Asturies y Llión nel planu cultural, ye un grau distintu del procesu d’aculturación centralista al que se sometieron a dambos territorios a lo llargo de los sieglos, especialmente a lo llargo del franquismu. La vitalidá de la llingua y de los rasgos culturales propios ye muncho mayor n’Asturies qu’en Llión, al igual que pasa cola conciencia llingüística del común de los asturianos y del común de los llioneses. Anque non tolos asturianos falen n’asturianu (l’asturianu podía falalu –que ye distinto de falalo davezu–  alredor del 62% de la población) y anque la mayoría seya analfabeta nél (namás pue escribir y lleer n’asturianu un 25% de la población), lo cierto ye que la defensa de la llingua ye mayoritaria en tolos grupos de la población, sobre manera na xente mozo. Esto débese, ente otres coses, a la esposición a la escolarización y a les polítiques de normalización llingüística. En Llión, hai que lo recordar, nun hebo nin una cosa nin la otra nos últimos 40 años, colo que, amás de menos falantes, l’actitú xeneral ye muncho peor y menos tolerante hacia les nueses llingües propies. Una comunidá asturllionesa diba ser un frenu importante a esti procesu de normalización, un frenu mayor cuantes más provincies tuviere dientro.

Xeopolítica:

Nel desendolcu de los países, hai factores xeográficos que tienen una incidencia importante. Del mesmu mou que, históricamente, les ciudaes que tán al pie de los ríos suelen desendolcase más que les que nun lo tán, les qu’ocupen posiciones n’exes de desendolcu o comunicación tienen igual suerte na nuesa dómina. Ye fácil pensar nos pueblinos qu’había -llargos como ellos solos- al pie de les carreteres y nel declive que supunxo pa munchos d’ellos la construcción d’autovíes. En términos de xeopolítica xeneral, podemos ver qu’Asturies y Llión tienen una diferencia grande y fundamental: Llión nun tien mar y Asturies sí. Y eso nun tien namás una incidencia nes profesiones venceyaes al mar, como armadores, astilleros, pescadores o marineros (que nun son poques). Tienla tamién en polítiques como la de costes o nel fechu de qu’una gran cantidá de la población asturiana vive na costa y ye na costa onde ta la principal ciudá d’Asturies. La posición costera d’Asturies tien munches implicaciones, non namás económiques sinón tamién culturales (Hai un espaciu xeopolíticu que ye l’Arcu Atlánticu y que s’estructura xustamente nesi intercambiu naval a lo llargo de la hestoria).

Catedral de León.

En cuantes a les necesidaes en términos de desendolcu de tresportes, cola variante del Güerna acabada, les prioridaes d’Asturies y les de Llión dixébrense radicalmente. Pa Llión ye fundamental la Vía de la Plata, una exa que vertebra de Norte a Sur tol territoriu llionés y que contribui a facelu menos dependiente de Madrid. Nós, anque la vía de la plata nun nos venga mal, tenemos munchísimu más interés – y nesa llinia movióse yá mui acertadamente’l gobiernu d’Asturies – nel espaciu cantábricu: la Eurorrexón cantábrica con Galicia, Cantabria, Euskadi y Francia o una exa de comunicación que mos permita conectar la nuesa área metropolitana col restu d’Europa y, al empar, vertebrar el nuesu territoriu Este-Oeste. Si Llión rique vertebrar el territoriu de Norte a Sur, la nuesa necesidá ye Este-Oeste, sobre manera hacia’l suroccidente.

Demografía y política:

Nun hai qu’escaecer qu’Asturies tien un fechu políticu diferencial respeutu del restu de comunidaes autónomes de la redolada, y ye que tenemos la inmensa suerte de tener unes polítiques históricamente más progresistes y avanzaes que les de comunidaes autónomes como Galicia, Cantabria o, cómo non, un feudu del PP como ye Castiella y Llión. Cualquier introducción nos nuesos equilibrios territoriales de territorios muncho más venceyaos a la derecha puen tener consecuencies negatives nel caltenimientu del nuesu gastu sanitariu por habitante (el mayor d’España), nes redes d’escueles públiques y inclusives que ta afitando’l gobiernu, el llamáu proyeutu de “Les Escuelines” y, en xeneral, de munchos avances sociales qu’una comunidá autónoma asturllionesa podría ser un frenu. Amás, d’haber dos provincies na comunidá autónoma, les circunscripciones electorales de “les ales” desapaeceríen, pos en toles comunidaes autónomes de más d’una provincia ye siempre ésta la circunscripción electoral; una manera de que la xente de los territorios asturianos del Este y del Este tuvieren menos maneres de facese oyer.

Motivos pa la esperanza:

Con too, y anque la xuntanza nun seya nin una necesidá nin una cosa positiva poles razones qu’apunto; el fechu de que Llión entame oficialmente’l procesu pa convertise nuna comunidá autónoma más ha ser pa nós un motivu d’esperanza. Un motivu d’esperanza, fundamentalmente, porque la esistencia d’otra comunidá autónoma nel Noroeste pue permitir una mayor presión a los gobiernos centrales en temes d’infraestructures, comunicación y demografía nos que, la mayoría de les veces, queden soles Galicia y Asturies. Otru motivu d’esperanza, cómo non, porque anque la recuperación llingüística y cultural de Llión tea bastante más atrasada que la d’Asturies, ta claro que la constitución d’una comunidá autónoma va ser un reblagu importante, un cambiu de mentalidá pa cola dependencia vallisoletana que carecíen y una oportunidá pa facer munchísimes coses xuntos, uniéndonos pa lo que nos beneficia y no que precisamos tar uníos, y respetándonos nos nuesos intereses dispares. L’autonomía de Llión ye una oportunidá p’Asturies, pa Galicia y, sobre too, pa Llión. Esperemos vela más pronto que tarde.

Actualidad

2 COMENTARIOS