Suenen voces, petardos y hasta llega al cielu dalgún volador. España ta acabante
eliminar a Francia pa metese na final de la Eurocopa masculina de fútbol. La escena
produzse en ciudaes y pueblos d’Asturies, del mesmu mou que se da tamién en
Valladolid, en Madrid o en Ciudá Real. Unos meses atrás, en Llangréu, col equipu llocal
bien cerca de llegar a la promoción d’ascensu, munches d’eses persones qu’estos díes
anden nervioses con España nun miraben pal club del so conceyu. Una pena.
La política y el fútbol comparten unos cuantos aspeutos. Que, en delles ocasiones,
la pasión irracional mande perriba de la razón ye una d’eses característiques compartíes.
N’Asturies, tamién paez selo la necesidá de mirar siempre hacia fuera, de depender,
d’esperar instrucciones que vengan de cais de Madrid de les que toes y toos conocemos
el nome.
Vamos facer un repás rápidu, entamando pela estrema derecha. Tenemos un partíu
políticu nesi espaciu que nun cambia d’un territoriu a otru. En tolos parllamentos
defenden lo mesmo: menos derechos pa la mayor parte de la población, más privilexos
pa les clases favorecíes. Lo de siempre. Eso sí, ensin trabayar en branu. El gustu por folgar
nun sabemos si vien dende la capital del reinu o si lu esportaron dende equí.
Podemos siguir col PP, que-y reclama al Gobiernu d’Asturies lo mesmo que’l PP
reclama en tolos llugares del Estáu: una prueba d’accesu a la universidá única (deben
querer qu’en Canaries conozan l’Arte Asturiano y seyan espertes na Revolución del 34)
y un ataque a la Llei d’Amnistía (con toa probabilidá, el mayor problema de la xente que
vive n’Asturies). No único que se diferencien d’otros PP ye na postura sobre l’idioma: lo
que val en Galicia nun val n’Asturies. Les asturianes y asturianos somos xente de segunda
o de tercera, ensin posibilidá d’oficialidá. Tamién ye mala suerte que seya nesto no que
nun quieren asemeyase a Feijoo.
La situación de la FSA, del PSOE n’Asturies, tampoco ye muncho meyor. Los
equilibrios, cambios de nomes y movimientos estraños nel gabinete de Barbón o na
Delegación de Gobiernu formen parte de la vida cotidiana asturiana. Mientres, el fechu
diferencial del nuestru Presidente ye l’usu del asturianu como arma política. Les critiques
a Queipo por negar la oficialidá —bien merecíes— son continues, pero nun s’actúa de
forma exemplar. La nuestra llingua nun tien apenes presencia na RTPA, les previsiones
d’Educación alvierten de menos puestos ente’l profesoráu de Llingua Asturiana y Lliteratura y el propiu Gobiernu nun respeta la toponimia oficial. L’asturianu nun va tener
futuru solo con declaraciones en prensa y redes sociales, Presidente.
Pela so parte, la izquierda estatal paez tener menos problemes internos na Xunta
Xeneral que nel Congresu. Imitando a Yolanda Díaz, Convocatoria por Asturies quixo
entrar nel Gobiernu asturianu. Y, tamién imitando a Sumar, les midíes que proponen y
aprueben, anque en dellos casos útiles y necesaries, nun tán meyorando la vida de les
persones como podía esperase. Necesítase más. La frustración de tantes y tantos
trabayadores déxalo claro.
España pue ganar la Eurocopa esti domingu, sí. Pero la verdadera afición ye la
que se constrúi cada domingu nel estadiu, viendo rostros conocíos, celebrando les
victories o sufriendo coles derrotes del equipu del pueblu o de la ciudá. Presta más un gol
en Ganzábal o nel Tartiere que cualesquier trunfu de la seleición española. Tamién fai
más falta una alternativa política asturiana que proyeutos que solo saben obedecer a
Madrid o aprovechase d’un falsu asturianismu.
