¿Lleva Asturies camín de convertise nuna distopía fecha realidá? La lliteratura en llingua asturiana ta nos últimos años bien sirvida -afortunadamente- de distopíes, de ficciones que nos falen d’un futuru, supuestamente, irreal salíu del maxín de dalguna escritora o escritor mozu de los que tenemos la suerte de disfrutar. Quiciabes agora mesmu hai un autor o autora que ta trabayando nuna novela ambientada na Asturies d’una década futura na que los sos habitantes seyan namás un asonsañu de lo que foron, una solombra desdibuxada d’aquello que los caracterizaba nun pasáu llonxanu -o non tanto-. Nesa Asturies postindustrial yá nun habrá mineros, metalúrxicos, pescadores o llabriegos, sinón figurantes que faen de toes eses profesiones antaño avezaes nel país. Seremos un gran parque temáticu con un estatus de Protección Turística Especial; el nuestru antiguu patrimoniu industrial sustituyóse por atrezu de cartón-piedra, les nuestres fábriques reconvirtiéronse en grandes gastro-speed, restauranes de comida rápida a base de cachopu-splash, fabada sintética, arroz con lleche tres delicies y sidra tresxénica. El Gobiernu del Protectoráu Asturianu S. A. (privatizáu cuantayá) reparte, al traviés de la prensa local, los vales pa poder facete col traxe d’asturianín y asturianina (inspiráu nel de la Sección Femenina) que ye d’obligáu llucimientu. La Provincia d’Asturland (como se llama l’antigua Asturies) ye en realidá un gran plató na que toos y toes tenemos una función: ufiertar una visión lo más «pintoresca» posible del país, el paisaxe y el paisanaxe.
Yá a principios de los 90 Dixebra alvertíemos del peligru d’una actividá turística ensin planificación y ensin criteriu de país, el cantar «Asturalia» contenía una referencia a una de les primeres campañes potentes del Gobiernu Asturianu sobre esti asuntu, que popularizaría l’eslogan de ‘Turismu Verde’. Nel 2013 volvíemos a tratar el tema en «Nueva Economía» y nel llibretu del discu -tituláu Tiempos Modernos– nel que diba incluyida esta composición presentábemosla con estes palabres: «Los “socialistes” asturianos enfotáronse na “nueva economía asturiana” como alternativa a la destrucción de miles de puestos de trabayu na industria. Abrazaron les idees neolliberales y apostaron por subvencionar a les empreses, regalar suelu industrial o invertir dineru públicu en crear “polos culturales” capaces a atrayer turismu». La lletra contenía estrofes como: «Turismu d’altu standing, mui baratu y bon serviciu / Un país de camareros, dependientes del Eroski, vixilantes de la ORA o gondoleros dalgún día / Esa ye la nueva economía»; la penúltima frase taba inspirada nunes declaraciones de la daquella alcaldesa, Pilar Varela, nes que dicía que quería «facer d’Avilés la Venecia del norte d’España».
Dende bien pronto, los sectores más concienciaos, vienen alvirtiendo n’Asturies de los peligros qu’acarreta promocionar un sector turísticu ensin regulación nin control, condicionáu namás polos intereses d’un determináu lobby. Les situaciones de sobreesplotación, esfarrape medioambiental, inflación económica, xentrificación, precariedá llaboral, economía somorguiada o dificultá habitacional, yá empiecen a ser avezaos nel nuestru país, con zones mui tensionaes nes que la vida de la población llocal vese alteriada de manera bultable. Declaraciones como les de Barbón calificando a Asturies de «refugio climático» son mui poco afortunaes y innecesaries dafechu; ocurrencies como les del Ayuntamientu d’Avilés de valorar seriamente’l cambiu d’horariu de carga y descarga nel cascu antiguu, porque los vehículos «estropien» les semeyes de los turistes, son prueba de la paranoia que padecemos anguaño con esti asuntu.
El turismu nun puede convertise nel sector central de la economía asturiana, sinón qu’hai que lo entender como dalgo complementariu, aprovechando la so vertiente económica creadora de riqueza y buscando un equilibriu que llogre maximizar los aspectos positivos y minimizar los negativos. Asturies necesita pensar el so modelu turísticu basándose na sustentabilidá y na diversificación, que seya respetuosu coles comunidaes llocales receptores, qu’ameyore les infraestructures y xenere emplegu estable y non precariu. Ye imprescindible decidir qué turismu queremos: ún realmente sostenible y compatible col mediu, caracterizáu pola escelencia y la profesionalización del sector, o ún agresivu colos nuestros recursos naturales y patrimoniales. Mesmo la realidá actual como la percepción popular apremien a tomar midíes y abrir esti debate. La ecuación ye cenciella: el territoriu qu’ufierta la meyor esperiencia a los visitantes ye aquel que meyor cuida a los sos habitantes. L’equilibriu ye posible, pero pa ello hai que cambiar el modelu y los sos oxetivos. Más nun ye meyor, falamos d’un modelu que cuide de los asturianos y les asturianes y, al empar, cuide tamién de les persones que nos visiten. La creación d’una tasa turística faise yá imprescindible; ye innegable que’l turismu de mases aumenta les necesidaes financieres de los conceyos que lo soporten, condicionando la so suficiencia financiera, al tener que afrontales coles fontes de financiación habituales. Ye necesario que los conceyos qu’asina lo quieran, puedan contar con mayores ingresos pa facer frente a la buelga medioambiental del turismu, teniendo en cuenta la situación d’emerxencia climática na que nos alcontramos.
La medría del turismu n’Asturies nos últimos años, y los efectos que ta xenerando, muestren a les clares la pertinencia de poner el debate enriba de la mesa y la necesidá d’una reflexón compartida ente tolos sectores involucraos, l’alministración y la ciudadanía. Lo asocedío apocayá cola valla puesta pola organización Aína en Villaviciosa nun va precisamente nesti sen, mostrando que pa dalgunos responsables políticos trátase d’una cuestión intocable, nuna actitú ciega y intolerante. Nun se trata pa nada de turismofobia, falamos de l’Asturies que queremos y que vamos dexar a les próximes xeneraciones.
