L’escritor bualés Miguel Rodríguez Monteavaro ta acabante de ganar la XXX edición del Premiu Xuan María Acebal de poesía n’asturianu col poemariu ‘Al disparar nunca parte’. El so testu, destaca’l xuráu, ye “una biografía emocional onde relluma la so esperimentación formal, la so ambición y l’unidá temática y estilística”.
El certame, convocáu cada añu pola Conseyería de Cultura, Política Llingüística y Deporte pa fomentar la creación lliteraria en llingua asturiana, ta dirixíu a obres inédites que tengan un númberu de versos superior a los 500, y ta dotáu con 6.000 euros.
Rodríguez Monteavaro (Bual, 1990) escribe n’eonaviego y n’asturianu, informa’l Gobiernu rexonal, n’una nota na qu’añede que publicó cinco llibros de poesía: ‘Trenta razóis pra nun medrar’ (2020), ‘Todos os tristes de mayo’ (2013), ‘Poemas pr’amantes y paquidermos’ (2013), ‘Superpoderes’ (2020) y ‘Oi, que dice mamá que volvas’ (2023).
Amás, foi ganador de dellos premios lliterarios, ente ellos el XIX Premiu Xeira de Narracióis Curtias, el XIX Premiu de Poesía Padre Galo, l’Asturias Joven de Poesía o l’I Premiu Ría del Eo de Poesía.
D’otra miente, en 2021 llogró la beca de Residencia Asturies n’A Coruña, y en 2023 la de Residencia Artes Escéniques de LABoral Centru d’Arte y Creación Industrial.
