Hola Adrián,
Como sabes tenemos milenta diferencies ideolóxiques, pero ayeri, viendo les noticies na televisión pública asturiana mentantu xintaba, oyite dicir unes pallabres coles que toi d’alcuerdu dafechu. Dempués del cuartu accidente llaboral mortal n’Asturies nun mes, declarabes qu’hai que reforzar l’Istitutu Asturianu de Prevención de Riesgos Llaborales , y tamién aconseyabes a los y les trabayadores que se plantaren cuando-yos mandaren dalgo que punxera en peligru les sos vides.
Bien, entamamos bien, pero unes declaraciones na prensa o na televisión nun son más qu’eso, unes declaraciones que puen sonar perbien pero que nun valen pa nada si nun s’acompanguen de fechos, y sabes que te lo diz dalguien que ye más de fechos que de pallabres.
Conoces tamién que soi trabayador d’EBHI, la única terminal portuaria pública de tol Estáu y que tien como accionista mayoritariu a l’Autoridá Portuaria de Xixón. Doi por fecho que tu y el to gobiernu en xeneral tais bien enteraos de tolo qu’asocede nel día a día d’EBHI, porque ente les vueses competencies ta la de nomar al Presidente de l’Autoridá Portuaria de Xixón, Laureano Lourido Artime, que tamién ye Presidente d’EBHI y que ye quien noma a la Direutora Xerente d’EBHI, Lucia Herrero Batalla. Amás, el gobiernu que presides tien tamién la competencia de nomar a la mayoría absoluta del Conseyu d’Alministración de la empresa. Ente otros miembros del to partíu, nesi Conseyu d’Alministración d’EBHI tan cargos importantes como Isaac Pola, Viceconseyeru d’Industria o Enrique Fernandez, l’anterior Conseyeru d’Industria y presidente d’Hunosa anguañu.
De xuru que tanto Laureano, como Lucía, como los tos conseyeros n’EBHI te cuntaríen que n’EBHI yá fae tiempu que mos plantamos cuando la empresa mos quería obligar a incumplir alcuerdos de descarga y seguridá que foron roblaos por Empresa y Comité nel SASEC, alcuerdos onde ente otres coses queda definío cuántos trabayadores tien qu’haber na bodega del barcu pa trabayar con seguridá. Y toi convencíu tamién que te cuntaríen qu’esos compañeros que se plantaron por querer cumplir los protocolos de seguridá foron sancionaos con díes d’emplegu y sueldu. Lo mesmo que fueron sancionaos con emplegu y sueldu otros compañeros acusaos de baxu rendimientu por cumplir puntu por puntu col protocolu de descarga, protocolu que foi fechu pola empresa. Por cierto, tolos compañeros sancionaos son afiliaos de CSI como yá sabras.
Tamién te cuntaríen Presidente, Direutora y Conseyeros que fae un tiempu la empresa modificó esi protocolu de descarga pa que dientro de les bodegues tengamos que trabayar en parte del radiu d’aición de les grues pórticu. Sabrás tamién de la so boca que dende entós dende la Sección Sindical de CSI tamos intentando negociar cola empresa que retire esi cambéu y volver a trabayar col anterior protocolu. Asina nun tendríemos que trabayar col riesgu de qu’una de les cuyares del porticu que pesa 50 tonelaes cargada mos pase penriba, o que pola inercia de la mesma mos caigan delles de les tonelaes de material que queden pegaes a la mesma cuanda vuelve a bodega vacía, o que dalgún de los compañeros maquinistes que manexen los pórticos puea tener un fallu humanu y mos pegue y mos mate con ella. Tamién sabrás por ellos y ella que punximos denuncia por too esto a Inspección de Trabayu y tamién al Istitutu Asturianu de Prevención de Riesgos Llaborales, al que tamién pidimos un informe sobre’l protocolu de descarga.
Por too esto toi contentu d’escuchar les tos pallabres, porque asina, cuando mos volvamos a plantar porque la EBHI quiera qu’incumplamos protolos de descarga y seguridá yá nun tendremos castigos. Doi por fecho la to coherencia ente les pallabres diches y los fechos futuros nuna empresa que políticamente depende de ti y del to gobiernu. Entiendo que los tos subordinaos, Laureano y Lucía, Lucía y Laureano, tendrán perclares les tos instrucciones pa qu’esto nun asoceda más, y de ser asina, nun dubio que los dos sedrán cesaos por ti y que’l gobiernu que presides mos reingresará los salarios perdíos por eses sanciones inxustes.
Y contentu tamién pol to comentariu sobre’l Istitutu Asturianu de Prevención de Riesgos Llaborales. Ta claro que necesiten muncho más sofitu y muncho más capital humanu, y ye qu’en tou esti tiempu nun fueron quien a damos una rempuesta concreta a la nuesa denuncia. Y mira que lo intentamos, pero de momentu nun somos quien a que se moyen diciendo si podemos tar nel radiu d’aición d’una carga de 50 tonelaes.
Y yá que tamos Adrián, supongo que tarás aburríu de tolo que te van cuntando esos subordinaos tuyos de los que pasa n’EBHI.
- D’esos cientos de miles d’euros pagaos en multes porque la dirección d’EBHI incumple una y otra vegada los protocolos mediambientales qu’ordena una de les tos conseyeríes. Anque bono, nesti casu les perres nun faen más que pasar d’una empresa pública a una alministración mentantu siguen les nubes de polvu y los incendios de les piles decarbón.
- D’esos millones d’euros, paezme que cerca de 53, qu’una empresa Suiza reclama a EBHI porque polo visto de 160.000 tonelaes de carbón que descargó desapaecieron por arte de maxia 115.000. Sabrás de cómo va’l xuiciu penal por estafa nel que tan investigaos (pallabra que sustituyó oficalmente a imputaos nun intentu de dulcificar esa posible culpabilidá) Lucía, Pepe del Arco, Direutor de El Musel, y Amalio Álvarez Paredes, el que fuera Direutor d’operaciones d’EBHI per aquellos años. Y tamién del xuiciu civil pol que reclamen los 53 miyones, lo mesmo que yá te cuntaríen esa sentencia de lo mercantil que diz que la empresa suiza TELF ye la dueña de les 160.000 tonelaes.
Por cierto Adrián, nun te paez raro que la defensa de la EBHI amás de l’abogacía del Estáu la lleve un despachu priváu. Eso pagaralo del so bolsu Lucía y compañía, ¿non?
- D’esos cientos de miles d’euros, dicen que sobre 300.000 qu’esti añu se llevaron dos altos directivos, Amalio l’investigáu por estafa, Lucio Monteagudo Arcas, Direutor de Recursos Humanos, y el xefe de compres, que casualidaes de la vida, ye hermanu de Sergio Noval Herrero, l’abogáu d’EBHI y miembru de l’alta direición tamién, como indemnización por unos despidos oxetivos.
Diríente Laureano, Lucía, Isaac, Enrique y demás que Lucio y l’hermanu de Sergio Noval teníen yá más de los 65 años que polos años cotizaos yera la so edá de xubilación, ¿non? Y qu’Amalio, l’investigáu por estafa, anque nun llegaba por poco a los 65 como tenía coeficiente reductor del mar tamién taba a piques de tar na edá de xubilación. Asina y too, los tres colaron con un añu brutu de salariu como indemnización pol despidu oxetivu, lo normal nestos casos Adri, paecío pasó cuando metieron nun ERE a José Manuel Sariego con 66 años. ¿Alcuérdeste de Sariego, eh?, sí home esi, el que fora Secretariu Xeneral de l’Agrupación Socialista de Xixón y que metiera na EBHI’l to amigu Javier Fernández como xubilación dorada.
Cuntaríente tamién que dende la Sección Sindical de CSI tuvimos meses entrugando por rexistru a Lucía, la investigada por estafa, pa que mos informara de cómo salieron de la empresa los tres altos cargos, pero a la fin tuvimos que dir al Portal de Tresparencia del Estáu pa que mos confirmaren que foi con un despidu oxetivu, y ye que Lucía, la investigada por estafa debía tar mui ocupada intentando atopar 115.000 tonelaes de carbón y nun tenía tiempu pa contestamos.
Eso sí, yá sabes que los de CSI tenémoslo denunciao al IGAE, a Inspección, y que lo fadremos tamién a la Fiscalía Anticorrupción. Por si resultes que nun ye mui llegal la cosa.
- Y siguiríen aburriéndote coles hestories de tolos recortes que Lucía, la investigada por estafa, Amalio, l’investigáu por estafa y el que marchó con un montón de perres pa xubilase a los cuatro díes, Lució, el que tamién marchó con una anualidá bruta pa xubilase al día siguiente, y Sergio, l’hermanu del otru “despedíu”, fueron aplicando a la plantiya nestos tiempos.
- Primero quitáronmos la cesta de Navidá, porque sí. Pero la Sección Sindical de CSI demando y ganó, y volvemos a tener cesta.
- Dempués quitáronmos un día llaborable nel disfrute les vacaciones, porque sí. Pero la Sección Sindical de la CSI demandó y ganó, y volvemos a tener esi día de vacaciones.
- Darréu quitáronmos descansos cuando trabayábemos de nueche l’últimu día del ciclu llaboral, porque sí. Pero la Sección Sindical de CSI demandó y ganó, y volvemos a tener esos descansos.
- Tamién mos quitaron dos díes de llibre disposición que teníemos nel Conveniu, porque sí. Pero la Sección Sindical de CSI demandó y ganó, y a falta de la execución de sentencia volveremos a tenelos.
Por cierto Adrián, contaríate Lucía, la investigada por estafa, que por sus ovaríos ñegose a cumplir les sentencies y tuvimos que reclamar les execuciones de sentencia. Supongo que sedrá la forma del PSOE de xestionar una empresa pública, nun sé, tu me dirás.
Toi convencíu de que sabrás de primera mano too esto y que nun facía falta que dende CSI te mandáremos a Presidencia y a Industria escritos pa informate d’estes coses y pidite qu’igual taba bien cesar a Lucia, la investigada por estafa y a Laureano, que dicen los dueños del carbón desapaecíu que lo acabará tando.
Porque nun me dirás que nos conceyos del Conseyu d’Alministración d’EBHI Lucía, la investigada por estafa, y Laureano nun despliquen toes estes coses a los conseyeros del gobiernu que presides. Y si ye asina nun me dirás qu’esos conseyeros nun piden desplicaciones d’estos temes polémicos. Porque los tos conseyeros dirán a informase, ¿non? ¿O a qué van entós? ¿A nada? ¿A escuchar como Laureano-yos cuenta lo bien que va too?
Adrián, aspero que d’una vegada dexes de mirar pa otru llau n’EBHI y te responsabilices de lo que ta pasando nesta empresa pública de la que yes responsable políticu. Dende l’añu 2020 la dirección d’EBHI nun dexa res qu’envidiar a la pior patronal privada que pueas atopar. Tamos nel periodu de mayor problemática y conflictividá interna de tola historia de la terminal. Tenemos una Direutora autoritaria incapaz de llevar a esta empresa y a la so plantiya. Nunca hubo tantes convocatories de paros, tantes sanciones, tantes demandes a Inspección , Maxistratura o a otros organismos como nestos años. Nunca tuvimos una plantiya tan desmotivada como agora, y nunca hubo tantos escándalos como anguañu.
Yá valió Adrián, yá valio. Una empresa pública tendría de ser exemplar, y EBHI nin muncho menos lo ye. Sé coherente coles tos pallabres y fae daqué, non como nel 2020 cuando t’escondiste cuando cuatro compañeros tuvieron 37 díes, sí, 37 díes en fuelga de fame porque Laureano y Lucia imcumplieron l’acuerdu de la tasa de reposición pola que 7 compañeros pasaben de temporales a indefiníos.
A ver si agora sí la das y ceses a Laureano, a Lucía, a los miembros del Conseyu d’Alministración que dependen de ti. A ver si pides entrar na acusación del presuntu casu de corrupción pola desaparición del carbón, a ver si ordenes una comisión d’investigación sobre esti grávisimu tema na Xunta, a ver si obligues a EBHI y a l’Autoridá Portuaria a cumplir la normativa medioambiental, a ver si pides desplicaciones , responsabilidaes y denuncies la salida inmoral de los tres altos cargos. A ver si yes coherente y ordenes que se trabaye con seguridá, porque de nun ser asina pue que col tiempu tengamos dalgún muertu. Nun podrás dicir que nun tas avisáu.
