El problema de la xentrificación y la conversión de les ciudáes en focos pal turismo va ser el prósimu enfoque de les xornáes “Vivir y viaxar, quién da más. Los impactos del turismo n’Asturies”, entamada pola Asociación Grana, y que va desendolcase na Casa’l Chino, en Cimavilla (Xixón) los próximos viernes 18 y sábado 19 d’ochobre.
Les xornáes van inaugurase cola charra, a les 19 hores, Vivir en Marina d’Or, a cargu del periodista Jorge Dioni López, especialista nel tema y autor d’El malestar de las ciudades. Siguirán el sábadu, cola intervención, a les 10.30 hores, del xeógrafu Alfonso Suárez Rodríguez, con Asturies ¿Paraísu turísticu?
Sedrá la espita pa pasar a falar al casu asturianu, onde nel pasáu branu esperimentóse un auxe ensin precedentes de les viviendes d’usu turísticu (VUT), una circunstancia que pon en riesgo la sostenibilidá de barrios como’l de Cimavilla, acoyedor de les xornáes. Sobre esti tema, a les 12.30 hores, va debatise na mesa redonda Turismu n’Asturies, oportunidá, retu o amenaza. Nella van tar Lara Martínez, viceconseyera de Turismu; Manuel Cañete, presidente de la Federación d’Asociaciones Vecinales (FAV) de Xixón, y el ya mentáu Jorge Dioni López.
La entrada a les xornáes ye llibre y gratuita.
