Cuatro artistes asturianos compiten esti viernes al decimosestu Premiu Camaretá al Meyor Cantar, el gallardón más prestixosu pa la música n’asturianu, qu’actualmente ostenta Vero Rubio, ganadora de la edición pasada con ‘Dixo miou padre’. Esti cantar va interpretase tamién na gala que, a partir de les 19 hores, va cellebrase nel Teatru de la Llaboral, en Xixón, amás de ser televisáu pola TPA.
Nesta edición, les propuestes van dende’l folk hasta la música electrónica, pasando pola música lírica. La Bonturné, compuesta por Merce Santos, David Varela, Santi Caleya y David Casillas, preséntase con una mui particular versión de la mitoloxía griega en ritmu bal-folk Odisea la nuí, pala que recurren a múltiples instrumentos tradicionales como la zanfona o’l curdión diatónicu. Bien distinta ye la elleición de l’artista multidisciplinar Susana Gudín y la so Contigo, un cantar en gallego asturianu nel que la voz de la cantante va acompañada de les notes del pianu que recuerden a una nueche de jazz club.
Combinar lo tradicional colo electrónicu ye la propuesta de Ferla Megia, l’alter ego del sierense Fernando Labrador, que nun tién mieu a la mezcolanza y que, nel videoclip del cantar, ye l’encargáu de toles xeres musicales: la instrumental y la vocal. Finalmente, Héctor Braga, actual Premiu Máximu Fuertes Acevedo d’ensayu col ensayu sobro l’asturianada Nel cantu la memoria, presentará Llobatu, una lleenda cantada y musicada con instrumentos tradicionales, siguiendo la llínea del consolidáu artista y estudiosu, ensin renunciar a la modernidá.
Ellos foron los elexíos, nel pasáu mes de xunu, por un xuráu compuestu por Antón García, director xeneral de Política Llingüística, la cantante Alicia Álvarez, el periodista y responsable de musicaasturiana.com Xicu Ariza, la técnica de normalización llingüística Penélope Miranda, la gaitera Andrea Joglar y la profesora d’Emma Posada.
La entrada pa la gala ye llibre y de baldre, y puede retirase equí.
