Una xuntanza pola salú mental y cola calor del Auditoriu Teodoro Cuesta, en Mieres, va tener llugar esti vienres 15 de payare. La Gala Solidaria pola Salú Mental, que va ser conducida pola comunicadora Arantxa Nieto a partir de les 19:30 hores, ye la nueva iniciativa pa visibilizar la salú mental del activista Banksy Astur. Col sofitu d’Abrazos Verdes, la Gala Solidaria va tar destinada a algamar beneficios con destín a asociaciones y coleutivos de persones vulnerables.
En collaboración cola conceyalía de cultura del Ayuntamientu de Mieres, la gala va cuntar coles actuaciones de Perro Blanco Blues, Un de Grao y Seis Riales, asina como con un espectáculo de comedia improvisada pola compañía Trivilorio Impro. Les entráes, a un preciu de 10 euros, pueden adquirise n’Avilés (na clínica Paula Marín); en Xixón (llibrería la Revoltosa); Mieres (llibrería La Llocura); Uviéu (llibrería Matadero Uno), La Pola (sidrería Serendipia) y en Llangréu (boutique Espiral).
Banksy Astur, quien yá organizare campañes a favor de la salú mental por mediu de la venta de calendarios solidarios otros años, quier agora, cola recaudación de la Gala Solidaria, poner en marcha dos proyectos al rodiu d’esti tema. Ún d’ellos, d’atención especializada al duelu por suicidiu, que va cuntar con terapies gratuites, grupales o individualizáes; y l’otru, d’educación psicosocial pa families acompañantes de víctimes de crisis autolítiques o d’intentos de suicidiu. Baxo’l nome de Recursos para CuidarT, estes actividáes sedrán organizáes pola psicóloga Angélica Rodríguez.
