Izquierda Asturiana, integrante de Convocatoria por Asturies, saluda el Congresu Mundial de Cultura Asturiana, que va tener llugar nel Edificiu Históricu de la Universidá d’Uviéu, del 4 al 7 de febreru. Para Faustino Zapico “ye mui importante que se faga un congresu como esti porque la nuesa cultura ta viviendo un momentu d’espansión y de revalorización, tamién d’aceptación, pasaes les dómines escures onde l’estigma de tolo que tuviere que ver colo nuestro taba más activo”.
“Los nuestros raigaños, a los que dacuando dimos o nos ficieron dar el llombu, hasta llegar a esta dómina onde, en cuenta de ser estigmes colos que s’arreniega de lo propio, yá s’acolumbren, gracies a los años de trabayu de tanta xente, como lo contrario, como blimes coles que cambiar el presente y construyir el futuru d’Asturies como pueblu, como colectividá soberana autopercibida, distinguible ya identificable. Una más de les cultures vives y prósperes del mundu” señaló el secretariu xeneral d’Izquierda Asturiana.
Faustino Zapico fae tamién un llamáu a la “movilización del asturianismu políticu d’izquierdes, al qu’empobinamos dende les nuestres files a facer un exerciciu de resituación, col enfotu de poner acabu a esta etapa de desarticulación y ser quien apurrir a la sociedá asturiana espacios políticos que conviertan la llucha cultural en ferramientes útiles, pa llevar la nuestra identidá a una etapa nueva, una dómina arguyosa de crecimientu y de llogros colectivos que namás se pue algamar col arguyu de la xente que se reconoz a sí mesma ensin complexos”.
Pa finalizar, el portavoz republicanu asturianista declaró que “ la xente d’Izquierda Asturiana tien ganes de qu’entame esti congresu. Dalgún de los nuestros camarades faen ponencies nél y otros vamos asistir como participantes. Ye mui importante, nun momentu clave como esti, que tantes persones confluyan amosando’l so impagable llabor d’investigación, pues son representantes de lo meyor d’Asturies y preba de que’l país tien futuru si hai voluntá pa ello”.
