Francia lleva la fama, pero Italia carda la llana. Y ye que si’l país vecín siempre se punxo como modelu de centralismu y homoxeneización cultural, Italia, un estáu fundáu na década de 1870 baxo la inspiración del modelu francés, nun quedó atrás nes polítiques d’arrequexamientu de la so gran diversidá llingüística. Por eso, nel pasáu Festival de San Remo, el raperu Emanuele Palumbo, tamién conocíu como Geolier, provocó sorpresa y controversia al actuar nel templu de la música pop italiana con un cantar na so llingua napolitana.
El napolitanu nun ye una llingua oficial nes instituciones, pero sí ta bien viva nos barrios d’esti antiguu reinu español. Tamién na so puxante escena de rap y trap, cuasi toa ella cantada nesti idioma que munchos napolitanos llamen dialectu ensin nenguna intención peyorativa.
Música urbana, espontánea y de cai, el rap, nacíu a finales de los años 60 nos barrios afroamericanos de los EE.XX., foi adecuándose a lo llargo y ancho del mundu a les diferentes realidaes culturales y llingüístiques, convirtiéndose munches veces en portavoz de los movimientos de resistencia cultural. N’América Llatina podemos alcontrar rap en cásique toles llingües indíxenes, igual que n’África hai raperos en lingala, kikongo, dioula, twi, pidgin, yoruba y otros idiomes previos a la colonización europea.
Tamién n’Europa existe una producción abondosa de rap en llingües minorizaes y llingües ensin estáu, conceptos non siempre coincidentes. Dios Ke te Krew, Chill Mafia, The Tyets o K-Nalón son dellos exemplos d’usu del gallegu, l’euskera, el catalán o l’asturianu.
N’Irlanda, onde l’inglés ye la llingua hexemónica a dambos llaos de la frontera, Kneecap, enfótense en cantar en gaélicu irlandés, una llingua que malapenes falen unes 80.000 persones, 6.000 d’elles nel norte de la islla. La exitosa y polémica formación protagoniza la comedia del mesmu títulu de Rich Peppiatt, y que foi comparada col realismu «puercu» de Trainspotting.
Nacíos en Belfast, Kneecap canta sobre les drogues, los traficantes, la vida na cai, l’IRA, los paramilitares y el conflictu ente republicanos y unionistes. Les sos lletres foron motivu de controversia política y censura na radio. La reivindicación d’una llingua que pesie a contar con un Estáu nel sur de la islla nun llogró equilibrase col inglés, idioma de l’antigua metrópoli, ye otru de los temes d’esta banda formada nel 2017 y activa hasta güei.
La Mejor Debut nos premios BAFTA y seleccionada por Irlanda a los Oscar, esti vienres Kneecap va proyectase nos Cines Embajadores Foncalada (20:00 h.) nuna actividá entamada pol Grupu Parllamentariu Mistu Covadonga Tomé pa celebrar el Día Internacional de la Llingua Materna.
Penélope Miranda, Xune Elipe, Miguel Fernandi y Elisabeth Montequín falarán después.
