Trece organizaciones sindicales suscribieron un manifiestu nel que reclamen a los partíos políticos que “nun dexen pasar la oportunidá” de dir hacia una reforma del Estatutu d’Autonomía que garantice la oficialidá del asturianu y del eonaviego.
El documentu foi lleíu esti xueves pola escritora y periodista Ánxeles Caso nun actu que se celebró nos Cines de Foncalada d’Uviéu cola representación de toles entidaes firmantes, qu’esibieron una unidá sindical que va siguir nos prósimos meses pa acabar colo que consideren “una escepcionalidá constitucional que dura más de 40 años”.
Esta iniciativa produzse dempués de que’l pasáu mes de febreru’l plenu de la Xunta Xeneral aprobara la toma en consideración de la proposición promovida por PSOE, Convocatoria per Asturies-IX y la diputada del grupu mistu Covadonga Tomé pa entamar una reforma del Estatutu d’Autonomía qu’introduza la oficialidá del asturianu y del eonaviego, que cuntó col refugu de PP, Vox y el representante de Foro, Adrián Pumares.
Tres el vistu bonu a la toma en consideración, la reforma estatutaria entamó la so tramitación parlamentaria, pero ensin posibilidá de ser aprobada porque, pa ello, necesítase una mayoría reforzada de 27 de los 45 diputaos que formen l’hemiciclu.
Los sindicatos firmantes –CCOO, UGT, CT, CGT Asturies, CNT Asturies y Llión, CSI, ISA, RCT, SAI, Sindicatu Avanza, SOMA-FITG-UGT, SUATEA y USO– reclamen con “enerxía y rotundidá” que s’algame un alcuerdu nel parlamentu asturianu pa dar la másima protección a les llingües asturianes, una “fonte de desenvolvimientu social, cultural y económicu”.
“Nun tien sentíu y ye inconcebible en términos democráticos que lo que n’otros territorios billingües concedióse fai enforma tiempu se-y niegue a Asturies”, reza’l manifiestu.
Poro, consideren “ineludible” qu’agora que se va abrir “una nueva oportunidá” nel parlamentu asturianu, les fuercies polítiques, “al marxe de les lexítimes diferencies ideolóxiques”, algamen un alcuerdu definitivu” para “asegurar un futuru digno y constitucional” pa l’asturianu y el eonaviego.
El testu destaca que nos territorios onde les llingües propies declaráronse oficiales, estes potencien un desendolcu económicu que xenera “riqueza, dinamismu social y puestos de trabayu d’alta cualificación” y que s’asitia, en munchos casos, ente’l “2,5 y 3 per cientu del PIB d’eses comunidaes”.
El secretariu xeneral de CCOO d’Asturies, José Manuel Zapico, destacó que la unidá sindical esibida nel actu va siguir pa reivindicar la oficialidá.
