Son les 23.44h del sábadu 21 de xunu de 2025 y el Tartiere, Uviéu entero y media Asturies blinca ente glayíos y abrazos d’allegría. L’equipu de la capital acaba d’algamar un ascensu históricu a primera división y, en toles villes y pueblos hai folixa. Tamién, muncha expectación fuera del país, que contempla cómo una historia de guion cinematográficu acaba, a la fin y dempués de 24 años, increyiblemente bien. Delles hores dempués, el domingu 22 pela tarde, l’alcalde de la ciudá recibe una xiblada nel balcón de la casa conceyu que lu obliga a abandonalu ensin poder falar, dempués d’intentalo trés vegaes.
¿Qué pudo pasar equí? Nun foi fácil, non. La historia recién del Real Oviedo ye la d’un equipu desfechu poles élites y llevantáu poles clases populares dende lo más fondero del fútbol: la tercera división. Descensos deportivos, descensos alministrativos, mirar a la desapaición a la cara y salvase col puxu de tola xente, que punxo 2 millones d’€ “a güevu” pa mercar aiciones. Ente los años 2001 y 2015 la historia del Uviéu cambió: pasó de ser un equipu históricu, de tola vida, a un equipu fechu a golpe de desgracia y rempuesta en forma de movilización popular. Aquel éxitu que lu mantendría vivu derivaría na compra del club por capital mexicanu y unes inversiones que permitieron tornar al fútbol profesional ensin que s’escaeciere nin un día’l procesu que nos truxo hasta equí: porque hasta la entrada del home más ricu del mundu nel accionariáu ye al traviés d’una anécdota en redes na que lo popular tien muncho que ver.
Pero tornemos atrás: el papel del alcalde uvieín, el célebre Gabino de Lorenzo, foi’l d’un actor involuntariu y necesariu pa un procesu qu’involucró a la xente contra les instituciones polítiques de la ciudá y del país. Col equipu na UVI, formando plantiya pa salir en tercera, entama una operación na que s’intenta imponer un nuevu “Oviedo”, sobre la base d’un equipu de barriu de tola vida: l’Astur, al que-y cambien el nome a “Oviedo ACF”. El resultáu foi llaceriosu y conocíu: xeneró una rempuesta masiva que fexo que la xente s’irguiere. Pero l’acefismu nun foi namás comandáu por Gabino cola complicidá y el silenciu de munchu del texíu empresarial y hosteleru de la ciudá…
“Como presidente del Centro Asturiano, Canteli sal en toles semeyes del crimen”
Alfredo Canteli Fernández. Quier la casualidá que les iniciales formen l’acrónimu ACF, “postnome” del enxendru que pretendía suplantar a un R.Oviedo vivu, en tercera. L’alcalde vixente foi parte activa d’aquella operación. Como presidente del Centro Asturiano, club priváu de les clases más acomodaes de la ciudá, sal en toles semeyes del crimen. Canteli declararía: “todos sentimos que el Oviedo vaya a morir pero hay que mirar al futuro”. Tovía l’otru día, en 2022 ratificaríase nes sos posiciones antioviedistes: “no me arrepiento en absoluto de haber apoyado al Oviedo ACF”. Al tiempu, nel so mandatu vixente, apostaría por siguir dexando de llau al equipu, incumpliendo les sos promeses electorales: nin ciudá deportiva, nin accesos nuevos a un nuevu Tartiere que’l Gabinismu diseñó, executó y llueu cuidó mal. Por contra, el so apueste foi per otru llau: ceder instalaciones pa una Fundación del Real Madrid en San Cloyo perxudicando a la cantera del club, desaniciar el chiringuitu de l’Asociación de Peñes (APARO) en San Mateo, nun dar salida a los terrenos d’un ruinosu hípicu gabinista de L’Asturcón, fracasar nel intentu de llevar les nueves instalaciones a Llatores, intentar colar al club unos terrenos contaminaos en La Manxoya de propiedá de les familes millonaries -atención- Cosmen (ALSA) y Lago y, llueu, amenazar al Real Oviedo con consecuencies si finalmente l’equipu facía la so ciudá deportiva fuera del conceyu…
Y, con estes blimes, Alfredo Canteli mángase nun balcón esperando (¿?) recibir aplausos del pueblu…y lo que recibe son xiblíos y glayíos: “Fuera, fuera”, “Oviedo somos nosotros”, “Canteli j*dete” cuando plantega tresmitir una estrambótica propuesta de renomar a la Plaza d’América como “Plaza de América – Santiago Cazorla”. Nin l’intentu d’esti últimu nin d’un presidente -Martín Peláez- que yá debiere saber per qué llau sopla l’aire na ciudá nin del staff de comunicación del club son quién a permitir un discursu que nadie quería sentir más que l’alcalde, que vive mui penriba de les sos capacidaes analítiques, discursives y polítiques dende que’l PP lu escoyere como candidatu.
Estos fechos evidencien un campu de xuegu nuevu: cola vuelta a la cumal del fútbol del club, hai una llucha de rellatu. D’una banda, les vivencies de l’afición -seya d’Uviéu o de cualquier requexu d’Asturies-, que persabe que si nun ye por enfrentase al establishment uvieín, autonómicu -un arecismu irredentu- y a los sos medios de comunicación güei nun podríemos tar falando de la esistencia d’un equipu que se llame Real Oviedo SAD. D’otra banda, el rellatu de les clases altes, especialmente na ciudá: que va facer tolo posible por controlar y cooptar la redolada social y económica d’una institución que lleva’l nome del so pueblu agora que va tratase con élites empresariales de tol estáu.
Yá s’entamen a lleer y a sentir discursos revisionistes, aprovechando la folona de decenes de miles de persones peles cais, celebrando l’exitu. Son mensaxes que llamen a ver el procesu que nos truxo hasta equí como dalgo a escaecer, que falen de reencuentru y de non politización de lo que pasó…como si pudiere entendese a esti club ensin l’accionariáu popular, ensin el #SOSRealOviedo de 2012, ensin Manolo Lafuente, ensin les manifestaciones contra l’ayuntamientu, ensin l’intentu de suplantación, ensin el papel del PP d’Uviéu.
El ROCF, como club, forma parte del alma de la ciudá y d’una parte mui significativa de los asturianos y asturianes. Tien na so historia recién exemplos de trabayu collaborativu y solidariu, a comuña, onde s’espeya lo meyor de la sociedá. Quéda-y agora a la so masa social el trabayu de caltener la memoria viva pa que nun vuelva a pasar lo mesmo. Por eso ye tan importante’l papel de colectivos como “Les Sacaveres” o “RO Culture Fans”, que faen alcordanza de lo que tien pasao nel ecosistema futboleru y social azul en toos estos años. Fadría mui bien el club en siguir semando reconocencia, nesi sen, al traviés de la Fundación y el Conseyu d’Historia, porque fai falta.
Nuna ciudá avieyada, lo que más chocaba estos díes a la xente que vivimos estos años de travesía pel desiertu ye ver a tanta mocedá. Xente que nun vivió otru tiempu en primera pero que tampoco conoció yá los tiempos de la tercera división. L’ascensu supón una gran allegría pa toes y toos pero tamién una amenaza: la de que la lluz de les estrelles de la Primera nos cieguen y escaezamos tolo que pasó, tolo que nos fexo reaccionar y volver con más fuerza. Vienen tiempos nuevos y nun podemos permitir que s’arrequexen realidaes que se vivieron estes dos décades y picu. L’arribismu, la llegada de quien tien un interés renováu en figurar, en medrar y en tomar un espaciu qu’agora, sí, ye de prestixu socioeconómicu, ye una amenaza a la nueva identidá xenerada nel club qu’igual entamamos a ver cristalizar nos precios de los abonos de la temporada qu’entra y la suplantación clasista qu’esto pue xenerar.
El fútbol ye un espeyu de munches coses. L’actitú de la xente d’abaxo y de les élites na so redolada ye prueba d’ello, siempre. N’Uviéu, algama l’estatus de paradigmática. Paez namás un deporte, pero ye otra batalla cultural más d’esta sociedá ente lo popular y el poder.
Memoria, reconocimientu y pedagoxía. Pa nun volver p’atrás ventidós, más que veinticuatro, años
