Pa que les potencies coloniales seyan quién a dominar un territoriu ye quizalero tener una élite local dispuesta a tener al so pueblu na miseria a cambeu de sacar ella una tayada del negociu. Abasta mirar cásique pa cualquier país africanu, ver la cantidá de mines d’oru o de diamantes nel so subsuelu y cayer na cuenta que nada d’eso-y val a la inmensa mayoría les persones pa llevar una vida digna y tener les escueles, hospitales y cases que faen falta pa tener una oportunidá de futuru. Nada ye d’elles, ta too en poder de les multinacionales.
N’Asturies tenemos exemplos d’eses élites collaboracionistes o cortoplacistes o ciegues. Unu ye’l casu chocante d’un alcalde que tien la zuna de llantar estrunfinos azules pel conceyu. El más reciente ye’l presidente del sindicatu SOMA-FIAT-UGT, el señor Lanero.
En declaraciones recientes na FIDMA, el Sr. Lanero dicía que “n’Asturies nun tamos pa refugar actividá productiva nenguna” en referencia a Costco, la mina d’oru de Salave y les empreses armamentístiques. Esa frase ente comines encierra una gran mentira y una idea tarrecible que yo nunca esperaba oyir d’un dirixente sindical porque xuega col sentimientu del mieu, al más puru estilu de la ultraderecha y los neofascismos.
La mentira ye que Costco o la mina de Salave seyan actividaes productives. Nun lo son, son estractives. Costco nun produz nada. Va estrayer les perres de los que paguen por facese socios y comprar na tienda, y va marchar con elles a los Estaos Xuníos; Costco nun va pagar impuestos equí. ¿Van contratar trabayadores? Sí. ¿Van xenerar emplegu? Tolo contrario, van xenerar desemplegu porque van obligar a zarrar a cientos de comercios y van mandar al desemplegu a miles de dependientes d’esos comercios. ¿Y los proveedores? Nun van tener a quién vender los sos productos porque nun va haber comercios y porque nun puen llegar a los precios que-yos va desixir Costco. Asina, los productores van zarrar tamién, emprobeciendo l’actividá económica d’Asturies y xenerando miles de desemplegaos más.
“¿Val too con tal de consiguir unos cientos de puestos de trabayu, Sr. Lanero?”
Igual cola mina d’oru. Va estrayer l’oru y equí nun va quedar nin un gramu. Va dir too pa los Estaos Xuníos, vía Inglaterra, Australia y Canadá. Nin siquiera va pagar impuestos. Va envelenar los acuíferos, los terrenos y hasta la mar. Igual que lo ta faciendo la mina d’oru de Balmonte: la Confederación Hidrográfica, les asociaciones ecoloxistes y les vecines tán avisando de los sos incumplimientos y del envelenamientu del agua mientres el gobiernu asturianu mira pa otru llau. ¿Va crear emplegu? Va crear puestos de trabayu, pero va destruyir munchos más porque l’agricultura y pesca de la fastera van desapaecer por culpa la contaminación. ¿Y en 10 años, cuando acabe l’actividá de la mina? El desiertu total nuna tierra muerto.
La única actividá productiva de les trés mentaes pol Sr. Lanero ye la de les empreses armamentístiques. Sí, son fabriques, aprovechen materies primes pa producir coses. Lo malo ye qu’eses coses nun valen pa nada positivo, como alimentar o vistir a les persones. Namás valen p’asesinales en masa, como se ta faciendo en Palestina. La Santa Bárbara nuestra, de Trubia, ye una filial de la multinacional estaoxunidense General Dynamics que collabora cola israelí Elbit Systems pa cometer el primer xenocidiu del sieglu XXI.
¿Val too con tal de consiguir unos cientos de puestos de trabayu, Sr. Lanero? Prometo nun tener moral, señora multinacional yanqui; prometo nun mirar qué calidá de trabayu nos trai nin a quién fai ricu nin la riqueza que destrui, que n’Asturies nun tamos pa refugar nenguna miga que nos aviente al suelu.
Esa ye la idea tarrecible. La de la falta d’esperanza y futuru, la del mieu y l’angustia, la de tener qu’enferronamos a cualquier cosa que nos traigan de fuera porque nosotres nun podemos crear nada soles. Ye la mentalidá del esclavu, del ser deshumanizáu y ensin esperanza que nun piensa en vivir, namás en sobrevivir.
Depués, en pasando unos años, les asturianes volveremos preguntanos cómo lleguemos hasta equí. Como si’l mundu tuviere llocu y nós nun tuviéremos gota que ver coles consecuencies de les nuestres acciones pasaes. Acompañaes pola desmemoria volveremos escuchar a los mesmos gurús contanos les mesmes mentires pa que renunciemos a toa esperanza, digamos que “ye lo qu’hai” y baxemos los brazos. Otra vez.
“Tamos equí pa romper el círculu, pa lluchar por un futuru que valga la pena vivir.”
Aína diz a les asturianes que siempres hai un camín que lleva al futuru y que’l mundu facémoslu ente toes, día a día, coles nuestres acciones. Fai falta creer en nosotres y nun dexar que nos sigan vendiendo a cachinos nin que nos conviertan en cómplices d’un xenocidiu hasta qu’un día nos conviertan en víctimes. Faigamos un recuentu de los nuestros recursos humanos, naturales, loxísticos. Diseñemos les nuestres propies polítiques. Creemos les infraestructures que mos faen falta. Pongamos les condiciones pa que los nuestros agricultores, ganaderos y pescadores espoxiguen, envede contentase con polítiques de retiru subvencionáu. Impliquemos a les asociaciones agroganaderes y ecoloxistes pa imaxinar soluciones sostenibles y equilibraes ente la visión d’unes y otres. Dende la nuestra especificidá, llevantemos coles nuestres manes, pa les nuestres manes, industries democrátiques y de futuru que xeneren activá al so derredor.
Tamos equí pa romper el círculu, pa lluchar por un futuru que valga la pena vivir. Ente toes, sí podemos.
