Hai un vieyu refrán que diz que “quien torga l’agua, torga la vida”. Y ye que dende cuanta yá pa los distintos pueblos del mundu l’agua tuvo (y ta) considerao un recursu de primer necesidá. Ensin ello nun somos a vivir y, tampoco, a producir. Sicasí, en munchos puntos del planeta ye casique un artículu de lluxu por mor de la dificultá d’acceder a agua potable o porque grandes empreses especulen con ello y tórguen-y l’usu y esfrute a les poblaciones llocales (y pa exemplu los pueblos indíxenes d’América Llatina).
Pero, nel nuestru ecosistema asturianu, l’agua tampocu ta ermu d’especulación. Mesmamente, el pasáu 23 d’avientu el Plenu del Conceyu de Siero dio un pasu peligrosu aprobando la esternalización de la xestión del serviciu municipal d’agua demientres los vinientes 30 años, condergando y condicionando asina a tres xeneraciones enteres. Ye curioso cómo una decisión tan polémica foi aprobada namás colos votos de dos actores (PSOE y VOX) que de cara a la galería amuesen distancia pero llueu van de la mano a la hora de privatizar la xestión d’un recursu básicu como ye l’agua.
Apurriendo datos, les estimaciones iniciales apunten qu’esta privatización podría suponer un encarecimientu de la tarifa d’agua alrodiu’l 112 % pa les vecines y vecinos, una medría xabaz que va duplicar lo qu’angüaño pagamos. Un golpe direutu al poder adquisitivu de les families y a la equidá social nel conceyu. Pero, esto nun ye namás especulación, ye l’anticipu de lo que planteen los xestores que tenemos nel conceyu Siero promoviendo modelos concesionales onde la empresa axudicataria tien que cubrir costos, financiar inversiones y atropar beneficios (cómo non). Porque como diz la llóxica neolliberal, tolo que se pueda apretar pa que dea un euru más, que s’aprete bien.
Per otru llau, estudios comparativos con otros sistemes yá privatizaos amuesen qu’a la fin suel perdese más agua na so rede de distribución (un 30 % más) que lo que marcha nos servicios públicos, onde tradicionalmente se xestionen meyor tanto les fugues y como’l mantenimientu. Tamién s’espeya que la xestión privada tenga menos enfotu en destinar recursos al ameyoramientu del serviciu (sacante cuando hai ayuda pública), yá que resulta más rentable posponer esi gastu nel tiempu.
Y, repasando un poco d’historia, del total d’inversiones plantegaes pa la conservación del agua en Siero ente’l 1993 y’l 2024, namás s’executó un 31,61%. Una estratexa con munchos exemplos en dellos seutores públicos: nun invertir nellos pa dexalos morrer y acabar entregándo-ylos a la empresa privada.
Con too esto, les vecines y los vecinos de Siero tenemos que tener el derechu de poder decidir si queremos que l’agua sigua siendo xestionada dende lo público o si queremos que pase a ser de xestión privada demientres los prósimos 30 años. Ye una cuestión de soberanía popular, xusticia social y defensa de lo común.
Poro, dende Aína damos tol nuestru sofitu a la “Plataforma por el Agua Pública en Siero” (https://sieroporelagua.com/) esixendo que se faiga una consulta popular. Pa ello, animamos a que la xente del conceyu se sume a la recoyida de firmes de la plataforma nesti tema tan importante, asina como a les charres que tan entamando peles parroquies del conceyu.
Porque nun ye namás una cuestión llocal. Ye defender una idea básica: que los recursos esenciales nun se mercantilicen y que tengamos un control xustu y democráticu sobre ellos.
