Costco acaba de recibir l’aprobación como proyeutu d’interés estratéxicu (PIER). Pero Costco nun tien nada d’estratéxico. Independientemente de lo muncho que se podia criticar del modelu económicu de va 50 o 100 años, estratéxiques yeren les mines asturianes de carbón que xeneraron compañíes ausiliares llocales, qu’atrayeron la siderurxa, que xeneró compañíes ausiliares llocales, que xeneraron decenes de miles de puestos de trabayu. Yeren compañíes que producíen coses como carbón y aceru. Yeren cientos de compañíes ausiliares que pagaben impuestos equí. Yeren decenes de miles de trabayadores que pagaben los impuestos equí y que gastaben equí, n’Asturies, dando trabayu a decenes de miles de trabayadores más nes miles de tiendes nos pueblos, villes y ciudaes d’esti país de madreña que tamién pagaben impuestos equí.
Non, Costco nun ye estratéxico porque nun produz nada, porque va xenerar cientros de puestos de trabayu al tiempu que destrúi miles, porque nun va atrayer actividaes complementaries nin ausiliares, porque va destruyir alternatives, porque nun va dexar parte de los sos beneficios n’Asturies como cualquier particular o empresa asturiana.
Entós, si nun ye estratéxico, ¿qué ye?
Pues Costco ye una empresa comercial que va instalase nun polígonu industrial. Eso significa que, a diferencia de la tienda de zapatos o fruta del vecindariu, va beneficiase de suelu baratu, de víes de comunicación y espacios d’aparcamientu adaptaos a les sos necesidaes específiques, de subvenciones y esenciones fiscales. Eso significa una competencia deslleal pa los pequeños comercios, que van tener que zarrar les puertes y dir al paru les dueñes y les dos o trés emplegaes que tengan. Les úniques tiendes que puen sobrevivir, y esto reconozlo hasta’l propiu Costco, van ser les de productos artesanos. O seya, que Costco ye un escaparate de privilexos y va demostrar que pa poder facete ricu, el primer requisitu ye ser ricu. Nengún tenderu o “empresariu” asturianu diben poder consiguir los préstamos y influyencia pa facer dalgo como Costco.
Costco, amás, tien un sistema de negociu basáu n’estrumir a los proveedores pa que baxen los precios. Pue vender productos con un marxe de beneficios mui baxu porque les sos ganancies vienen de la cuota que-yos cobra a los clientes. Pero los y les agricultores, ganaderes y pescadores asturianes yá producen con marxes mui baxos o, munches veces, per debaxo del costu de les sos esplotaciones; nun tienen capacidá pa baxar más los precios. Tampoco van ser a vender a los comercios a los que venden agora porque, pa esi entós, nun van esistir la mayoría. Lo único que-y va quedar al sector primariu asturianu va ser el zarru d’esplotaciones. Igual sobreviven dalgunes con subvenciones especiales PAC pa productos “artesanales” de lleche, fabes, carne o conserves pesqueres. Pue qu’un par de docenes de trabayadores se coloquen como “intérpretes” nun muséu de la piesca, l’agricultura o la ganadería.
Yá pa finar con esti desastre económicu, vamos falar de fiscalidá. ¿Va pagar impuestos Costco? Home, l’IBI sí, pa que Cepi puea llantar más estatues de pitufinos per Siero. Pero la so sede social ta en Madrí, asina que nel nuestru país va devolver cero. Y en Madrí, cerca de cero, porque les empreses gringues tienen un alcuerdu internacional pa nun tributar doble, asina que casi que tolo qu’estraiga de nosotres va espatrialo pa Nueva York. Y los 400 emplegos que creen, vamos ver si duren y cómo; namás que n’Asturies tengamos como opciones Costco o’l paru, de xuru que Costco quier meter mano a los derechos llaborales al cantar de “si nun me das lo que quiero marcho”. Igual, igual qu’Arcelor-Mittal y tantes otres.
Lleendo tanta llaceria, igual a dalguna llectora-y da por pensar que dalgo estratéxico tiene qu’haber en too esto. Pue escoyer una o más de les razones “estratéxiques” que siguen: callar a Cepi pa que nun monte otru partíu que quite votos a la FSA en 2027, poner a prueba les supuestes llinies coloraes d’IU (que yo cuido que son del orde de “nun perder el sillón” a la mesa nel gobiernu d’Asturies, namás), o facer qu’IU valga de pararrayos o de blanquiamientu (esto ye política d’izquierdes porque IU ye un partíu d’izquierda y si IU ta nel gobiernu y el gobiernu lo aprueba, ye qu’IU lo aprueba porque, sinón, IU saldría del gobiernu).
Pue qu’haya más estratexes per detrás. Tien qu’haber dalgo más porque sinón, nun s’entiende destruyir Asturies y emprobecer a les asturianes pa nada. Sedría como tirase un tiru al pie, cosa que namás faen los fatos. Y toes sabemos que n’IU y na FSA nun hai fatos.
Polo que paez, tampoco queda xente d’izquierda sacantes pa facer discursos dos o trés veces al añu. Igual ye eso.
