L’apertura de la temporada de pesca del salmón n’Asturies volvió poner sobre la mesa la situación de supervivencia d’esta especie nos ríos asturianos, marcada pola baxada progresiva nel númberu de captures y pola preocupación creciente ente especialistas y afeccionaos.
La organización Grana anunció la celebración d’una charra divulgativa pa analizar la situación del salmón y la so relación con otros fenómenos ambientales y pesqueros, como’l descensu de la anguila y la sobrepesca de l’angula.
L’actu va celebrase esti xueves, 28 de mayu, a les 19:30 hores nel Chigre La Maléfica, en L’Infiestu, al pie del ríu Piloña, unu de los cursos fluviales con tradición salmonera d’Asturies.
Na xornada va intervenir David Álvarez, profesor titular de la Universidá d’Uviéu nel Departamentu de Bioloxía d’Organismos y Sistemes, nuna sesión presentada por Xelu Morán, profesor d’investigación nel Centru Oceanográficu de Xixón.
Según señalaron dende Grana, l’oxetivu del alcuentru ye “ufiertar una visión científica y clara sobre lo que ta asocediendo col salmón y les perspectives pa los años vinientes”, contando cola participación d’espertos na materia.
La entrada va ser gratuita hasta completar l’aforu.
