Cuando, nos 80, España entró a la Comunidá Económica Europea, el gobiernu español sacrificó los astilleros y les industries ganadera, pesquera, minera y siderúrxica asturianes. Tolo que sostenía la vida nel país. Dependiendo del puntu de vista ideolóxicu, vendiéronnoslo a les asturianes como’l sacrificiu de la madre pol fíu o como la solidaridá de los ricos pa colos menos afortunaos.
Cuarenta años depués, Asturies invierte n’educación pa que los nuestros fíos y fíes más preparaes emigren d’esti país asturianu onde nun ven futuru. Somos un país de güelos que conocen a los nietos per videollamada, un país de parques infantiles desiertos, de neños que muerren de calor en branu y de fríu n’iviernu. Somos un país que namás ufre a la mocedá que queda emplegos terciarizaos y precarizaos, na hostelería y les grandes superficies; emplegos que nun dan pa vivir, pa tener un proyeutu de vida, que namás dan pa sobrevivir. Somos un país de trabayadores que namás suañen con xubilase y dexar atrás un trabayu de mierda, onde los matos tomen un monte qu’antañu foi fonte de vida.
Somos un país de vieyos con unos partíos de la izquierda tradicional estatal qu’aceuten ensin cuestionar la ideoloxía neolliberal del mercáu como rei absolutu. Son incapaces de xenerar alternatives a esi modelu d’esplotación del territoriu y les persones. Conténtense con poner tirites a una mancadura yá engafentada, cronificando la dependencia ensin proponer soluciones de futuru. Son incapaces de facer la más mínima reforma d’un Estatutu que se suponía que diba pasar per un periodu transitoriu de cinco años hasta equiparase al de les demás autonomíes. Llevamos 35 años esperando por ello. Pídennos comprensión, qu’entendamos qu’hai prioridaes, que tenemos que siguir siendo la madre solidaria que se sacrifica ensin esperar nada a cambeu. Pasivos, vieyos y cansos, ensin esperanza, dacuando con rabia. Neso nos convirtieron. Pero ellos taben tranquilos, les matemátiques dáben-yos el control.
Hai casi cuatro años, un garapiellu xente, fartuco d’esperar, fundó Aína. Apegaos al territoriu d’esti país, queremos poner la vida nel centru, perriba d’indicadores macroeconómicos, perriba de cálculos eleutorales cola premisa de l’autorrenuncia. Queremos lo que quier tou ser humanu, una vida con significáu pa toes y toos ensin distingos de sexu, xéneru, edá, pensamientu y relixón, etnia, orixe, cultura o llingua: que los nuestros derechos a una vivienda y un trabayu dignos nun se conviertan en mercancíes; que tengamos aseguraos unos alimentos sanos y de cercanía ensin tener que calcular qué podemos meter na cesta depués de pagar la hipoteca o l’alquiler; que seyamos pa desarrollar un proyeutu de vida al llau de la xente que nos quier; que seyamos beneficiarios universales y copartícipes de la nuestra educación, la nuestra salú, los nuestros cuidaos; que’l progresu ciegu y el consumismu ensin llendes nun acaben coles nuestres tierres, los nuestros montes, los nuestros ríos. Queremos decidir a cada pasu de les nuestres vides, nel trabayu, nos cuidaos a les persones y el nuestru entornu, na política en democracia ensin la dictadura de los poderosos y el so dineru. Queremos que nun nos roben el pasáu p’asina ser a decidir el nuestru presente y el nuestru futuru. Queremos enfotu, esperanza, ilusión. Queremos pal pueblu asturianu lo mesmo que pa tolos pueblos d’España y el mundu. Nin más nin menos.
Como ellos tienen mieu, quieren qu’Aína renuncie a lluchar pol futuru, quieren que se sacrifique
Agora, la izquierda tradicional estatal, ciega a la desesperación de la xente, ve cómo una parte la sociedá se remonta, cede a les emociones y xira la vista a los únicos que-yos ficieron oposición: la derecha más carpevetónica de la mano del fascismu. Ye verdá qu’esos patriotes de pulserina nun tienen otra ilusión que vender que l’espeyismu d’un trapu bicolor qu’envuelve más y muncho peor de lo mesmo. Pero por mui falsos que seyan ellos, ye ilusión, dalgo polo que lluchar. Al otru llau, la izquierda estatal n’Asturies namás tien mieu: que vienen los bárbaros. Y como vienen los bárbaros, pensando que n’Aína somos un partíu monotemáticu, avérense y dícennos que “van quitavos el bable” (como si pudiéremos escaecer que, en 40 años, lo único que ficieron ellos ye poner a les llingües d’Asturies en respiración asistida, ensin proporcionar nin una aspirina pa cura-y el catarru, pulmonía yá a estes altures).
Como ellos tienen mieu, quieren qu’Aína renuncie a lluchar pol futuru, quieren que se sacrifique (otra vez pidiendo’l sacrificiu a los demás), que valide y cargue sobre los costinos los sos 40 años de muerte asistida y desapaeza pa siempres nel sillón d’un escuru despachu d’una Conseyería cualquiera. “Hai que ser pragmáticos. Ye la lóxica de les matemátiques”, nos dicen. “Somos la fuerza hexemónica de la izquierda n’Asturies”, sentencien. El casu ye qu’en Cataluña, n’Aragón o en Galicia dicen lo contrario: “¿cómo vamos renunciar nosotros, anque nun seyamos la fuercia hexemónica de la izquierda nesti territoriu?” La doble vara de midir descubre que lo único que-yos esmolez ye la supervivencia del so partíu, que lo único que quieren ye’l control. Y pa ello namás vienen con manes cargaes de mieu.
N’Aína sabemos que’l mieu ye l’enemigu de la vida, ye como semar sal na tierra. El nuestru proyectu ye llevantar “un polu p’Asturies”, una casa d’esperanza, pasu a pasu. Sabemos tamién que tien que ser una casa que construyamos ente toes o nun va ser. Asina lo piensen con nosotres el Partíu Verde d’Asturies y munchos otros actores políticos y cívicos. Y vamos siguir falando d’esta casa común de les asturianes, d’esti polu de xunidá asturianu y asturianista, con tolos partíos locales, con tolos sindicatos, con toles asociaciones de toa mena. Al empar, vamos diseñar un modelu de firma y participación popular que vamos abrir a toles asturianes y asturianos individuales que quieran sentir la ilusión de lluchar en comunidá pol futuru de toes.
Va ser difícil. Va ser duro. Pero sabemos qu’hai un camín y qu’hai xente que quier andalu. Por eso, tamos segures que va pagar la pena.
