La capital asturiana va acoyer del 24 al 26 de xunetu el XXVIII Congresu Internacional de la Asociación pa les Llingües y Cultures Europees Amenaciaes (ALCEM), un alcuentru que va reunir investigadores, escritores, activistes culturales y representantes de distintes comunidaes llingüístiques del continente pa analizar los retos de la preservación y revitalización de les llingües minorizaes.
El congresu, que se va celebrar en distintes sedes d’Uviéu, ente elles la Xunta Xeneral del Principáu, el Muséu Arqueolóxicu d’Asturies y l’Academia de la Llingua Asturiana, va poner especial atención na creación lliteraria contemporánea, les polítiques llingüístiques y les esperiencies de recuperación idiomática desarrollaes en diverses rexones europees.
La sesión inaugural va tener llugar el vienres 24 de xunetu cola participación del presidente de l’ALCEM, Roberto González-Quevedo; el vicepresidente de l’Academia de la Llingua Asturiana, David Guardado, y la conseyera de Cultura, Política Llingüística y Deporte, Vanessa Gutiérrez. El programa inclúi conferencies sobre la diversidá llingüística na rexón alpino-adriática, la situación actual del asturianu y homenaxes a figures destacaes na defensa de les llingües minoritaries.
Mientres les xornaes van presentase informes sobre la realidá de llingües como’l bretón, el galés, el mirandés, el casubiu, l’eslovenu o l’aragonés, amás d’analizar iniciatives de protección y promoción del patrimoniu llingüísticu en distintos países europeos.
El sábadu va celebrase un coloquiu abiertu al públicu dedicáu a la creación lliteraria nes llingües amenaciaes, con intervenciones sobre la lliteratura asturiana contemporánea, el romanche, el mentonés o’l bretón, ente otres. Les sesiones tamién van abordar el papel del teatru, la enseñanza universitaria y la lliteratura céltica como ferramientes de revitalización idiomática.
El congresu va zarrase’l sábadu cola asamblea xeneral de l’ALCEM y el domingu va concluyir con una visita cultural a Cuadonga y Cangues d’Onís, primer asientu históricu del Reinu d’Asturies.
