Bones tardes Sr. Presidente de L’ALLA, estimaos miembros d’esta institución, autoridaes del gobiernu d’Asturies, familiares, amigues y amigos, y toos y toes cuantos equí m’acompañen. Antes que nada, quieo agradecer la vuesa presencia nun día tan especial y emotivu pa min, y davos les gracies por esta compañía que, en momentos como ésti, tanta falta fai. Les mios pallabres d’agradecimientu, también, p’aquelles y aquellos que m’enseñaron esta llingua qu’anecio pa nun escaecer; p’aquellos y aquelles que fixeron lo imposible pa que nun dexemos de sentir l’aliendu del asturianu, y pa tolos que lleven décades esbrozando caminos qu’agora, los que llegamos espués, podemos recorrer más fácilmente. El mio agradecimientu, cómo non, a cuantos confiaron en min y me conceden esta tarde la honorable responsabilidá de siguir trabayado por algo que, más qu’un trabayu, ye una necesidá vital.
El 30 d’ochobre de 1994 llegaba yo a vivir Nueva York. Llegaba con una maleta negra que comprara nun facía muncho pa dir a L’Arxentina, y qu’anduvi emburriando pelos aeropuertos hasta qu’apaecieron les maletes con ruedes que nos fixeron más fáciles estos viaxes cargaos de coses y emociones. Naquella maleta na que fui faciendo una especie de mudanza, y n’otres maletes coles que viaxé, comencé a llevar un montón de caxigalines que namás tienen valir pa quien entama a escribir una historia d’emigración. Pero mui pronto, y xunto a les fabes, el chorizu o los quesos de Ca Sanchu que mio madre me metía, empecé a meter llibros de lliteratura asturiana que nunca lleera nos mios años de formación universitaria n’Asturies. Foi asina como entamé a crear una biblioteca asturiana en Nueva York, y a alcontrar consuelu y ablugu na recuperación escrita d’una llingua que yá solo sentía nos meses de xunetu y agostu que pasaba en Grullos.
Nel veranu del 98, y afalada por delles amigues, entrevisté a diecisiete muyeres de los conceyos de Candamu y Les Regueres cola intención de documentar la esperiencia de vida de les muyeres del campu. Les sos histories y voces taben dafechu trabaes na mio biografía, pero treslladales a la escritura sirvióme de faru pa poneme a escribir a fines de los 90 el primer llibru de cuentos n’asturianu, Pa nun escaeceme. Esi foi l’aniciu d’un camín pal que nun hubo vuelta atrás, porque en Nueva York alcontré foros nos que lleer nesta llingua, nos que compartir la nuesa historia cultura, y onde poner lo asturiano n’otros mapes.
Cada vez que llego a la mio casa en Grullos siento que llego al centru’l mundu, anque acabe de llegar d’esi sitiu que’l mundu considera’l centru
Que lo que fixi por necesidá nestos treinta años sía agora recompensao con esti nomamientu devuélveme la fe na mio manera d’axeitar les coses: poner l’acentu de lo importante no que suel tenese por marxinal y periférico, y da-y visibilidá a lo que nos faen creer que ye innecesario. Nun ye en realidá difícil, porque cada vez que llego a la mio casa en Grullos siento que llego al centru’l mundu, anque acabe de llegar d’esi sitiu que’l mundu considera’l centru, y porque fincase na llingua materna cuando s’habiten otres xeografíes, asina nun se tenga a veces con quién la falar, ye síntoma común ente emigrantes y esplazaos que nun podemos facer otra cosa. Nesti sen, siéntome dichosa de vivir nuna ciudá na que se falen unos 700 idiomes, espoxigaos algunos d’ellos en Nueva York non solo por razones sentimentales, sinón porque nesti nuevu espaciu puen desfacese de los prexuicios qu’arrastren nos llugares d’orixe. Nun voi negar qu’esto mesmo foi lo que pudo pasame a min, heredera del arrequexamientu llingüísticu que l’asturianu aguantó, y sigue aguantando, na nuesa Asturies.
Soi consciente de la situación actual d’esti idioma que va llegando escacháu a les xeneraciones moces, y sé que sigue siendo amparáu sobre too dende les orielles, por muncho que se sepa que cuando una llingua muerre, como diz l’activista potawatomi Robin Wall Kimmere, “piérdese mucho más que pallabres, al ser la llingua ablugu d’idees que nun esisten en nengún otru llugar”.
Por eso, ocupar espacios de resistencia nun ye siquiera una opción, y dende esi escenariu plurillingüe de la ciudá na que me tocó vivir, comprométome a siguir dándo-y visibilidá a través de la escritura y la educación a esta llingua que traduz la identidá de munches y munchos asturianos; esta llingua cola qu’abonda xente interpreta y espresa la so manera d’entender y sentir la vida; esta llingua na que s’anició a lo llargo’l tiempu la cultura más fonda de la nuesa tierra.
Quixera, pa terminar, dedicar esti nomamientu a la memoria de mio padre, el primeru siempre, xunto a mio ma, en sofitar les mios xeres, el primeru n’emocionase coles mios presentaciones, la páxina más importante d’un diccionariu que más nunca podré consultar. Acabo coles últimes pallabres que, poco antes de morrer, tovía mio pá m’enseñó, soníos vieyos que m’amarren, con una fuerza inmensa, al mundu rural al que pertenecemos: Argatos, arestas, ciñiplu, tabasa, sabarcera.
