La fecha del 25 de mayu, aniversariu de la declaración en 1808 de soberanía de la Xunta Xeneral frente a la invasión napoleónica, va adquiriendo cada vez mayor relevancia social y institucional. El 25 de mayu ye tamién el momentu históricu nel que s’ellabora, a propuesta de Xovellanos, la bandera asturiana tradicional de la Cruz de la Victoria sobre fondu azul, una enseña popularizada masivamente dende los años 70 del sieglu XX gracies a Conceyu Bable.
Dende Somos Asturies defenden la creación d’unes Medayes 25Mayu dirixíes a reconocer y premiar a toes aquelles persones, colectivos o entidaes que se distinguieren pola defensa, estudiu o promoción de los valores y la identidá asturiana, abarcando tolos campos posibles. “Vendríen a aumentar la carga simbólica que tien esi día” señala Xune Elipe, portavoz de la formación.
“Nun tenemos que ver esta efeméride como dalgo del pasáu, sinón como un elementu del futuru” explica Elipe, pal que les Medayes 25Mayu son “unos gallardones que daríen realce y consistencia a una fecha que ta llamada a convertise, según la nuestra parecencia, nel Día d’Asturies”.
