El proyeutu de Real Decretu del Ministeriu de Ciencia, Innovación y Universidaes sobro los ámbitos de conocimientu y especialidaes pa la adscripción del profesoráu universitariu esclúi por agora la Filoloxía Asturiana del llistáu d’ámbitos, una situación que nun se da con otres filoloxíes como la española, catalana, gallega, vasca y clásiques, y que de consolidase obligaría al profesoráu d’asturianu a incorporase a un ámbitu xenéricu de llingües modernes y les sos lliteratures. El decretu que prepara’l ministeriu tampocu menciona la Llingüística y Lliteratura Asturianes nes especialidaes académiques, lo que fai que les places universitaries rellacionaes col asturianu queden dientro d’una categoría amplia de llingües y llingüístiques romániques perdiendo la so identidá académica.
L’Academia de la Llingua Asturiana considera esta esclusión “discriminatoria e inaceptable especialmente teniendo en cuenta’l desarrollu académicu llográu pola Filoloxía Asturiana nes últimes décades con titulaciones oficiales como’l Mínor n’Asturianu, menciones en graos de Maxisteriu y especialidaes en másteres de profesoráu reconocíes pola ANECA”. La institución solicita “el sofitu y compromisu de les instituciones asturianes como la Universidá d’Uviéu y les conseyeríes d’Educación y Cultura” y anuncia que va llevar a cabu xestiones directes coles autoridaes universitaries y polítiques tanto a nivel estatal como autonómicu.
Tamién el diputáu de Sumar por Asturies, Rafael Cofiño, rexistró una entruga parllamentaria na que plantega al Ministeriu tornar a ellaborar el proyeutu de real decretu pa qu’incluya la Filoloxía Asturiana “en condiciones de plena igualdá”. Nun comunicáu, Cofiño refuga la esclusión del asturianu nel testu nel que se regula la adscripción profesional y llaboral del profesoráu universitariu, nel que “se contemplen distintos ámbitos de conocimientu correspondientes a les Filoloxíes Española, Catalana, Vasca y Clásiques”.
