Nun artículu qu’espublizó en La Nueva España hai poco, José Suárez Arias-Cachero, “Felechosa”, comparaba la celebración en Gernika de los cincuenta años del bombardéu pola aviación nazi de la población vizcaína col escaezu absolutu n’Asturies del mesmu acontecimientu históricu. Nel actu de Gernika hubo representación de dos Estaos, l’alemán y l’español, y del gobiernu vascu. Alemaña pidió perdón por aquellos fechos tráxicos al pueblu vascu.
Los bombardeos alemanes na guerra civil n’Asturies nun fueron menos que n’Euskadi y tuvieron consecuencies asemeyaes. Gernika nun foi la única población vasca bombardiada pola sangrina Lexón Cóndor, tamién Durango, Eibar, Bilbao y otres. N’Asturies hubo 122 bombardeos, el primeru sobre Trubia, enantes que’l de Gernika, y más tarde en llugares como Xixón, L’Infiestu, Avilés, Colunga, El Mazucu, Tarna, San Cloyo y Cangues d’Onís. La ofensiva n’El Mazucu dende l’aire foi infernal y la resistencia republicana heroica. N’Asturies hubo más de mediu millar de víctimes documentaes, como mos recuerda “Felechosa”, por una cifra que va ente les 150 y les 2.000 n’Euskadi, según les distintes fontes.
Cangues d’Onís foi’l llugar más castigáu n’Asturies, historiadores como Alejandro Roxán lu amuesen colos sos trabayos. Les bombes alemanes, unes cuatrocientes, cayeron sobre la primer capital del Reinu d’Asturies a lo llargo cuatro díes d’ochobre de 1937. Los republicanos compararon Cangues con Gernika y nun s’equivocaben. Les dos villes quedaron ensin l’ochenta y cinco por cientu de los edificios.
Los republicanos compararon Cangues con Gernika y nun s’equivocaben
Pero hai otra comparanza relevante. Los alemanes atacaron con procuru dos villes de grandísima importancia histórica y emocional pa los dos pueblos, el vascu y l’asturianu, llugares icónicos y sagraos na memoria coleutiva qu’ocupen un llugar cimeru nel corazón de los sos habitantes. Gernika ye’l llugar onde ta asitiáu dende la Edá Media’l famosu carbayu nel que los reis castellanos xuren respetar los fueros de Vizcaya. L’árbol sobrevivió milagrosamente al bombardéu.
Peor suerte tuvo na guerra en Cangues la ilesia de Santa Cruz, del añu 737, la que mandó facer el rei asturianu Favila, el fíu de Pelayo. Ehí taba enterráu cola so muyer, Froiluba. Tamién la cruz de carbayu de Pelayo, acordies cola lleenda. Pero nun fueron les bombes nazis les qu´acabaron col primer templu cristianu de la Península, llantáu a la vera d´un dolmen del sieglu III enantes de Cristu. Fueron les tropes republicanes un añu antes, en setiembre de 1.936. Ta documentáu nun Boletín llocal del Frente Popular que diz que´l espoliu fízose “con la aquiescencia de todo el pueblo, la ha declarado Ruina nacional, y la piqueta demoledora ha destruido en pocos días este antiestético caserón, nido de aves noctunas”. Salvóse el dolmen, qu’ehí sigue, agora embaxo la ilesia reconstruída na posguerra.
Un monumentu megalíticu y una ilesia de la Monarquía asturiana ocupando el mesmo espaciu, un exemplu perguapu del sincretismu y la continuidá histórica de la cultura d’Asturies, de lo pagano a lo cristiano, de lo propio a lo universal. Y la representación orixinal d’una Monarquía altomedieval que duró dos sieglos y dexó un arte ablucante, qu´en Cangues despreciaben tanto los defensores republicanos como los agresores franquistas y nazis. La ilesia de Santa Cruz debería tener pa los asturianos un valor simbólicu asemeyáu al de la villa de Gernika pa los vascos, pero ta bien nidio qu´eso el pueblu asturianu nun lu pescancia. Nin pola drecha nin pola manzorga, tamién esa evidencia tien una gran importancia simbólica.
Bien diz Pedro de Silva nel llibru que ta acabante d’espublizase (“Lo que queda a la espalda”, unas memorias dialogadas con César Iglesias) y nes entrevistes que-y ficieron por esti acontecimientu editorial: la historia ye una de les mayores fortalezas que tien Asturies. “El verdadero punto fuerte de la identidad de Asturias es su historia”, diz l’ex-presidente asturianu nel llibru, una afirmación que daría pa un alderique públicu prestosu, nel que nun puede faltar la llingua asturiana, que Pedro de Silva sofita y pa la que pide la cooficialidá.
De lo que nun hai dubia dalguna ye de la importancia, la carga emocional, la trescendencia y la épica, coles sos miseries y grandeces, les sos xestes y traxedies, los sos ésitos y fracasos, del llargu y milenariu rellatu del pasáu d’Asturies y los asturianos. Tampoco de la inorancia sobre ello, con esceición d’una minoría ilustrada y enfotada nesta xera, per parte del pueblu asturianu.
Dende l’arte rupestre de les cueves, a les tribus prerromanes y la guerra contra l’Imperiu de los ástures, la Monarquía y l’Estáu altomedieval que s’espardió pela Península, la Ilustración del sieglu XVIII, la francesada, el movimientu obreru, la revolución de 1934, la última obrera de la Historia, la guerra civil, la oposición antifranquista na dictadura, les fuelgues de 1962, la contribución asturiana a la Transición española…. hai milenios d’apasionante rellatu, el d’un país pequeñín ente los montes y el Cantábricu, esencial na Historia d’España y d’Europa, y desconocío casi dafechu polos propios asturianos.
Y si daquién piensa que desaxero, que vaiga entrugando perhí a los rapazos asturianos si saben quienes fueron Pintaius, el rei Mauregato, Gonzalo Peláez, Flórez Estrada, Marica Andallón, Belarmino Tomás, Anita Sirgo o Tortuaco Fernández Miranda. Conocerán a Xovellanos, y en Xixón mayormente, una esceición nel murniu fenómenu de la inorancia y l’escaezu, anque al ilustráu xixonés reconózselu na so tierra, pero nun se-y fai munchu casu.
No que cinca a la enseñanza, puede dicise que la Historia d’Asturies, pesie al llabor meritoriu y voluntarista de munchos profesores, nin ta nin se y-espera. Apaez nel currículo de Secundaria, pero probemente. Nos llibros de testu les editoriales meten nun cartafueyu esi contenido, pero como ta al final los estudiantes nun suelen llegar a trabayar con él y acaba perdiéndose col recicláu del material. Tampoco tien l´enfotu que debiera sobre´l pasáu d´Asturies la Universidá, anque sí hai investigación. Y perbona, de medievalistes y especialistes n’Historia contemporánea, por exemplu. La Facultá d’Historia ufierta un itinerariu alternativu en cuartu de la carrera, que va dende la prehistoria hasta anguañu, pero ye opcional. Gárrenlu un venticinco por cientu de los estudiantes.
Iguar esta torga, la d’un pueblu que nun se conoz a sí mesmu, talamente como una persona que nun sabe d’ónde vien y cuáles son los sos raigaños, nun ye siguidismu d’otros, nin muncho menos nacionalismu, col que yo nun m’identifico. Los vascos nun son nin meyores nin peores que los asturianos, pero no que cinca a la so cultura ya historia nun amuesen la galbana, el desinterés, la inorancia o’l complexu provincianu que se resiste a morrer n’Asturies.
Vien a cuentu otra comparanza p’allumar esti contraste, tamién de la dómina de la guerra civil qu’arrasó Cangues y Gernika. Daquella Euskadi tuvo autonomía del Estáu español per primer vez na historia. Asturies, pol aisllamientu nel qu’acabó, el caberu territoriu republicanu del Frente Norte, foi más allá y declaróse soberana, non ensin grandes tensiones internes nel nomáu Gobiernín y col republicanu. Pa los vascos José Antonio Aguirre, el primer lendakari, ye un héroe con una absoluta y tresversal reconocencia n’Euskadi. Pa los asturianos Belarmino Tomás, el presidente del gobiernu soberanu y cabezaleru na revolución del 34, ye un gran desconocíu, un “malditu” colos restos que reposen nel cementeriu de Pando nel escaezu más absolutu de los sos paisanos.
Alemaña nun pidió perdón a Asturies y a los asturianos como fizo n’Euskadi. Y la culpa nun ye de los alemanes nin de los vascos. Ye de los asturianos, y non namás del gobiernu, que nesto de la recuperación de l’autoestima coleutiva y la cultura propia nun pasa de la retórica. Que mediu sieglu dempués de la muerte del dictador y de la llegada de la democracia, cola que vieno dempués l’autonomía, conocer la Historia d’Asturies inda siga siendo un llabor autodidacta, como’l qu’entamamos entós mozos apasionaos de la mio xeneración, que descubríamos maraviyaos d’onde veníemos, más que señaldá, provoca una sensación amarga de derrota coleutiva.
