L’asturianu tien qu’entrar dafechu nes nueves teunoloxíes del llinguaxe, na Intelixencia Artificial, nes redes sociales y nes nueves formes de comunicación audiovisual si quier tener futuru. Esa foi la idea central defendida esta selmana por David Guardado na Academia de la Llingua Asturiana, de la que forma parte dende 2023.
L’autor de “NUNCA VENCIDA. Una historia de la idea d’Asturies”, fala dende la esperiencia y la coherencia d’una trayectoria venceyada dende hai décades a la normalización y modernización del idioma. En 1997 foi ún de los fundadores d’Asturies.com, un mediu dixital pioneru nel usu del asturianu cuando internet inda yera un territoriu por explorar. Aquella apuesta adelantada al so tiempu demostró que la llingua podía tar presente nos nuevos formatos y comunicase con naturalidá nun espaciu global. Dende entós, el escritor y activista llingüísticu, que trabaya en dixitalización de medios de comunicación, vien defendiendo que la supervivencia del asturianu pasa por tar onde ta la xente, y güei esa xente ta, sobre manera, nel mundu dixital.
Na so intervención na Academia, Guardado reclamó entainar. Al so xuiciu, asina como a finales del sieglu XX foi imprescindible dotar al asturianu d’una gramática normativa y de diccionarios —“un procesu que se fixo de manera brillante”—, agora ye urxente dar el pasu a les teunoloxíes del llinguaxe. “El asturianu tien que tar presente na Intelixencia Artificial, nos asistentes de voz, nos traductores automáticos y nos grandes modelos de llinguaxe”, señaló, alvirtiendo de que en mui pocu tiempu quien nun tea nesi ecosistema quedará fuera de los nuevos espacios de comunicación.
Guardado asitió esta necesidá nun contestu de globalización estrema, nel que mesmamente’l castellanu va tener problemes. “Si una llingua como’l castellanu va sufrir, imaxina lo que puede pasar con llingües minorizaes como’l gallegu o l’asturianu”, afirmó. De fechu, punxo l’exemplu del retrocesu del gallegu nos últimos años como un avisu de lo que pue pasar cuando falla la lealtá llingüística y la transmisión interxeneracional.
El académicu ye precisamente ún de los promotores de la asociación Reciella, que busca fomentar l’usu del asturianu nes families. Pal xixonés l’ausencia de materiales audiovisuales atractivos —yá non solo na televisión, sinón tamién en plataformes dixitales, redes sociales y espacios de xuegu— ye un pilancu enorme. “Los críos falen como los sos iguales; si los espacios de socialización nun tán n’asturianu, la llingua asturiana pierde terrén”, esplicó.
La despoblación del rural xuega tamién en contra, al amenorgar esos espacios naturales de usu y tresmisión. Frente a ello, Guardado defiende potenciar los contestos onde se pueda escuchar, xugar y vivir n’asturianu.
Amás, Guardado foi claru al señalar que la falta d’oficialidá del asturianu nun Estáu como l’español, que ye de fechu plurillingüe, supón una auténtica “perda d’oportunidaes”, non solo dende’l puntu de vista cultural, sinón tamién económicu. Al so xuiciu, la non oficialidá llenda la presencia de la llingua nel ámbitu empresarial, teunolóxicu y institucional, y dexa fuera a Asturies de procesos d’anovación y desenvolvimientu que güei tan directamente rellacionaos coles llingües y la so normalización nos nuevos mercaos y servicios. Nesti contestu, tamién se refirió al papel de la inmigración, desmontando dalgunos tópicos habituales. Na so opinión, munches persones migrantes acérquense al asturianu “con menos prexuicios que dalgunos asturianos”, y inclusive ven na llingua asturiana como una ferramienta útil pa la integración social y cultural.
