Nesti momentu de debate políticu sobre el futuro electoral d’Asturies, por desgracia parez que se centra to en quién y falta el pa qué.
La derecha y la ultraderecha tan envenenando la escena pública con coses como el historial médicu de Pedro Sánchez porque el futuru que proponen ye que los probes trabayen 12 hores y muerran sin dir al médicu. Esti artículu fala de la Asturies que imaxinamos dende el ecosocialismu, dende l’ecofeminismu.
La xente de Verdes – EQUO imaxinamos una Asturies, nel añu 2050, que sea un bon sitiu pa vivir y trabayar. Queremos que la xente viva el mayor númberu de años posibles cola meyor calidá posible. Queremos facer polítiques que aumenten la esperanza de vida hasta los 90 años. Les persones que firmamos esto y probablemente tú, llevaremos munchos años muertos nel añu 2100, pero hay rapazos y rapaces que tan agora po les nueses cais que vivirán nesa dómina y queremos dexa-yos el meyor mundu posible.
Esi tien que ser el primer puntu pa la formación de un frente ampliu. Xuntase les persones que entendemos la política como una forma de facer la vida meyor pa toles persones. Agora, mañana y dientro de 50 años. Aunque quienes trabayemos agora nun lo veamos.
La Asturies que imaxinamos pal añu 2050 ye una Asturies de xente que viva y trabaye equí y que nun viva de la especulación. Ye usar el principiu de “ca ún según la so necesidá, ca ún según la so capacidá”. Una Asturies que cubra les necesidaes de toles persones que vivan nella y a la que contribuyan les persones que viven nella según la so capacidá, col trabayu y los impuestos.
“Pa solucionar le problema, tenemos que dexar los localismos y ver la Asturies central como un conceyu grandón.”
Los impuestos son competencia fundamental del estau, aunque se fale de descentralización, la competencia autonómica ye escasa. Lo del infiernu fiscal ye de risa. De toes formes el frente ampliu tien que tener claro que los impuestos nun puen baxar. El impuestu de sucesiones o la tasa turística tienen que ser señes de identidá política por lo que signifiquen de política distributiva. La preferencia de los impuestos que graven la renta o el patrimoniu sobre los impuestos indirectos o al consumu tien que ser un encontu básicu de la ideoloxía del frente ampliu. Asina como el castigu a les rentes del capital frente a les del trabayu.
Si queremos que la xente viva, tien que tener vivienda y eso agora ye un problema de primer orden pa la xente mozo.
Pa solucionar le problema, tenemos que dexar los localismos y ver la Asturies central como un conceyu grandón. Dende Llaviana hasta Grau, la planificación y la búsqueda de soluciones tien que ser una sola. Dexar de pensar que si pongo un equipamientu 1 m más allá el IBI pagalu’n otru conceyu. Cuando falen de ampliar ParquePrin eso repercute nes tiendes de Avilés o de Mieres o de Candás, nun ye un tema de Siero, ye de toa Asturies.
Dende esi planeamientu y sabiendo que les coses lleven tiempo y nun son cencielles, hay propuestes de consensu que habría que defender:
• El programa “alquilamoste” defende al inquilinu sin causar pérdides al propietariu. Ye un programa a tener por bandera del frente ampliu y que diferencia Asturies de les comunidaes de la derecha.
• Los inmuebles ruinosos o los solares que tan en zones urbanes tensionaes y que los propietarios nun y den usu hay que expropialos pa que se faguen viviendes.
• Les viviendes turístiques nun caben cuando hay una falta tan grande de vivienda pa vivir.
Pero la vivienda va xunia al transporte. Con una población muy vieya y con un preciu de los coches caa vegada más altu hay que priorizar el transporte públicu frente al coche privau, los trenes y los autobuses frente a les carreteres. La inversión en cercaníes frente al peaxe del Huerna.
“Ente Campomanes y Xixón nun ye viable facer una vía de alta velocidá.”
La xestión de les cercaníes, el asturtren, tien que ser autonómica y tien que aprovechar la red ferroviaria que tenemos. El tren a Llanes o A Veiga tienen que ser un mediu de transporte habitual y non una rareza.
La estación intermodal de Xixón ye importante pa toa Asturies y ye importante pal tren, pal autobús pero tamién pal acesu en coche privau. Ye preciso que esa chapuza de 20 años se igue.
Hay que olvidase de tolos millones tiraos en estudios pa llevar al AVE a Xixón. Ente Campomanes y Xixón nun ye viable facer una vía de alta velocidá. Igual que hay que olvidase de esi sumideru de perres que ye el furacón del metrotren. La izquierda tien que ser valiente diciendo la verdá a la ciudadanía.
Hay que repensar el transporte pa que la xente pueda dir a trabayar a los polígonos industriales en transporte públicu. Agora mesmo nun ye viable.
La izquierda tien que tener propuestes pa la policía, nun se pue escaecer una cosa tan importante pa la sociedá. El frente ampliu debe proponer un plan a 10 años pa tener una policía asturiana. Nun ye viable que un conceyu tenga un cuerpu policial con 10 efectivos. Nun ye operativo. La policía asturiana tien que absorber a toles policíes municipales aunque haya efectivos que ten en comisión de serviciu nos conceyos más grandes. Además, esa policía asturiana debería asumir ciertes funciones de la Guardia Civil de la mesma manera que lo fizo la policía Navarra. La idea sería que la policía asturiana fora una policía de proximidá, esa policía tutora nos institutos, la policía sanitaria que apoya nos centros de salú, que patrulla polos pueblos o ta nos eventos festivos y deportivos acompañando a Proteción Civil, además de facer les llabores de proteción de los edificios y los cargos del gobiernu de Asturies y los distintos conceyos.
Hay que aumentar les places de la Universidá pública, y de los másteres que son habilitantes. Esto tiene que ser la prioridá frente a la gratuidá de la matrícula u otres inversiones. Agora mismu el mayor problema ye que nun hay places bastantes na Universidá pública.
Pa defender el asturianu hay que facer que lu conoza y lu use la mocedá. Hay que xunir les materies de cultura y llingua asturiana y facela obligatoria dende primero de primaria a 4º de la ESO. Agora mismu esta división ye una manera de segregar al alumnau. Además, el curriculum de cultura asturiana ye meyorable. La cultura ye llingua y la llingua ye cultura. Tien que tar xunío.
Hay que facer un plan pa finar colos conciertos educativos en 10 años. La educación tiene que ser privá o pública, nun pue ser concertao. Hay que facer un informe que revise les places concertaes que son necesaries crear na escuela pública y negociar con les empreses privaes que lleven los colexos concertaos el so pasu a la enseñanza privá o la so asunción pola rede pública.
El frente ampliu tiene que mantener como prioritariu el programa de les escuelines, un exemplu de vertebración del territoriu y de conciliación.
“El Frente ampliu tiene que oponese a Cotsco, la ampliación de Parque Prin o la mina de oro de Belmonte.”
Na mesma llínea hay que aumentar y meyorar les cases de acoyida pa muyeres maltrataes faciendo una rede autonómica que té presente en toles zones d’Asturies. Igual que les escuelines, les “cases malva” tienen que ser un símbolu identitariu de Asturies.
Un oxetivu prioritariu ye la redución de les llistes de espera de sanidá y reforzamientu de la atención primaria con una sanidá pública universal y gratuita.
De la mesma manera hay que poner el focu na puesta al día de les llistes de espera de dependencia y discapacidá.
El Frente ampliu tiene que oponese a Cotsco, la ampliación de Parque Prin o la mina de oro de Belmonte. Por eso hay que reformar o derogar la lley de proyeutos estratéxicos que ta siendo un coladeru de proyeutos nocivos pa Asturies.
Nun se pue facer política sin un mediu de comunicación que informe. Por eso hay que subir el presupuestu de la TPA a 40 millones de euros, poniendo un gastu per cápita equivalente a otres autonomíes. La TPA tien que tener una aplicación que permita que se consuman los sos conteníos dende dispositivos móviles y a la carta que ye como consume la mocedá. Hay que diferenciar por edaes el públicu obxetivu de los dos canales de la TPA. Y hay que facer una RPA en directo 24 x 7.
Estes midíes nun tan centraes na economía, porque lo que podemos ver ye que el facer que la sociedá funcione y sea más igualitaria faz que furrule la economía. La ideoloxía neoliberal que supedita la vida a la economía, a la fin faz dañu a la propia economía como mos demuestren los fechos.
Quearía pa facer otru artículu enteru falando del impautu del cambiu climáticu y la defensa del nuesu paraísu natural. Como exemplu la prohibición total de la pesca del salmón y de la angula. En cualquier casu la defensa de la biodiversidá y de los ecosistemes nun ye optativo pa un proyeutu de futuru.
El frente ampliu hay que facelu. Y hay que facelu soñando Asturies, soñando el añu 2100. ¿Ponémonos con ello?
