Militante de la Xunta pola Defensa de la Llingua Asturiana y figura venceyada dende va años a la defensa del asturianu y del gallego-asturiano, la organización llamentó esti domingu la so muerte con un comunicáu nel que destacó’l so “compromisu con toles causes”, amás del so calter “modestu” y el so trabayu constante nes actividaes reivindicatives entamaes pola XDLA.
La Xunta recordó especialmente que Delfina Flórez foi la impulsora de les “Pandereteres pola Oficialidá”, una iniciativa que nació en 2009 pa convirtise en símbolu musical de les movilizaciones pola oficialidá del asturianu. Según recordó la entidá, escribió la lletra del ramu dende l’hospital y aquel añu nun pudo cantala.
Sicasí, dende entós participó de manera habitual nes manifestaciones y actos reivindicativos “cola so pandereta”, amás de nes marches feministes qu’adoptaron la mesma idea pa les sos movilizaciones.
La organización señaló amás que Flórez nun pudo participar anguaño nes movilizaciones por cuenta del cáncer que carecía y aseguró que’l so recuerdu va permanecer presente “cuando les panderetes empiecen a ruxir nuna manifestación”.
“Yá formes parte de la tradición coles tos cuartetes”, conclúi’l testu de despidida difundíu pola XDLA.
El sindicatu SUATEA siente un dolor bien grande cola perda de Delfina, “foi una militante destacada y perteneció al so secretariáu, y siempre foi una muyer dispuesta con tolo que tuviera que ver cola defensa de la escuela pública”. “Los movimientos sociales asturianos pierden a una militante siempre dispuesta a sumar” afirmen dende SUATEA.
