Aína algamó nos cuatro primeros díes de campaña’l 70% del oxetivu afitáu na so iniciativa de crowdfunding pa poner en marcha la so nueva sede social, asitiada na cai San Pedro Mestallón, 11, n’Uviéu. Trátase d’un proyeutu col que’l partíu busca reforzar la so estructura organizativa de cara a un añu eleutoral que considera decisivu.
Pa la formación, “la sede va más allá d’una simple necesidá lloxística: ye l’espaciu onde recibir a la militancia, producir propuestes polítiques y sirvir de puntu d’alcuentru pa quien comparte la idea de qu’Asturies precisa un proyeutu políticu propiu”.
L’oxetivu mínimu va destinase a iguar el llocal: mobiliariu básicu, pintura y encuriosamientu, instalación llétrica, equipamientu informáticu, conexón a interné, rotulación esterior, material d’oficina y l’adecuación del bañu y la calefacción del espaciu. Si la campaña algama los 10.000 euros, Aína va ampliar la dotación con equipamientu empobináu a la comunicación y l’actividá pública: sistema de seguridá, equipu de grabación y soníu profesional, un pequeñu estudiu, proyeutor pa eventos y material p’actos na cai, como atriles personalizaos y roll-ups.
El recursu al micromecenazgu respuende, amás, a un criteriu de xestión, señalen dende Aína: “financiar la sede ensin restar recursos a l’actividá política diaria del partíu, construyendo esti espaciu dende’l compromisu coleutivu de quien forma parte del proyeutu y de quien se siente identificáu con él”.
