Por fin llegó l’AVE a Asturies. Dicen que tamos a tres hores de Madrid, a escases cinco horuques de Valencia o de Sevilla. Dica poco, hasta vamos tar cerca d’Ourense (lo que resulta una suerte bárbara). ¿Alcuérdense vustedes cuando llegar a a Uviéu dende Ibias , dende Grandas o dende Os Oscos podía durar, guapamente, seis o siete hores? Aquella xente compañero mio de la Universidá, naquellos años 80, que veníen a primeros de mes cargaos de la comida prevista, y que teníen que pagar pisu n’alquiler, yeren ensin dulda los que más teníen qu’apechar simplemente por estudiar. Ente ellos y elles, ye verdá, abondaben los que teníen dalgún tipu de beca. Los qu’estudiaben bien, y consiguíen dalguna bolsa d’estudios, podíen estudiar con munchu esfuerzu de la familia. Vendíase un monte pa que saliera una médica, una inxeniera, una abogada.
Falo del estremu occidente, pero poder podía falar de Tinéu o Cangas: ganábemos unes hores, pero llegábemos igualmente precíos. Una de les vares de midir de la miseria –o la riqueza– ye la de la distancia. Contra más llonxe se tea de los centros del poder, más probe se ye. Si’l Carboneru nun rulaba, yeres más probe.
La xente d’Ibias odiaba Tinéu, onde los autobuses se demoraben nunca se supo a razón de qué. El casu ye qu’ayeri abrióse’l traxectu del AVE y ello trai grandísimes oportunidaes. Dícennos que tamos a malapenes tres hores de Madrid –cuando yá tábemos a cuatro y picu—y ello ye oxetivamente verdá; pero ello, pienso yo, nun ye lo importante por muncho que vaiga ser determinante. Una cosa ye lo importante –lo que-y convién a la sociedá asturiana—y otro lo que vaiga asoceder, que ye lo determinante.
D’un llau, ¿qué ye lo que pasa cola ZALIA? Pues que sigue en niciu, por nun dicir en sombra. Preguntaránse los llectores que ye la ZALIA. Basta con contar y pegar de la páxina web del cosu: “ Zalia, S.A. es una sociedad de capital enteramente público que se constituyó en 2005 como instrumento para llevar a cabo uno de los grandes proyectos estratégicos de la Asturias del futuro: posicionar al Principado como eje fundamental del Arco Atlántico impulsando la actividad logística como factor clave de competitividad con la creación de una importante zona industrial en Asturias con conexiones multimodales.”
Eso de la ZALIA anda per hi onde Sanandrés de los Tacones, cerca del Musel y ensin comunicación col AVE.
¿Qué mercancíes de los puertos de Xixón y Avilés van treslladase pente los Urales solombriegos que separen Sanandrés de los Tacones y La Pola L.lena? Pues supongo yo que los mesmos que se treslladaron hasta agora: per ferrocarril convencional unos pocos, per barcu y carretera unos pocos más. La distancia al centru del poder sigue siendo, nel sieglu XXI como na Edá de Fierro, un factor de d’inxusta compensación económica. Cuesta pensar que l’arribada del AVE nun viniera acompañada por un potente apueste económicu pola ZALIA, con una llanzadera potente y eficaz.
Agora bien, quédanos lo nueso. Per primer vez na Historia abolióse la distacia que nos impidió a asturianos y lleoneses ser nación. Esos montes firmísimos, afuracaos per un tunelón que nos permite llegar en media hora a la ciudá de Lleón, yá nun son tan firmes. Depués de tantos sieglos, l’hibiernui nun nos separa.
¡Dir a Lleón a tomar el vermut! A Madrid llega culesquiera que tenga gana de dir, ¡pero a Lleón! Siempre defendí una comunidá autónoma d’Asturies, Lleón y Zamora, el territoriu onde inda hai xente que fala como yo.
Bienllegáu l’AVE que nos permite tar en media hora en Lleón.
