Esti fin de selmana van tener llugar les primeres xornaes entamaes pola Academia del Cine Asturianu. La entidá creóse en 2018 col envís de promover, esparder y sofitar la producción audiovisual n’Asturies, de manera que s’impulsare la industria cinematográfica, se reconociere’l talentu llocal y se fomentare la formación y collaboración de los profesionales del ramu. Con estes xornaes, poro, l’Academia da un pasu acullá na muestra pública del so llabor.
La mañana d’apertura va cuntar con intervenciones como les de Graciela Mier, presidenta de la entidá; l’expresidente Gonzalo Mañana col so informe sobre la situación actual, o Maxi Rodríguez y Carlos Navarro; asina como con una mesa redonda sobre animar cine pa grandes compañíes dende Asturies, na que van tar artistes como’l dibuxante de cómic javier Rodríguez.
De tarde, otres dos meses redondes van tratar sobre la educación y la formación nel sector audiovisual (con profesionales como Marcos Merino o Celia Cervera) y sobre la fuerte tradición de cine documental que s’estableción n’Asturies dende la década de los 2000. Tamién hai espaciu, nes Xornaes del Cine Asturianu, pa la proyección de cine fechu n’Asturies, como ye por casu la I Muestra de Cine Escolar «Esta escuela ye de cine», fecha en collaboración con la Oficina de Normalización Llingüística de Xixón, que va poder vese a última hora de la mañana.
La mañana de domingu ta dedicada a una mesa redonda alredor de la programación y el so impactu nel ecosistema audiovisual asturianu («Impactu y repercusión de festivales, televisión y ciclos de cine n’Asturies», moderada por Luis Pascual), y va cerrase con una conferencia sobre bandes sonores del compositor uvieín Jorge Granda («Música de cine: La banda sonora como elementu constructivu de la hestoria»).
