Si hai nel Estáu español un tema recurrente y permanente al traviés del tiempu ye’l de la so construcción territorial y, como se diz agora, l’encaxe de les distintes sensibildaes nacionales que se dan nél. Una cuestión presente y tratada fondamente nos últimos años del réxime franquista y primeros de la llamada Transición. Naquel periodu, el PCE y el PSUC, sollertes como taben a la política d’aliances y a nun ser apartaos del yá inevitable procesu democráticu que diba llegar, teníen un programa moderáu nesti asuntu: restauración de los tres estatutos d’autonomía de la II República (Catalunya, Euskadi y Galicia) y referéndum sobre la forma d’Estáu, pero ensin defender abiertamente’l derechu d’autodeterminación. Per otru llau, una serie de formaciones socialistes territoriales (catalanes, valencianes, mallorquines, vasques, aragoneses, andaluces, gallegues, canaries…) agrupaes na Federación de Partidos Socialistas, defendíen un estáu federal con un enclín cásique llibertariu, inspiráu na I República. Mentanto, pela so parte, el PSOE nel Congresu de Suresnes (1974) apoyaba’l derechu d’autodeterminación pa les nacionalidaes y una autonomía amplia pa les que denominaben «regiones diferenciadas», concluyendo que: «La definitiva solución del problema de las nacionalidades que integran el Estado español parte indefectiblemente del pleno reconocimiento del derecho de autodeterminación de las mismas que comporta la facultad de que cada nacionalidad pueda determinar libremente las relaciones que va a mantener con el resto de los pueblos que integran el Estado español». Esta posición diba camudar dafechu nel siguiente Congresu (Madrid, 1979), nel qu’arrenuncien a la configuración d’un Estáu federal y desapaez del so ideariu’l derechu d’autodeterminación. Un añu enantes aprobárase la Constitución pola que se creaba un réxime territorial autonómicu pa les «nacionalidaes y rexones».
La Constitución nun acabó col problema territorial, cenciellamente pospúsolu un tiempu pero siguió y sigui ehí. Los resultaos de les últimes elecciones xenerales son bona prueba d’ello: el PP llogró 137 escaños y Vox 33, mentanto’l PSOE algamó los 121 y Sumar 31; los 28 escaños restantes foron a parar a partíos de calter territorial (rexonalistes o soberanistes). Amás, de los consiguíos por Sumar, 5 pertenecen a En Comú Podem, 2 a Compromís, 1 a Més per Mallorca y 1 a Chunta Aragonesista. Otra vuelta más, les urnes son testerones, o se gobierna en clave plurinacional o lo fai’l nacionalismu español escluyente. Nesti sen, tolos pasos que se dean na llexislatura presente, de dalguna manera, van tar condicionaos poles llamaes axendes territoriales (catalana, vasca, gallega, balear, aragonesa, valenciana…). Si la llexislatura pasada púnxose atención na cuestión social, nesta va ser la territorial la protagonista, con asuntos como’l nuevu sistema de financiación autonómica, la llei en favor del plurillingüismu, una reforma electoral que favoreza la diversidá y nun tienda al bipartidismu, el trespasu de competencies alministratives a los territorios… Y, finalmente, el reconocimientu políticu esplícitu de les naciones qu’acueye l’Estáu español.
El nacionalismu español fixo qu’en Madrid se xenerara una especie de conglomeráu d’élites empresariales, polítiques, xudiciales, alministratives, mediátiques, etc., con un esquema mental madrilanocéntricu, nel qu’absolutamente too tien que pasar per ellí pol simple fechu de que ye la capital del Estáu. La única xeopolítica que da significáu a Madrid ye namás la so capitalidá y too se subordina a ello. Esti centralismu desaforáu tien como consecuencia la perda de recursos económicos y humanos bultables p’aquellos territorios más «periféricos». Un casu paradigmáticu ye, por exemplu, qu’esta mentalidá radial esclusivamente madrilanocéntrica ta condicionando y aprovechando al so favor exes de desarrollu económicu qu’habríen de valir pal nuestru posicionamientu y medría, a saber: el corredor atlánticu-cantábricu, qu’articularía Portugal, Galicia, Asturies, Cantabria y Euskadi con Francia y Europa. Esti ye solo ún de los munchos aspectos que nos inflúin negativamente por culpa d’una manera de pensar y actuar siempre dende Madrid, pero col beneplácitu y la conformidá de les élites (económiques, politiques, mediátiques, culturales…) asturianes, frutu del so siguidismu y los sos complexos.
Nesti contestu nel que la territorialidá va ser una cuestión fundamental ye dable preguntase ¿qué papel va xugar Asturies? Vivimos dende hai tiempu un intentu per parte de Barbón de convertise nel referente del asturianismu, aprovechando cualquier oportunidá pa que la sociedá lu visualice asina, ta asesoráu por xente que vien d’esi mundu y nótase; esta apuesta ye más de calter personal que como una estratexa asumida mayoritariamente na propia FSA. Per otru llau, la izquierda alternativa asturiana nun acaba d’interiorizar dafechu esti asuntu, como sí lo fixo, por exemplu, col feminismu, l’ecoloxismu o los derechos LGTBI. Si queremos qu’esti espaciu políticu tenga personalidá propia a nivel estatal y autonómicu hemos de convertir l’asturianismu nún de los sos exes centrales, apostando por una visión del mesmu global que trescienda la cuestión esclusivamente llingüística, ufiertando un modelu de país, con un proyectu claru y definíu: integrador, tolerante, respetuosu cola llibertá idiomática, tresformador de la identidá en progresu económicu, internacionalizador de la Marca Asturies… Vienen tiempos nos que la llamada ‘guerra cultural’ va ser central nel terrén politicu y hai que decidir qué función queremos desenvolver nesi procesu: como ún de los protagonistes o como simples espectadores. Yo apuesto pola creación d’un Polu Popular Asturianu qu’axunte voluntaes y sensibilidaes diferentes pero complementaries, que pueda llegar a alcuerdos con otres fuercies estatales pero calteniendo la so independencia orgánica, qu’ufierte un discursu autocentráu y un asturianismu maduru. L’éxitu de llibros como No hay país de Xuan Cándano o Nunca vencida de David Guardado muestren qu’hai gana d’Asturies nun sector curiosu de la sociedá asturiana, hai tamién nella una segmentu nuevu ensin los prexuicios de les xeneraciones anteriores. Aprovechemos estes circunstancies y pongámonos a trabayar nello. Tamos nel empiezu de la llexislatura, tanto nel Estáu como n’Asturies, polo qu’hai tiempu pa dir entamando esi proyectu que ponga l’axenda asturiana enriba de la mesa y lleve a consiguir que’l nuestru país tenga voz propia na cuestión territorial.
