Apaecieron los mazcaritos, como tromba d’agua, pela cai Nueve de Mayo, que conmemora la revuelta del pueblu uvieín en 1808 al desacatar el bandu de Murat. Naquel tiempo entá se veíen mazcaritaes per toa Asturies; tamién na capital, nun solamente n’Antroxu sinon tamién nel Día del Corpus y n’ocasiones especiales como la rellatada, nos caberos años del sieglu XVIII, pola poeta Xosefa Xovellanos nes sos cróniques al rodiu de la proclamación de Carlos IV. “Dixe yo si el día del xuiciu / será naquesta semana”, dicía la lliterata, y lo mesmu paecíen pensar quienes paseaben peles Saleses al atopase con tola danza. Y ye que l’actividá lleva faciéndose namái dende l’añu 2017 -col paréntesis de la COVID ente medies-, porque estes mazcaritáes foron desapaeciendo adulces a lo llargu de los sieglos XIX y XX, mal vistes como taben, primeru, pola Ilesia; y, dempués, pol franquismu.
Anguaño, la tradición vuelve a les cais gracias a l’asociación ‘Mazcaritos d’Uviéu’. Esti día enterraben a la Sardina, muerta -taba visto- por una sobredosis de pélets y llorada por la madama y les plañideres, que dieron en recordar, a lo llargu de tol percorríu, lo muncho que quixeren a la difunta, ‘con o ensin llata’. Yera tanta la pena que tresformábase, al plural, en ‘penes’, como glayaben les vieyes, y el cura, recordando lo ‘salada que yera y lo buena que taba’, mandaba pesllar les tiendes, parar los coches, marchar pa casa, nun prender la televisión y respetar a la familia de llutu. Mientres que llanzaba requiebros, porque lo cortés nun quita lo valiente, a la fotógrafa de NORTES Analía Pello. Subversión n’estáu puru, porque eso ye l’Antroxu.
La caravana fúnebre marchó con buen ritmu peles cais de la ciudá, cola destrozona -asina ye’l nome de la ‘bruxa’ mazcaritada que marcha a ritmu d’escobazu, toquilla y mandilón- alterando l’orde públicu y la rollona, símbolo de los neños malcriáos de les clases altes, encaprichándose de cualesquiera cosa que viera. El momentu cumal diba llegar, ¡malamán la casualidá!, na cai Cimadevilla, precisamente frente a la placa que recuerda la revuelta uvieína del añu ocho. Ehí los soldáos mantearon mentres un buen ratu, embaxu de les lluces qu’inviten a honrar al Antroxu y lliberar les ánimes enantes de les restricciones de la Cuaresma, el pelele. Una tradición que yá dexó documentada Goya en 1792 y que güei, gracias al puxu de ‘Mazcaritos d’Uviéu’, col polifacéticu Ánxel Nava como cabezaleru, vuelve a revivise nes cais de la capital. Y pa durar.
