El presidente del Principáu, Adrián Barbón, consideró esti martes imprescindible adoptar midíes concretes que fomenten l’usu del asturianu y del gallegu-asturianu en toles estayes de la vida pública y privada y dixo que n’esa xera ye clave el llabor de los servicios de normalización llingüística p’asegurar que siguen siendo llingües vives y presentes en tolos espacios de la sociedá.
Barbón, que fizo estes afirmaciones en Bimenes mentres la constitución pa esta llexislatura del Conseyu de la Rede de Normalización Llingüística, a la que yá se xunieron más de 40 conceyos y entidáes tres de la incorporación de la Universidá d’Uviéu, un actu que foi’l primeru de calter públicu al qu’asistió la nueva conseyera de Cultura, Política Llingüística y Deportes, Vanessa Gutiérrez.
Nun discursu pronunciáu n’asturianu, el xefe del Executivu señaló qu’estos servicios de normalización son fundamentales pa la supervivencia de llingües amenorgaes y nun solo eviten la so desapaición o deterioru sinon que promueven el so usu veceru y contribuyen asina a una igualdá real ente l’asturianu y otres llingües del territoriu “reforzando la cohesión social”
Al so xuiciu, la so eficacia salta a la vista nun conceyu como Bimenes que, tres de declarar la cooficialidá nel so territoriu de manera simbólica, ye un exemplu emblemáticu nel que’l Conceyu tá rotuláu en castellán y n’asturianu y que, anque haya a quien nun-y preste esi usu normal del idioma sí cuenta cola simpatía de la mayoría de la sociedá asturiana.
“Y a min, confiésolo, préstame ver que la llingua de los mios güelos, la del mio entornu, sigue viviendo y sirve pa que tolos asturianos sepan igualmente ónde ta’l despachu d’un xuez o d’una xueza, asina, n’asturianu, o la xefatura d’estudios”, remató.
