Un bon garrapiellu de docentes de la zona centro oriental d’Asturies ta acabante constituyise n’asamblea pa reivindicar que se faigan efectives demandes llaborales urxentes que reviertan el deterioru que la educación vien sufriendo nos últimos años. “Dende les instancies polítiques nun fae otro que falase de la calidá de la educación ensin que se tenga en cuenta que pa una enseñanza pública de calidá ye imprescindible que’l profesoráu cuente con unes condiciones llaborales dignes”, informen dende la asamblea en nota de prensa.
Sicasí, señálase na nota, “la respuesta de l’alministración educativa ye incrementar la carga burocrática del profesoráu, menguando’l tiempu disponible pa exercer la so profesión: enseñar”. Al empar, remarquen cómo’l “cansanciu y la indignación de la comunidá educativa rescampla cada vez más, ensin que s’atienda a les demandes que dende’l principiu de cursu la Xunta de Personal Docente punxo enriba la mesa a la Conseyería d’Educación”.
Les demandes más urxentes pa esta asamblea son: aumentu de plantilles; baxar ratios; reducir medies xornaes; equiparación salarial; acabar cola burocratización; cuerpu únicu docente, y recursos materiales y de personal pa l’atención a la diversidá. “La nuestra intención ye entamar movilizaciones col oxetivu de que la Conseyería d’Educación dea respuesta a unes reivindicaciones básiques pa garantizar unes condiciones llaborales dignes ente’l profesoráu y una enseñanza de calidá real”, esponen.
Dende esti espaciu, añédese, quieren “facer evidente la indignación del profesoráu énte la inacción de la Conseyería d’Educación, qu’únicamente s’avino a regular unos días d’asuntos propios con tales restricciones que se convierten nun “derechu” bien abegosu d’exercer pa bona parte de la comunidá educativa”.
Na hai asamblea hai presencia, hasta’l momentu, de docentes procedentes de los siguientes centros: CP de Martinporra (Bimenes), IES Sánchez Lastra (Mieres), CRA La Coroña (Cecea), IES Peñamayor (Nava), CP San Bartolomé (Nava), CP Salvador Vega Berros (Sariegu), IES Infiestu, CP Xentiquina (Lieres), CPA Nalón, IES El Sueve (Les Arriondes), IES Avelina Cerra (Ribadesella), IES Víctor García de la Concha (Villaviciosa), amás de profesoráu interín ensin adscripción pel momentu a nengún centru.
L’interés común baxo’l que se conforma esta asamblea ye “dar respuesta clara a unes demandes más que xustes que diben repercutir nuna meyora real de la educación, que nun pasa, como parez pretender l’alministración, por enllenar los centros educativos de papeles que falen de tolo que se va facer, ensin qu’haya tiempu nin condiciones pa facelo”.
