Na seronda del añu 2010 hebo un conceyu de la UAR (Unión Anarquista Revolucionaria), enantes o dempués del so VII Aniversariu -6 de payares-, onde llueu de siete años d’actividá mos fiximos una entruga fundamental: “¿Cómo maxinamos que furrula esa sociedá anarquista pola que tanto naguamos, y pola que facemos tanto proselitismu?”
Daquella yo tenía 21 años. Nel añu 2003 tresformemos un coleutivu anterior que montáremos precozmente, el GAR (Grupo Anarquista Revolucionario), col envís d’axeitar una cadarma de coordinación llibertaria -cuando esti términu tenía un xeitu precisu-; qu’aidase a l’autoorganización de munches, y non solo d’un grupu. Aquella entruga yera pertinente -siempres lo foi- y cobraba un sentíu -cuasi de risotada de los dioses-, pola nuesa participación n’eventos que desembocaron nel 2011 nel 15M. 15M: conglomeráu de munches, espontaneidaes y non tanto, pero firme y enllenu vida. Cuando falo de la risotada de los dioses ye polo oportuno del momentu de la entruga. Y como resultáu inmediatu, encaremos aquel procesu quincemayista cola nuesa disolución. Agora diré a ello.
Habrá quien piense, ¿qué tienen de ver socesos de va más de diez años, o coleutivos daquella, con un ciclu alcuentros entamáu por un grupu d’investigación nel 2024?
Como vos dicía enantes, aquella organización anarquista qu’entós diba pol so octavu añu vida, y anque nun ye momentu d’hestoriar esto agora, foi relativamente importante en dellos momentos y en delles partes del Estáu. Por poner dalgunos exemplos: Participó na revuelta de Barcelona del 2004 tres l’asesinatu de Roger; foi quien a crear espacios alternativos nes 3000 Viviendes de Sevilla; protagonizó con otros l’intentu de creación d’una coordinadora llibertaria en Madrid; o impulsó la okupación de La ReFLEXón en Xixón. Too ello pue sirvir d’exemplu pa compartir la dimensión de la mesma, al tiempu que pue sosprender a daquién que s’autodisuelva siendo una organización consolidada. ¿Por qué finemos cola vida de la UAR en mayu de 2011? Básicamente en rempuesta a la entruga que recoyía al entamu’l testu.
Si una organización anarquista tien como oxetivu que les xentes s’autoorganicen llibremente, y estes yá lo tán faciendo na cai, ¿Por qué caltener un coleutivu cuya finalidá yá taba algamada? Foi un alderique’l d’esi conceyu bien prestosu, pues enfrentaba ente sí “les formes” cola “ideoloxía y la militancia”. Les formes (llibertaries) convidábenmos a desfacer aquel coleutivu ensin aparar la nuesa actividá individual y coleutiva. Pero yá non nesi continente que yá cumpliere cola so xera. ¿Por qué? Porque qué deshonesto sedría pa los nuesos principios -como individuos y como coleutivu- dir a una asamblea (la del 15M) cola argumentaria fecha. Con una asamblea de preparación coleutiva previa, al marxe de la resta. A eses asamblees populares teníemos d’intentar dir como vecinos y vecines toes, non como representantes de denguna ideoloxía, militancia o coleutivu dengún. Porque’l de nueso, yéremos conscientes, nun yera un coleutivu o organización asociativu, temáticu; yera ideolóxicu, yera axitador. Poro, los nuesos integrantes participaron d’aquelles asamblees quincemayistes pa nutriles y coparticipar, y alcordar igualmente n’horizontalidá dafechu, non pa facer propaganda, nin del coleutivu nin de denguna ideoloxía. L’únicu proselitismu que cabía yera’l de facer y actuar conforme a aquella entruga del 2010.
Cola disolución de la UAR, la mayor parte de les persones que participemos d’aquella, y otres, entamemos un grupu trabayu n’Asamblea Popular de Alcalá de Henares que llamemos “GT Recuperando Nuestros Espacios”. Un GT cuya filosofía yera “Pensar y Facer, Facer y Pensar al tiempu”. Cuyes responsabilidaes yeren la creación d’espacios reales de tresformación social. La coordinación del entramáu social que diba surdiendo na ciudá, ente otres. Muncho de too ello pue vese nel documental “ADH (Re)Encuentros” (https://cultinectare.wixsite.com/adhreencuentros)
Por dicilo de dalguna manera yera’l grupu trabayu de “les condiciones de posibilidá”, cuyo pensamientu se pue resumir en dos artículos:
- “Por una filosofía activa y vivida” https://codigo288.wordpress.com/2013/06/15/por-una-filosofia-activa-y-vivida/
- “Hacer la Realidad”
http://www.archivodelafrontera.com/wp-content/uploads/2015/09/Hacer-la-realidad.pdf
Como podéis pescanciar, el títulu del Ciclu tien de ver cola alcordanza a aquel procesu tremendamente positivu.
¿Y qué fexo RENE (Recuperando Nuestros Espacios) cuando l’entramáu social y vecinal d’Alcalá de Henares taba en marcha y l’autoorganización social yera un fechu?: Efeutivamente, disolvióse. La xera taba fecha.
Paralelamente y yá apuntando’l percorríu postRene que vendría cola so disolución en 2014, en setiembre de 2012 decidimos creyar el GIMEC (Grupo de Investigación Multidisciplinar en Estudios Culturales). El GIMEC creyémoslu como un axente de tresformación cultural. Allugáu pol Centro Europeo para la Difusión de las Ciencias Sociales que surdió nos años 90 con un xeitu asemeyáu, con direutor asturianu, punximos el grupu a trabayar con dos másimes: Diba ser d’Estudios Culturales por “atender a les rellaciones del too” (a les formes), y multidisciplinar por ser la multidisciplinariedá una representación en sí mesma del conocimientu. El continente (la Cultura) permitía abordar cualesquier temática; y el conteníu (Multidisciplinar) permitía la participación de cualesquier, independientemente del so orixe académicu.
Trés pegollos fundamentales: La Investigación (pensar), La Intervención (facer) y la Docencia (Pensar-Facer). Pue consultase l’actividá del GIMEC equí:
L’alcordanza pa nós tien sentíu. Llevemos un tiempu cola sensación de que yá nun mos sentimos (en denguna de les posibles aceiciones del términu). Vemos enguedeyos qu’aprucen con facilidá plasmosa, mientres les xentes paecen más querer falar, aldericar, conversar, reflexonar a comuña o construyir, qu’andar a la griesca. Esmolecíes, de xuru, polos devenires inciertos que s’averen. Ven con vergoña los espectáculos llamentables de los estremaos espacios políticos que s’apresenten a la sociedá. Los discutinios, les intrigues, los desmanes, les faltes de respetu, les acusaciones, los insultos, les pelees insostenibles; toes estes aiciones son refugaes en xeneral pola sociedá. Mancámonos a nós mesmes, ente nós y a la sociedá a la qu’interpelamos.
Ven con cierta incertidume la escena sociopolítica. Hai quien, a mou nihilista, desafía la suerte y decide nun s’implicar porque “son toos y toes iguales”, porque “nun cumplen lo que dicen”, “porque nun faen más que pelear mientres mos la meten doblada”, “porque los voté una vez y yá valió”, y una bona riestra de frases feches de tonu asemeyáu.
Dicía Nuria Rodríguez, participante nel primer alcuentru “Democracies, Llendes y Tolerancies”, entamáu pol GIMEC y cola collaboración del Ecomuséu La Ponte, el pasáu 3 de xineru; que paez que les dreches (entendíes nun sentíu perampliu), puen facer lo que-yos dea pola gana, mientres que les izquierdes (tamién entendíes nun sen perampliu) han de cumplir estándares morales, éticos… que les xentes desixen atender con mayor firmeza. Y ye normal. Les izquierdes preséntense como garantes de la seguranza real, de los intereses de les clases populares, d’aquelles persones que claramente nun pertenecen a una estaya privilexada de la sociedá. Les dreches arrepresenten tradicionalmente al privilexáu, a quienes fixeron les sos fortunes, o algamaron una determinada posición, aprofitando les desventayes y situaciones d’abusu perennes de poblaciones enteres.
Veníemos de procesos constructivos. D’escucha y creación. De creatividá enforma. Y güei sucumbimos a les piores formes. Perdimos los espacios y probablemente a nós pel camín. Seya por deceiciones, frustraciones, impotencies, incomprensiones, erros, quemazón… Seya polo que fuere, lo cierto ye que si caltenemos un mínimu d’enfotu por otros mundios posibles, bien debiéremos recomponemos de nuevo y miranos fixamente col envís de reconocenos. Quiciabes reformulando la entruga del entamu: ¿Cómo maxinamos que furrula la sociedá pola que naguamos? ¿Qué formes son les que s’exercen nesa sociedá maxinada? Porque si atendemos a ello ciertamente, vamos poder retomar el cursu del presente; sinón, pienso que mos tragará l’apisonadora, siempres activa, de Los de Siempres.
Énte esta radiografía superficial y resumida pensamos que lo meyor ye, como quien diz, tornar pal entamu. Repensanos y reflexonar a comuña; articulanos y coordinanos en tresformación; creyar nuevos mundios posibles. Asina, dimponemos pal 2024 y 2025 una riestra d’alcuentros ente diferentes que permitan aldericar constructivamente, nesti casu, sobro temes estructurales. Ponemos darréu los alcuentros pensaos pa esti 2024:
- 3 de xineru 2024: Democracies, Llendes y Tolerancies (Xixón)
- 22 de marzu 2024: Nacionalidaes, Territorialidaes y Modelu d’Estáu (Uviéu)
- Xunu 2024: Los Retos de los Feminismos: La importancia de les formes y los curiaos (Mieres)
- Setiembre-ochobre 2024: Ecosistemes, ecoloxíes y retos climáticos (La Pola Llaviana)
Estos alcuentros nun pretenden facer aldericar ente xentes autoconvencíes del so propiu discursu, sinón que pretende aldericar y en munchos casos esclariar conceutos que paez necesario recordar. Falar de conflictos. Iguar perceiciones terxiversaes. Llimar aspereces. Iguar malos entendíos. Ser conscientes de contradicciones de discursu. Saber contestualizar momentos, pulsiones y emociones. Y ser, en realidá, más intelixentes que quienes lleven 10 años intentando enfrentar a unos pueblos que se vieron les cares na cai, nes places, y punxeron en xaque en bona midida al estáu-de-coses-imperante. Esta fras cabera, pue abultar grandilocuente, pero namái había de ver cómo tatexaben dalgunos en mayu de 2015.
Per otra parte, los alcuentros del Ciclu “Recuperando los nuesos espacios” de 2025, puen ser treslladaos y adelantaos a 2024, si dexamos perbién arreyaes les xeres d’esti añu. De mano pensamos, que ye dable. Tamos zarrando yá’l de Feminismos, colo que ye factible na seronda d’esti añu facer dalgún alcuentru que taba pensáu pal añu que vien.
Quinxéremos de toles maneres anunciar tamién nesti testu que tres del primer alcuentru en Xixón, hebo quienes mos pidieron que fixéremos daqué asemeyao centrao nel conceyu playu. D’esta mena se mos trelladó en xineru la posibilidá de facer un alcuentru ente diferentes esmolecíos pola movilidá. En primer llugar, préstanos que se vean estos alcuentros como útiles, y ye por ello que mos comprometimos a estudiar la idea con una propuesta amestada: Esi alcuentru tará encadarmáu sobro los problemes y conflictos qu’esisten nesa tema nel Conceyu. L’alcuentru de movilidá en Xixón ye probable que se faiga sobro’l mes de mayu. Pero, nun se quedará ehí. Tres del alcuentru, el nuesu enví ye creyar una Mesa de Movilidá en Xixón onde tean presentes los axentes del conceyu ya individualidaes interesaes, cola fin de xenerar propuestes y midíes coleutives que se faigan realidá en Xixón -independientemente de quien gobierne-. Una amuesa del sentir d’estos alcuentros territorializaos en conceyos, ye mesmamente l’entamáu por Fame Poétika sobro Cultura en Xixón, onde camentamos que podría facese, igualmente, una Mesa de Trabayu de Cultura en Xixón colos axentes ya individualidaes interesaos. Ye dicir, dende’l nuesu puntu vista, nun puen quedar les reflexones, les tensiones, les idees, les denuncies, etc., en versos al eire, comíos pol bastiu del momentu. Creyemos que ye importante reflexonar a comuña, pa trabayar dempués a xunteta.
Pa finar, déxovos darréu los alcuentros pensaos pal II Ciclu de 2025, pues habrá probablemente dalgún que seya adelantáu al 2024.
- Xineru-febreru 2025: Demografíes (Santo Adriano)
- Marzu-abril 2025: Les perspeutives de la mocedá (La Pola Siero)
- Mayu-xunu 2025: Sindicalismu y tresformación social (L’Entregu)
- Setiembre-ochobre 2025: Intelixencia artificial y TICs (Villaviciosa)
- Payares-avientu 2025: Rellaciones internacionales, política esterior y migraciones (Llangréu)
Ye claro qu’hai milenta temes que tratar, y milenta territorios onde descentralizar, pero de mano, pali que pali, vamos intentando construyir. Si hai dalgún camientu podéis escribir a [email protected] meyor que [email protected]
Y pa finar, y por exemplificar o ilustrar la forma na que tenemos pensaos los alcuentros, mesmamente nel de “Perspeutives de la mocedá”, nun tenemos pensao que participen “xentes que saben lo que-yos pasa a los mozos y moces”; o “espertos o espertes na materia”; o “mocedá que nun ye tala”. El nuesu envís ye que participen adolescentes.
Esperámosvos a más tardar, el 22 de marzu nel Salón d’Actos de la Biblioteca d’Humanidaes d’El Milán (Uviéu) col alcuentru: Nacionalidaes, Territorialidaes y Modelu d’Estáu.
