Participar n’equipu, conocer les tradiciones y cantar y baillar col asturianu como llingua vehicular foi, como tolos años, l’oxetivu del XI Día de la Reciella, cellebráu mentres tola mañana d’ayeri nel Muséu del Pueblu d’Asturies de Xixón. La cita, presentada baxo’l eslogan ‘Col Asturianu xugamos n’equipu’, cuntó tamién col desendolcu d’Entaína, la VI Carrera Familiar pol Asturianu.
Tuvieron presentes tamién empreses qu’usen l’asturianu nel día a día,con stands como’l de Ediciones Trabe, que presentó toles novedáes editoriales pa la reciella, reivindicativos como’l d’ADAE; Díes Adulces, de fotografía familiar o de llambionáes como Panduru. Tóos ellos, y sobremanera les y los guah.es presentes, foron testigos de les llocures de los Sidros, a cargu de los Sidros y Comedies ‘El Cencerru’, d’unes olimpiáes asturianes y d’un vermú musical.
El momentu más emotivu vieno de la manu d’unu de los referentes pa la pedagoxía del asturianu pa la reciella, Nacho Fonseca, creador de ‘Xentiquina’, que subió al escenariu yá de tarde, p’acompañar al conciertu ‘Canciones pa la Xentiquina’, d’Alicia Álvarez y David Varela. “Fonseca ye hestoria recién d’Asturies”, aseguró Álvarez. Una hestoria que, gracies a díes como’l de la Reciella, pueden siguier conociendo les xeneraciones más nueves.
