Un viaxe pela memoria de los sos familiares foi lo que llevó al cineasta Pablo Casanueva (Ribeseya, 1995) a crear Luna, una película de 76 minutos de duración que va tener el so estrenu mundial na seición Retueyos del Festival Internacional de Cine de Xixón (FICX). Una imaxe cuidada, detrás de la que s’esconde un llargu trabayu d’investigación hestórica, dan a Luna -que garra’l nome del nomatu de la familia de Casanueva) el calter d’un auténticu filme documental al traviés del cual se recupera la hestoria d’un pasáu rotu pola represión y l’esiliu.
L’autor fala con nós sobre esti procesu que güei, por vez primera, ve la lluz cola estrena n’esclusiva en NORTES del tráiler de Luna.
Luna surde d’un primer recuerdu: la to má cuntando, con naturalidá y distanciamientu pero tamién con señardá, el fusilamientu del so tíu güelu Ramón. ¿Cómo vive un guah.e de curtia edá esta tresmisión interxeneracional? ¿Cómo marca al Pablo Casanueva d’anguaño?
Ye impactante, mui impactante, que te cuenten qu’un familiar tuyu, por mui llonxanu que seya o anque nun lo conocieres, fore asesináu. A mi lo que me xeneró foron entrugues: ¿Por qué lo fusilaren? ¿Cuáles yeren les razones? ¿En qué contestu? ¿Ónde taba? ¿Cómo yera? Y, de dalguna manera, foi un detonante pa año dempués volver a conectar con esi testimoniu que me contara mio madre, facer una investigación más profunda y poder responder a eses entrugues que ya me surdieren de críu. Marcóme directamente nestos últimos tres años por tóu esti momento vital que foi facer la película, pero tamién foi como un percuntiu más no que ye’l funcionamiento políticu vital. Na mio casa, la política siempres tuvo presente; la visión crítica de la realidá, de dalguna manera. Esti fechu acentuaba una conesión col pasáu, colos familiares que tiníen tamién esi posicionamientu políticu, o eso me paecía pensar. Y dempués comprobé que sí, que yera así, que tamién ellos tiníen una mirada crítica al mundu nel que vivíen.
La primera fás de la investigación, quiciás cuando tovía nin siquiera yeres consciente de tar faciéndola, foi acércate a les semeyes de los Luna, que tamién s’amuesen nel film…
Sí, ye ciertu. Yo nun yera consciente de que lo que taba faciendo podía convertise nuna película hasta bien entráu nel procesu d’investigación. Y les semeyes foron, dempués d’esi testimoniu oral del fusilamientu de Ramón, la puerta d’entrada. Gracies a elles entamé a poner rostros a dalgunos de los personaxes y sobremanera a tratar de buscar les identidáes que nun conocía. Había munches semeyes nel archivu que mio güela y mio madre conservaron que nun sabía de quién yeren, pero que tuvieren metíes nesi álbum amosaba que yeren importantes. Que en dalgunos momentos de la vida familiar habíen sido persones queríes o que protagonizaron momentos claves nel rellatu vital. La investigación siguió queriendo poné-yos identidá a esa xente. Per otru lláu, l’anális físicu de reversos, d’usos, de marques, de formatos de les imáxenes… un analís basáu nes metodoloxíes artístiques d’información permitióme llegar a otru tipu de datos. Pero siempre partiendo d’esi álbum familiar.
Fales, na presentación de la película, del filu familiar xenéticu que te conectó con eses semeyes. ¿Crees que va ser posible que los espectadores tamién podamos sentir esa conesión?
Sí, yo creo que la conesión puede dase nel espectador tamién, porque cuento la historia al traviés d’un procesu d’investigación; ye, entós, un descubrimiento que m’acompaña a mi y, de dalguna manera, yo nun voi por delantre del espectador a la hora d’entender el percorríu de los mios familiares, sinon que parto a la par d’elli al cuntar la historia de la Luna. Tamién intenté garrar cierta distancia emocional pa facilitar esa empatía. Si la historia fora, quiciabes, demasiáu intimista… qu’hai momentos que sí lo ye, pero nel gruesu, paezme a min, quise ser distante pa facilitar l’entendimientu de les sos vides. Que nun fora un retratu excesivamente autorreferencial.
Dempués siguió la investigación n’archivos, l’hallazgu d’otres pistes que la memoria familiar borrara, o nunca nun quisiera cuntar, o nunca nun supiera.
Sí. Primeru foi dalgún archivu documental que tiníemos en casa, mui pocu, y con pocu calter políticu. El gruesu de la documentación política foi la qu’atopé nel Archivu Municipal de Ribeseya y yá dempués nel Archivu Provincial d’Asturies, nel Militar del Ferrol, en Salamanca, nos de varios departamentos de Francia…
¿Varió lo qu’alcontrasti, de dalguna forma, la tu percepción sobre la historia familiar qu’hasta entós yera transmitida namái oralmente?
Sí, foi un cambiu importante. Ehí topé’l braeru posicionamientu políticu d’esta xente; evidencióse que los fechos nun se basaben en coses arbitraries, en banalidáes o nel caos de la guerra; nesti discursu de la “llucha ente hermanos”. Non, estes persones taben afiliáes a partidos, a sindicatos, defendieren al gobiernu llexítimu de la República. Tiníen una clara mirada crítica a la realidá. Y foi duru, mui duru, porque los documentos, un 80% d’ellos -tóos ellos, menos los de Francia- yeren documentos fechos pol réxime, pola dictadura; poro mui duros, con munches crítiques y esi discursu unificáu pa toles y tolos acusáes y acusáos. Ensin atención específica pa cada casu; coles mesmes pallabres en toles acusaciones. Ye duru, pero tamién, de dalguna manera, algún puntu foi reconfortante. Por exemplu, que nos archivos de Ribeseya mio bisgüela, María Luna, apaeciera como “marxista axitadora”. Fízome ilusión [rises] Y varió, varió. Tóu eso dióme pista pa dir a los sitios onde tuvieren: a los campos de concentración, al frente, llugares de refuxu, d’esiliu; llugares de trabayu y de vida. Tóo eso pude conócelo gracies a los archivos.
Cuando falamos d’histories de vida, sobremanera cuando falamos d’aquelles nes que s’entemecen la guerra y el sufrimiento, muncha xente elixe nun falar por una cierta sensación de pundonor. ¿Foi’l tu casu?
Sí. Yo planteguémelo, más que por cuntar el sufrimientu de la mio güela, de la mio bisgüela o de los hermanos, pol fechu de si esta pequeña historia familiar, qu’agora ye enorme, merecía un tratu especial, como lo ye una película. Y consideré que sí, porque toles hestories formen parte de la Historia y merecen ser cuntáes, manteníes, recuperáes. Foi lo que fici cola historia de los Luna, porque dime cuenta, tamién, que yera la persona que tinía la responsabilidá histórica de facelo, de recuperar una historia condergada, sinon, a un olvidu cuasi seguru. Pero sí que m’imaxino a mio güela y a mio bisgüela con munchu pudor si se vieren nuna pantalla de cine, retratáes de forma tan precisa y en momentos que pa elles supusieron munchu dolor, munchu sufrimiento. Por embargu, tamién creo que pol cambiu social, cultural, políticu -yos daría el pasu d’esi pudor a que tuvieren arguyoses de formar parte d’ello. Entendería’l so pudor, por tóu’l silenciu al que foron obligáes a tar na dictadura y na posterior democracia, pero confío que, nun futuru, estes histories yá nun seyan de sufrimientu calláu, sinon d’arguyu públicu.
Y siempres dende los güeyos d’elles. De Chabela, de María…
Ye mui frecuente, agora, el cine autorreferencial, íntimu, d’analís propiu o d’un entornu familiar cercanu. Esto ye asina porque’l cine permite cada vez más esa estructura, ensin grandes producciones; permite acercase a esti tipu d’histories de manera más afayaíza colos materiales y con tol procesu de rodaxe y de montaxe. Por embargu, yo nun quería que s’acercare munchu a esi formato, porque nun quería garrar escesivu protagonismu na película. Les protagonistes son mio güela, Chabela, y la so má, María Luna. Elles. Yo quería garrar distancia, ser namái el filín conductor qu’acompaña al espectador nel procesu d’investigación y de percorríu, de road movie al traviés de los espacios de la memoria. Les mis sensaciones, la mio vida, pueden mostrase en dalgunos d’esos momentos sutilmente, o mui evidentemente cola voz en off, pero siempres con esi posicionamiento distante. Un posicionamientu nun excesivamente personal. Hai esceiciones, sí: por exemplu, el momentu nel qu’apaezco na sablera d’Argelès, lleendo testos históricos. Ehí sí que la mio presencia ye mui evidente, en mediu del planu, porque nun me da vergoña lleer testos dende una mirada colleutiva. Pero cuando falo de lo íntimu, de lo familiar, la mio presencia ye más reservada. Más pegada a la cámara.
Memoria, xusticia y reparación: eses son los tres pilares fundamentales del movimientu memorialista. ¿Crees que con Luna yes a algamar les tres, anguaño, cuando l’escaezu ye’l principal riesgo nel caltenimientu de la Memoria democrática?
Memoria fízose. Ye un exerciciu de memoria la película, y el procesu. Que foi llargu, de tres años; interminente, non prácticu, constante no mental. Fízome conocer munchos llugares y acércame a ellos coles gafes, como suel dicise nel ámbitu del feminismu, violetes: coles gafes de la memoria, y sí, coles del feminismu, tamién. Xusticia, tamién lo creo. Fízose xusticia al analizar los procesos de los Luna dende un prisma xustu, solidariu y tratando de buscar la realidá ensin los desvíos que’l rexime puso. ¿Reparación? Non, eso ya nun creo. La reparación… mio güela, mio bisgüela morrieron sintiéndose culpables, sobre tóu la mio bisgüela. Sintiéndose culpable por tomar partíu políticu y qu’eso supunxera el pasu pola cárcel o l’esiliu d’un hermanu, del fusilamientu d’otru… Non polos sos propios posicionamientos, bonu, pero qu’ella ayudara a que tóu eso pasara. Y mio güela supongo que tamién heredaría esa culpa. Poro, la reparación llegó tarde… o nun llegó. Nun sé si asocedió en nengún momento. Nun llegó. ¿La reparación mía? Bono: yo creo que yo nun merezco nenguna reparación. Quiciás solo una, pequeña, qu’a lo meyor se rellaciona más cola xusticia: poder conocer la historia de la mio familia. Nesi casu sí, sí podemos decir que la hebo. Que yo pueda conocer el por qué, el contestu, quién fora esi tíu míu que me cuntaron, cuando yo era críu, que fora fusiláu. Eso ye reparación.
