Divide Llope la historia sobre’l cuadonguismu en cuatro fasteres: la enunciativa, na que s’apurrieron les bases d’esta idega, del sieglu VIII al XVI; la haxiográfica, hasta’l XVII; la racionalizadora del sieglu XVIII; y aquella que forxó’l mitu de los oríxenes tal y como lo conocemos: la nacionalizadora. Nella, nel sieglu XIX y de la mán de la burguesía hemerxente nel tiempu del liberalismo trató d’algamase un discursu que llexitimara la continuidá de la sociedá tal y como se conocía, nuna dómina na qu’entamaben a emerxer el movimiento obreru, el sindicalismu o los movimientos escontra la monarquía.
Esta foi la bás de la ponencia del investigador, qu’ayeri formó parte del programa de la tarde del Congresu Mundial de la Cultura Asturiana. Pa Llope, el fenómeno del cuadonguismu alcanzó un doble significáu: el xeneral, al rodiu de los oríxenes d’España, nel restu del tarrén ibéricu, y el que n’Asturies acabó por tener un calter d’identidá nacional y étnicu. Asentáu sobre un discursu de clás ya ideolóxicu, llegó a penetrar tanto nel ideariu social qu’alcanzó les clases obreres; protagonizó discursos de les personalidáes d’izquierda hasta na revolución del 34 y, anguaño, “tien capacidá de teatralización, porque’l mitu triunfó”.
Poro, n’opinión de Llope, “ye imposible eliminar la so eficacia d’un plumazu”. Ganar el discursu del cuadonguismu pasaría solo por facer un “discursu contrahexemónicu”, lo que pal pensador pasa, necesariamente, por reivindicar el celtismu. Foi esta aseveración la que, nel aula Severo Ochoa, mientres n’Uviéu cayía un monumental diluviu, xeneró la polémica y el debate. “¿Nun sedría posible reivindicar el cuadonguismu como identidá d’una nación?”, entrugó Roberto González-Quevedo, presidente del comité organizador del congreso, nuna animada charra na que tamién participaríen Astur Paredes, Inaciu Iglesias -que llegó a defender que les charres de Llope y Lombardía, les caberes na estaya de ponencies del congreso, foren les primeres y principales pal que vendrá- y Xosé Antón González Riaño.
“Eso sedría xugar nun terrenu embarráu”, reconoció Llope, escépticu, “pero puede intentar resignificase”. El retu ye importante porque, na so opinión, el cuadonguismu basa la so esistencia en llexitimar la “continuidá que llexitima” el sistema que l’aupó, mientres que’l celtismu ye, en contraposición, un “elementu popular y plebeyu”. Esa foi la espita que dio pasu a la charra de Lisardo Lombardía, que reivindicó’l celtismu que recalca “la importancia de lo pequeñu” y que “construye puentes envede llevantar muries”. La sala, enllena de persones con diferentes idegues pero un mismu sentir, foi muestra d’ello.
