Otru añu más l’Anuariu de la Música Asturiana vuelve a publicase en formatu físicu y dixital. Al cumplise’l XXV Aniversariu Goxe Producciones quixo «conmemoralu con un volume especial, con mayor paxinación, conteníos y calidá, lo que supón un esfuerciu económicu bultable». Amás sorrayen que «la distribución gratuita ye’l oxetivu» y pa ello óptase «por una financiación basada na publicidá, polo que son los propios anunciantes quien faen posible la pervivencia y ameyoramientu d’un proyectu como esti».
L’Anuariu de la Música Asturiana 2024 fai un repasu fondu a lo que dio de sí’l pasáu añu. Como de costume, les temátiques céntrense n’estilos como la música tradicional, el folk, el rock o la canción d’autor, con secciones qu’inclúin reportaxes, informes, entrevistes, crítiques, opinión, recoyida de material o anuncies. L’Entamu, nesta ocasión, titúlase «La fortaleza de la música asturiana» y nél faise una retrospectiva de lo que foron pa la música asturiana estes dos últimes décades, nesti sen, manifiéstase: «Ye de xusticia reconocer que’l puxu que muestra la música asturiana, magar la so problemática, ye consecuencia del compromisu y llealtá de los propios protagonistes -individuales y colectivos-; ye’l trabayu permanente y con xeitu de los y les intérpretes, en xunto cola autoxestión de la sociedá civil, lo que nos permite gociar d’una escena bayurosa, diversificada y dinámica».
En cuantes a los conteníos, destaquen la crónica titulada «Cantar del 2024: ente la tristura y l’allegría», que percuerre l’actividá festivalera alredor de los soníos folkis; el reportaxe «La banda sonora d’un patrimoniu mundial», qu’esplora les rellaciones ente la cultura sidrera y la música; conmemórase’l cuarenta aniversariu de la Noite Celta de Porcía con dos artículos: «Cuarenta anos na periferia cultural asturiana» y «Los oríxenenes d’una identidá más allá de la música»; rescamplen tamién dos estudios de calter históricu: «Música nes piedres» -sobre la iconografía musical nos capiteles medievales asturianos- y «Cuando un mundu muertu canta una canción nueva» -sobre la música na Revolución d’Ochobre de 1934-; les propuestes más nueves tienen el so espaciu nel reportaxe «La Xeneración Z aporta a la música asturiana»; otru reportaxe tituláu «Una historia del ‘Pandereta revolution’» afonda nel bon momentu que ta viviendo esi instrumentu; amás d’entrevistes a Herbamora o a Héctor Braga.
L’Anuariu zárrase, como siempre, cola sección «Collecha», onde apaecen les producciones musicales y bibliográfiques del 2024. El volume compleméntase con un discu nel que se recueyen muestres de lo meyor qu’ufiertó l’añu, con diecinueve cortes repartíos n’estilos como’l folk, el rock, el reggae o la electrónica, con artistes y grupos como Rubén Alba, Guieldu, Beleño, Herbamora, Llevólu’l Sumiciu, Fruela 757, Melandru o La Tarrancha.
