Conecta con nosotras

Cultura

La llinia trazada por xente como Xune

Xune echó a andar ente eses dos xeneraciones, la del desiertu y la de la sabana, y dende entós nun dexó de caminar.

Xune Elipe en Uviéu. Semeya: El Cuaderno.

La primer vez que vi a Xune Elipe Raposo él taba enriscáu nun escenariu (nun conciertu de Dixebra, por supuestu), garrando’l micro como si fuera un barrenu de dinamita nes manes rebeldes d’un mineru de la Revolución del 34, y «botando col inquebrantable rigor d’un guerreru masái», como escribiera’l periodista Pepe Colubi nuna crónica. Yo daquella sentía almiración por él como espectador, agora sigo sintiéndola como compañeru col que compartí unos cuantos cafés y cerveces, testos y artículos, lletres de cantares, llibros y proyectos…
Nel movimientu de reivindicación llingüística, pertenezo a la xeneración que fizo la travesía de la sabana, por llamala asina, porque primero otra xeneración fizo la travesía del desiertu: la xente de Conceyu Bable, la qu’empuñó les pancartes de “Bable nes escueles”, la que-y dio nome y valor a una llingua sobre la que mexó durante cuatro décades el franquismu y sobre la que siguió mexando l’Asturies más provinciana. L’asturianu yera daquella solo una chispa, pero gracies a aquella chispa prendió la llama que sigue viva.
Xune echó a andar ente eses dos xeneraciones, la del desiertu y la de la sabana, y dende entós nun dexó de caminar. Foi un referente pa quienes nos fuimos incorporando pasu ente pasu naquellos tiempos, sigue siendo un referente pa les xeneraciones moces que tán dándo-y tira al asturianu. Fizo collaboraciones en llingua asturiana en La Voz de Avilés, en Radio Popular d’Avilés y en Radio Sele, foi ún de los fundadores de Dixebra (la banda más influyente y internacional del rock n’asturianu), del proyectu musical Soncai Sound System, de Discos L’Aguañaz, de Goxe Producciones, autor del llibru ‘Llingua y rock’, militante a pie de cai o a pie d’obra siempre que dalguién propón que grabe, que cante, qu’escriba, que se manifieste o que dea la cara pola oficialidá y por otres causes asturianes o internacionalistes.
Esta semana estrenose en TPA’l programa musical ‘D’ayeri a güei’, que dirixe Xune. Estos díes tamién supimos que Xune ganó’l Premiu d’Ensayu Fuertes Acevedo 2020 pola obra ‘Una llinia trazada. Historia de la música asturiana’, que ye “el ramu a una vida dedicada a la música asturiana”, dixo en declaraciones a Europa Press. Yo pongo’l ramu a estes llinies diciendo que gracies a xente como él hai una llinia trazada pa siguir avanzando hacia la dignidá, hacia la oficialidá d’esta llingua. Y que Xune foi y sigue siendo ún de los imprescindibles nel camín que nos queda por percorrer.

Paco Álvarez
Escrito por

Periodista, escritor y traductor lliterariu d'italianu. Ye autor de les noveles "Lluvia d'agostu" (Hoja de Lata, 2016) y "Los xardinos de la lluna" (Trabe, 2020), coles que ganó en dos ocasiones el Premiu Xosefa Xovellanos.

Haz click para comentar

Responder

Tu dirección de correo electrónico no será publicada. Los campos obligatorios están marcados con *

Advertisement

Lo más leído

Adrián Barbón o la política del trending topic

Opinión

El billete de ALSA nos sale caro

Actualidad

¿Cómo salvamos la noche sin cargarnos la salud?

Reportajes

“La huella industrial de Gijón se ha desdibujado”

Cultura

Asociación Cultural Nortes de Asturias © 2020 · Centradas en la periferia

Nortes en redes