De les siete grandes fortunes asturianes incluyíes na llista de millonarios españoles de la revista Forbes del 2019, nenguna d’elles paga l’impuestu de Patrimoniu nesta comunidá. Ye la conclusión del estudiu que Podemos Asturies realizó pa facer la so propuesta de reforma fiscal, que señala que si asina lo ficieren la recaudación d’esti tributu diba ser de más de 125 millones d’euros, un 700% superior a la cifra actual.
El cálculu básase nos últimos datos d’execución presupuestaria rexistraos n’Asturies, qu’ofrecen una cifra de 18 millones d’euros recaudaos nel 2019 vía Impuestu de Patrimoniu, cuando la fortuna total de les siete families señalaes suma más de 4.500 millones d’euros. Según los númberos de l’Axencia Tributaria, Asturies concentra’l 1,3% de lo recaudao por esti impuestu n’España, un porcentaxe que, de sumase l’aportación d’estos siete grandes caudales, ascendería al 4%.
Les siete families sumen más de 4.500 millones d’euros
La principal fortuna asturiana qu’apaez na publicación ye la familia Masaveu, con un capital estimáu de 2.000 millones d’euros. Propietaria de la cementera Tudela Veguín, tien inversiones en banca (Liberbank, Santander, Bankinter), enerxía (EDP) y bodegues.
Podemos yá criticara duramente nel so día la concesión de la Mellada d’Oru del Gobiernu asturianu a la Corporación Masaveu nel añu 2015, basándose en que tenía’l so dineru “en paraísos fiscales”, y nes supuestes irregularidaes na obra d’ampliación d’El Musel nes que se viera chiscada la cementera Tudela Veguín. Ello ye que nel 2006 Fernando Masaveu tamién recibiera la Medalla d’Oru del puertu xixonés.
Otros nomes de la llista son l’empresariu Víctor Madera (450 millones), l’accionista del Corte Inglés Carlota Galán (400 millones), el pilotu Fernando Alonso (180 millones) o l’empresariu Felipe Cosmen (150 millones).
Nel so informe señala Podemos que d’aplicase la subida del Impuestu de Patrimoniu que propón, si estes families tributaren n’Asturies, la recaudación llegaría a los 142 millones. Na anterior llexislatura, ante les acusaciones del exdiputáu de Podemos Enrique López de “insolidaridá” a los grandes patrimonios asturianos, la conseyera daquella de Facienda, Dolores Carcedo, matizó que los impuestos páguense “onde si vive y non onde se naz”.
